الماتىداعى «دوستىق ۇيىندە» وتكەن پوەزيا جانە پروزا جيناقتارىنىڭ تانىستىرىلىمىنا وسى جوباعا قاتىسقان ۇلىبريتانيا, يسپانيا, فرانتسيا, رەسەي, قىتاي, ەگيپەت جانە تاياۋ شىعىس ەلدەرى اۋدارماشىلارى مەن ادەبيەتشىلەرى, اۋدارما جانە باسپا ۇيىمدارىنىڭ باسشىلارى, شىعارمالارى العاشقى انتولوگيالارعا كىرگەن اۆتورلار قاتىستى.
قر پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى, «جاھانداعى زاماناۋي قازاقستاندىق مادەنيەت» جوباسىن ىسكە اسىرۋعا جاۋاپتى جۇمىس توبىنىڭ جەتەكشىسى ايدا بالاەۆا, قازاق ادەبيەتىنىڭ ۇزدىك ۇلگىلەرىن بۇۇ-نىڭ 6 تىلىنە اۋدارىپ, تاراتۋ – ۇلت تاريحىندى بۇرىن-سوڭدى بولماعان, قازاق مادەنيەتىن الەمگە تانىستىرۋ تۇرعىسىنان تەڭدەسى جوق باستاما ەكەنىن ايتتى. 160 قازاقستاندىق اۆتوردىڭ تاڭدامالى شىعارمالارى ءبىر مەزەتتە الەمنىڭ ەڭ ءىرى 6 تىلىنە اۋدارىلىپ, سول تىلدەردە جۇمىس ىستەيتىن ەڭ بەدەلدى باسپالاردان شىعىپ, 5 قۇرلىقتاعى 90-نان اسا ەلدىڭ جوعارى وقۋ ورىندارى, كىتاپحانالارى مەن عىلىمي ورتالىقتارىنا جەتەدى. جالپى سانى 2 ميلليارد 600 ميلليون حالىق قازىرگى قازاق ادەبيەتىنىڭ جاۋھارلارىمەن تانىسۋعا مۇمكىندىك الادى», – دەدى ا.بالاەۆا.
جوبا اياسىندا اۋدارما ساپاسىن قامتاماسىز ەتۋ ماسەلەلەرىنە ەرەكشە ءمان بەرىلدى. 6 تىلدە جۇمىس ىستەيتىن شەتەلدىك اۋدارماشىلار مەن باسپاگەرلەر قازاقستانعا ارنايى كەلىپ, ەلىمىزدىڭ تاريحى مەن مادەنيەتىمەن تانىستى. ۇلىبريتانيا, يسپانيا, رەسەي, فرانتسيا جانە قىتاي ەلدەرىنەن كەلگەن اۋدارماشىلار مەن ارىپتەس باسپا ۇيىمدارىنىڭ وكىلدەرى قازاق اۆتورلارىمەن جەكە-جەكە سۇحباتتاسىپ, اۋدارما بارىسىندا تۋىنداعان سۇراقتاردى تالقىلادى. بۇل اۋدارمانى تۇپنۇسقا ماتىنگە مەيلىنشە جاقىنداتىپ, ونىڭ كوركەمدىك ساپاسىن قامتاماسىز ەتۋگە زور ۇلەس قوستى.
قازىرگى قازاق ادەبيەتى جيناقتارىن اعىلشىن تىلىنە اۋدارۋ, باسىپ شىعارۋ جانە تاراتۋ جۇمىسى كەمبريدج ۋنيۆەرسيتەتى باسپاسىنىڭ قاتىسۋىمەن ىسكە استى. تانىمال ۋنيۆەرسيتەت باسپاسى جوباعا تاجىريبەلى اۋدارماشىلار مەن بەدەلدى ادەبيەتشى مامانداردى تارتتى.
قازاق ادەبيەتى ۇلگىلەرىن يسپان تىلىندە سويلەتۋگە يسپانيا مادەنيەت مينيسترلىگى قولداۋ كورسەتىپ, «سەرۆانتەس ينستيتۋتىنىڭ» كەڭەسى بويىنشا كىتاپتاردى باسىپ, تاراتۋعا ادەبي اۋدارماعا ماماندانعان «Visor» باسپاسى جاۋاپتى.
انتولوگيالاردىڭ فرانتسۋز تىلىندەگى نۇسقاسىن دايىنداۋعا پاريج قالاسىنىڭ مەرياسى قامقورلىق جاساپ, جيناقتاردى شىعارۋ «ميشەل دە مول» اتتى بەدەلدى فرانتسۋز باسپا ۇيىنە تاپسىرىلدى. ورىس تىلىندەگى اۋدارما مەن ادەبي رەداكتسيا جۇمىسىن ۇيلەستىرۋگە رەسەي جازۋشىلار وداعىنىڭ ماسكەۋلىك ۇيىمى, ال جيناقتى باسىپ شىعارۋ مەن تاراتۋعا م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ باسپاسى اتسالىسپاق.
قازاق ادەبيەتى جيناقتارىن قىتاي تىلىنە اۋدارۋ, باسىپ شىعارۋ جانە تاراتۋعا قىتاي حالىق رەسپۋبليكاسىنىڭ «ۇلتتار باسپاسى» جاۋاپتى. جيناقتاردى اراب الەمىنە ەگيپەت اراب رەسپۋبليكاسىنىڭ مادەنيەت جانە ءبىلىم ورتالىعىنىڭ قولداۋىمەن تاياۋ شىعىس ەلدەرىنە تانىمال «MediaHub» باسپاسى تانىستىرادى.
جوعارىدا اتالعان سەرىكتەس-ۇيىمدار اۋدارما, باسىپ شىعارۋ, تاراتۋ-ناسيحاتتاۋ جۇمىستارىنا جالپى سانى 70-تەن اسا مامان جۇمىلدىردى.
جوبا قر مادەنيەت جانە سپورت مينيسترلىگىنىڭ تاپسىرىسى بويىنشا «ۇلتتىق اۋدارما بيۋروسى» قوعامدىق قورىنىڭ ۇيلەستىرۋىمەن جۇزەگە اسۋدا.
