قورعالجىننىڭ وركەندەۋ دەپ اتالاتىن ولكەسى ءحVىى-ءحVىىى عاسىرلاردا بىرەسە قازاقتىڭ, بىرەسە قۇبا قالماقتىڭ يەلىگىندە بولعانعا ۇقسايدى. تۇگىن تارتسا مايى شىعاتىن ادەمى ولكەنىڭ اجارىنا قىزىققان جاۋ ىرگە تەۋىپ قالماق بولىپ قىم-قيعاش سوعىس اشقان. اتا-بابادان مۇرا بولىپ قالعان جەردى قورعاۋ الميساقتان ەركەك كىندىكتىنىڭ پارىزى. ايتسە دە, ءبىر جولى ون بەسىندە تۋعان ايداي تولىقسىعان ون بەس جاسار حان قىزى قانىكەي دە اق ساۋىتى جارقىلداپ اتقا قونسا كەرەك. كادىمگى ءاپايتوس ازاماتتارمەن ءبىر ساپتا. ءبىر ساپتا ەمەس, وجەتتىگىمەن, اقىل-پاراساتىمەن قول باستاعان. اتاجۇرتقا كوز الارتقان قۇبا قالماقتى ەتەگىن ءتۇرىپ قويىپ جوسىلتا شاپسا كەرەك. قىز باستاعان قوسىننىڭ ايدىنى اسقان سوڭ, قاھارىنان سەسكەنگەن قالماق قولى كەيىن شەگىنگەن.
ارادا ءبىراز ۋاقىت وتكەن سوڭ تاعى ءبىر قيان-كەسكى شايقاس. سول شايقاستا باتىر قىز قانىكەي وققا ۇشادى. ون ەكىدە ءبىر گ ۇلى اشىلماي تۋعان جەردى قورعاۋ جورىعىندا جانىن پيدا ەتكەن قانىكەي قىزدىڭ ارتىندا ماڭگى ولمەس مۇرا قالعان. ول مۇرا – قازاقتىڭ باتىر قىزىنىڭ تۋعان جەردى قورعاۋداعى ەرەن ەرلىگى.
ويسىراي جەڭىلگەن قۇبا قالماق قىر اسىپ كەتكەن سوڭ قازاقتار ءوز جەرلەرىن يەلەنە باستايدى. وسى وركەندەۋ دەپ اتالاتىن مەكەنگە وتەقارا ەسىمدى باي قونىستانادى. ءبىر جىلدارى بايبەك ەسىمدى جالعىز بالاسىنان ايرىلعان وتەقارا قانىكەي زيراتىنىڭ تاپ جانىنان مازار تۇرعىزىپ, بالاسىن جەر قوينىنا تاپسىرادى. ەل ايتىپ جۇرگەن ەستەلىكتە مازاردى سالىپ شىققان بەكبولات ەسىمدى شەبەرگە ەكى ءۇيىر جىلقى بەرىپتى دەگەن دەرەك بار. بىراق بۇل جەر بايبەكتىڭ اتىمەن اتالماي, ءدال سول كەزدە ءدۇيىم جۇرتقا بەلگىلى بولعان قانىكەي اتىمەن اتالىپ كەتكەن ەكەن.
قازىر وركەندەۋدىڭ ورىندە قيادان كوزگە تۇسەتىن مازار سارىارقانى كەزىپ كەتەتىن سامال جەلمەن كونە ءداۋىردىڭ كۇمبىرىن كۇڭىرەنە جىرلاپ تۇرعانداي.
اقمولا وبلىسى,
قورعالجىن اۋدانى
