كۇننىڭ العاشقى شاراسى رەتىندە «ينفراەنەرگو» جشس بازاسىندا قالا, اۋدان اكىمدەرىمەن, ونەركاسىپ كاسىپورىندارىنىڭ, بيزنەس-قۇرىلىمدار مەن كاسىپوداق ۇيىمدارىنىڭ باسشىلارىمەن كەڭەس وتكىزىلدى. بۇل زاۋىت وبلىستاعى ءىرى كاسىپورىنداردىڭ ءبىرى جانە جارىلىستان قورعالعان ەلەكترلىك-تەحنيكالىق جابدىقتى, اپپاراتۋرانى, باقىلاۋ جۇيەسىن, اپاتقا قارسى قورعانىس جانە سيگناليزاتسيانى دايىنداۋمەن, مونتاجداۋمەن جانە جوندەۋمەن اينالىسادى.
كەڭەسكە قاتىسۋشىلار جالاقىسى تومەن قىزمەتكەرلەردىڭ ەڭبەك اقىسىن ارتتىرۋ, جاڭا جۇمىس ورىندارىن قۇرۋ, بيزنەستىڭ الەۋمەتتىك جاۋاپكەرشىلىگىن كۇشەيتۋ, از قامتىلعان قىزمەتكەرلەرگە الەۋمەتتىك كومەك كورسەتۋ ماسەلەلەرىن قاراستىردى. وبلىستا 11317 ۇجىمدىق شارت جاسالدى, ءىرى جانە ورتا كاسىپورىنداردىڭ 74,1%-ءى قامتىلدى. 118,5 مىڭ ادامدى قامتي وتىرىپ, جۇمىس ورىندارىن ساقتاپ قالۋ بويىنشا 9,7 مىڭ مەموراندۋم جاسالدى. بۇل رەتتە وسى جىلدىڭ باسىنان بەرى وڭىردە جۇمىسكەرلەردى جۇمىستان بوساتۋ بولماعانىن ايتا كەتۋ كەرەك. سونىمەن قاتار 43 كاسىپورىندا 704 كوپ بالالى قىزمەتكەر جۇمىس ىستەيدى, ونىڭ ىشىندە 524 ادامنىڭ تۇرعىن ءۇيى جوق. مىسالى, «PSI STROI UNDYSTRYA» جشس-دا 95 كوپ بالالى قىزمەتكەردىڭ 75-ءى پاتەرگە مۇقتاج.
وبلىستا الەۋمەتتىك جاۋاپكەرشىلىك تانىتۋدىڭ ايقىن مىسالى رەتىندە جامبىل اۋدانىنان «اقتەرەك» شارۋا قوجالىعىنىڭ باسشىسى تەمىرلان ءشاينۇسىپوۆتى كەلتىرۋگە بولادى. ول اۋىلداستارىن جۇمىسپەن قامتاماسىز ەتىپ قانا قويماي, الەۋمەتتىك سالاعا دا تۇراقتى جاردەم بەرۋدە. 50 ورىندىق «ءداريا-2016» بالاباقشاسىن, زاماناۋي فۋتبول الاڭىن, سونداي-اق «بولاشاق» امبەباپ ساۋدا ورتالىعىن سالدى. ەڭ باستىسى, ول 2008 جىلدان باستاپ كوپ بالالى جانە از قامتىلعان وتباسىلارعا, سونداي-اق ءوز شارۋاشىلىعىنىڭ جۇمىسشىلارى ءۇشىن 105 ءۇي تۇرعىزدى. تابىستى كاسىپكەر ءوز ارىپتەستەرىن كوپ بالالى وتباسىلارعا, از قامتىلعان ازاماتتارعا, سونداي-اق مۇمكىندىكتەرى شەكتەۋلى جاندارعا جان-جاقتى كومەك كورسەتۋگە ۇندەدى.
شارا سوڭىندا گۇلشارا ابدىقالىقوۆا كاسىپورىندار جانە بيزنەس-قۇرىلىمدار باسشىلارىن تەمىرلان ءشاينۇسىپوۆتىڭ ىزگىلىگىنە قولداۋ كورسەتىپ, حالىقتىڭ الەۋمەتتىك قورعالماعان توپتارىنا جۇيەلى ءارى جان-جاقتى كومەك كورسەتۋگە شاقىردى.
بۇدان ءارى گ. ابدىقالىقوۆا 2017 جىلى مامىردا اشىلعان كوپ سالالى وبلىستىق بالالار اۋرۋحاناسىنىڭ نەوناتالدى ورتالىعىنا باردى. ورتالىق جاڭا قۇرالدارمەن جابدىقتالعان جانە بالالار مەن جاڭا تۋعان نارەستەلەرگە مامانداندىرىلعان جانە جوعارى ساپالى حيرۋرگيالىق, تراۆماتولوگيالىق كومەك كورسەتەدى. ونىڭ جۇمىسى وڭىردەگى نارەستەلەر ءولىمىنىڭ دەڭگەيىن تومەندەتۋ ماقساتىندا پاتولوگيانى ەرتە كەزەڭدە انىقتاۋعا جانە الدىن الۋعا باعىتتالعان. ورتالىق اشىلعاننان بەرى 398 ناۋقاس ەمدەلگەن, ونىڭ ىشىندە 25-ءى — جاڭا تۋعان نارەستەلەر. بۇل رەتتە 189 وتا جۇرگىزىلگەن, ونىڭ ىشىندە 18 سابيگە وتا جاسالعان. بۇعان دەيىن تالدىقورعان قالاسىندا جاڭا تۋعان نارەستەلەرگە وتا جاسالمايتىن.
جۇمىس ساپارىنىڭ سوڭىندا قر پرەمەر-ءمينيسترىنىڭ ورىنباسارى «قاراتال» شاعىن اۋدانىنداعى ستۋدەنتتەرگە ارنالعان جاتاقحانا قۇرىلىسىنىڭ بارىسىمەن تانىستى. قۇرىلىسى اياقتالماعان قوناق ءۇي عيماراتىن قايتا جاڭعىرتۋدىڭ ارقاسىندا قالادا 288 ورىندىق زاماناۋي ستۋدەنتتەر جاتاقحاناسى تۇرعىزىلىپ, ونىڭ ماڭىنداعى اۋماق اباتتاندىرىلادى. جوبانىڭ جالپى قۇنى 2,4 ملرد تەڭگەنى قۇرايدى.
وسىمەن ۇكىمەتتىك دەلەگاتسيا الماتى وبلىسىنداعى جۇمىسىن اياقتاپ, قاراعاندى وبلىسىنىڭ جەزقازعان قالاسىنا بەت الدى.
