رۋسلان دالەنوۆ باعدارلاما ىسكە اسىرىلعان 4 جىلدان بەرى رەسپۋبليكالىق بيۋدجەتتەن 210 ملرد.تەڭگە بولىنگەنىن حابارلادى. بۇل قاراجات 13 مىڭ شوب سۋبەكتىسىنە قارجى بەرۋگە, 10 مىڭ جۇمىس ورنىن قۇرۋعا, 3,3 ترلن.تەڭگەگە ءونىم وندىرۋگە مۇمكىندىك بەردى.
مينيسترلىك دەرەگىنە قاراعاندا, وسى 4 جىل ىشىندە باعدارلاما اياسىندا 13 231 جوباعا 1,1 ترلن.تەڭگە كرەديت بەرىلىپ, 246,5 ملرد.تەڭگە كولەمىندە سۋبسيديا تولەندى. 2019 جىلعى 1-توقساننىڭ قورتىندىسى بويىنشا, 715 جوباعا 37 ملرد.تەڭگە كرەديت ءبولىنىپ, ول بويىنشا 11,5 ملرد.تەڭگە سۋبسيديا مەن كەپىلدىك تولەنگەن.
«باعدارلاما ىسكە اسىرىلعان 4 جىل ىشىندە 7 466 جوباعا 135 ملرد. تەڭگە سۋبسيديا, 4 148 جوباعا 56 ملرد. تەڭگە كەپىلدىك بەرىلدى», - دەدى مينيستر.
ول قابىلدانعان شارالاردىڭ ناتيجەسىندە, شوب-تىڭ ەكونوميكاداعى ماڭىزى ارتقانىن اتاپ ءوتتى. ماسەلەن, 2015 جىلى ءجىو-دەگى شوب ۇلەسى 24,9%, 2018 جىلعى – 9 ايدا 28,9%. وسىلايشا, 2015 جىلمەن سالىستىرعاندا, شاعىن جانە ورتا كاسىپكەرلەردىڭ ەكونوميكاعا قاتىسۋى 4 تارماقشاعا ءوستى.
2019 جىلعى 1 قاڭتاردا جۇمىس ىستەيتىن شاعىن جانە ورتا كاسىپكەرلىك سۋبەكتىلەرىنىڭ سانى 1,2 ملن بىرلىككە جەتتى. وتكەن جىلعى وسى كەزەڭمەن سالىستىرعاندا, بۇل كورسەتكىش 8,3%-كە ءوستى.
ەسكە سالساق, بيىل ەلباسىنىڭ تاپسىرماسى بويىنشا, «قاراپايىم زاتتار ەكونوميكاسىن» دامىتۋ بويىنشا قولجەتىمدى كرەديت بەرۋ مىندەتىن ورىنداۋعا 600 ملرد.تەڭگە ءبولىندى. 65 ەكونوميكالىق قىزمەت ءتۇرىنىڭ ىشىنەن 365 تاۋار انىقتالدى. بۇل كرەديتتەرگە «بجك-2020» ارقىلى سۋبسيديا بەرىلەدى.
بانكتەر 12,8 ملرد تەڭگەنىڭ 21 ءوتىنىمىن ماقۇلدادى. ەدب قاراۋىندا 69 ملرد تەڭگەنىڭ 64 ءوتىنىمى جاتىر. «دامۋ» قورى 7,5 ملرد تەڭگەنىڭ 12 جوباسىن سۋسيديالاۋ شارتىن بەكىتتى
سونىمەن قاتار, بيزنەسكە قارجى بەرۋدىڭ قولجەتىمدى بولۋىن كۇشەيتۋ ماقساتىندا بىرقاتار شارالار پىسىقتالۋدا:
ءبىرىنشى. «قاراپايىم زاتتار ەكونوميكاسى» بويىنشا اينالىم قاراجاتىنا كرەديت بەرۋ ۇلەسىن 30%-تەن 50%-كە دەيىن ارتتىرۋ قاراستىرىلۋدا.
ەكىنشى. «قاراپايىم زاتتار ەكونوميكاسىن» كەپىلدەندىرۋ قۇرالدارىن «بجك-2020» ارقىلى ەنگىزۋ پىسىقتالۋدا.
ءۇشىنشى. «بجك-2020» بويىنشا قارجىلاندىرۋدى ارتتىرۋ ۇسىنىلۋدا.
شوب دامۋىن ودان ءارى ىنتالاندىرۋ ءۇشىن كاسىپكەرلىكتى دامىتۋعا قولايلى جاعداي تۋعىزۋعا باعىتتالعان بيزنەس-ورتانى دامىتۋعا ارنالعان زاڭنامالىق تۇزەتۋلەردىڭ 7-پاكەتى قابىلداندى.
«بجك-2020»-نى 2025 جىلعا دەيىن ۇزارتۋ شەڭبەرىندە قارجىلىق قولداۋ قۇرالدارىن جەتىلدىرۋگە باعىتتالعان تۇزەتۋلەر ازىرلەندى.
«بۇل شارالار بيزنەستى مەملەكەتتىك قولداۋ مەن قارجىلاندىرۋ شارالارىنىڭ قولجەتىمدىلىگىن, سونداي-اق ونىڭ ەل ەكونوميكاسىنا ۇلەسىن ارتتىرۋعا مۇمكىندىك بەرەدى», دەدى رۋسلان دالەنوۆ.
