ءزارىپ كوكەمىز العاشقىدا اۋلا ىشىنەن مونشا سالىپ الىپتى. وعان جەتى مىڭعا تارتا بوتەلكە جۇمسالعان. سويى بولەك مونشاعا تۇسۋگە نيەت بىلدىرگەندەر كوبەيىپ, جاقسى جاسالعانىنا, ءىشىنىڭ ءمىنسىز, ناعىز بابىنا كەلتىرىلگەنىنە ماقتاۋ ايتىپ, تاۋەكەلدىڭ ۇستىندە جۇرگەن ازاماتتىڭ ءۇي سالسام دەگەن شەشىمىن نىعايتا تۇسەدى.
ونەرلى ادام ءبىر ىسكە بەكىنسە باعىتىنان اينىتۋ قيىن. ءزارىپ مىسابەكوۆ ءۇي سالۋ ءۇشىن قىرىق مىڭعا جۋىق بوس بوتەلكەنى جينايدى. وعان اۋىلداستارى دا جاردەم بەرگەن. باياعىداي دۇكەندەر بوس بوتەلكەنى اقشاعا قابىلداي بەرمەيدى. توي-تومالاقتان سوڭ بوس قۇمىرالار اۋىلدىڭ رەپەتىن الىپ, ءار جەردە دومالاپ جاتا بەرەدى. ونى جيناپ الىپ تۇتىنۋشىسىنا بەرسەڭ, اۋىل قوقسىقتان تازارادى. سونىمەن ءزارىپ ۇزىندىعى ون ەكى, ەنى سەگىز مەتر بولاتىن باسپانا تۇرعىزىپ الدى. مۇنىڭ دا ءوز ەرەكشەلىگى بار ەكەن. قىستا جىلى, جازدا سالقىن بولاتىن بۇل ۇيگە اۋىلداستارىنىڭ ىشىنەن قىزىعۋشىلىق تانىتىپ جاتقاندار از ەمەس.
زاكەڭ ءۇيدىڭ سىرتقى قاباتىن اشىق كۇيدە قالدىرىپ, ءىشىن عانا سىلاعان. مۇنىڭ تاعى ءبىر جاقسىلىعى, سىرتىن سۋمەن ايناداي ەتىپ جۋىپ الۋعا ابدەن بولادى. وتاعاسىنىڭ تاۋەكەلى جۇبايى ءساۋلە ىبىراەۆانى دا قاناتتاندىرىپ وتىر.
«راسىمەن جاقسى قۇرىلىس ماتەريالى بولادى ەكەن, دەيدى ول. ەندى وسى تاسىلمەن جىلىجاي جانە دۇكەن تۇرعىزساق دەگەن نيەتىمىز بار». نيەتكە جەتكەن جاقسى. قام كەسەك, قىزىل كىرپىشتەن ءۇيدى اركىم-اق تۇرعىزادى. شەتەلدىڭ ءبىراز قالالارىنا جولىمىز ءتۇستى. ادام ويىنا كەلمەيتىن ماتەريالداردان ءتۇرلى نىساندار, ويىن-ساۋىق ورتالىعىن تۇرعىزعانداردى كوردىك. ادامدار كوپ كەلەدى. تۇتىنۋشىسى كوپ.
مىنا جامبىل وبلىسى مويىنقۇم اۋدانىنداعى جول بويىندا كەمەدەن كافە اشىپ قويعان ازامات بار. تۇندە شامدارى جارقىراپ قۇم ۇستىندە ءجۇزىپ كەلە جاتقانداي اسەر بەرەدى. سول سياقتى, ءزارىپ شەبەردىڭ بوساعان بوتەلكە قۇمىرالارىنان تۇرعىزىلعان ءۇي-جايى دا اتاقتى شايىر تۇرماعامبەت اۋىلىنىڭ كوركىنە كورىك قوسىپ تۇر.
قىزىلوردا وبلىسى
