سوڭعى ۋاقىتتا ەمحانا قىزمەتكەرلەرىنىڭ قاتارىن شىڭعىس ءۋاليحانوۆ, سالتانات ءجۇمادىلوۆا, ريزاگۇل قابدوللا, داريعا ماتكەنوۆا, اكۋشەر-گينەكولوگتار زارينا امانقۇل, گيۋزال جاباعينا, ولگا اماناتيدي سەكىلدى جاس ماماندار تولىقتىردى. جارقىرعان جاڭا اۋرۋحانادا دارىگەرلىك قىزمەت جولدارىن باستاعان جاستار قۋانىشتى.
جالپى, ەمحانا باسشىلىعىنىڭ مالىمەتىنشە, كوپشىلىك تۇرعىندار قابىلداۋعا جازىلۋدا «Damumed» موبيلدى قوسىمشاسىن پايدالانادى. دارىگەرلەر ءوز بولىمشەلەرىنە تىركەلگەن ادامداردىڭ دەنساۋلىعىنا مونيتورينگ جاساي الادى. تۇرعىنداردىڭ قوڭىراۋىن قابىلدايتىن ارنايى ID تەلەفون ورتالىعى جۇمىس ىستەيدى. مۇندا ماماندار كوپ ارنالى تەلەفون ارقىلى تۇرعىنداردىڭ ساۋالىنا جاۋاپ بەرىپ, ولاردى دارىگەردىڭ قابىلداۋىنا جازادى. ەمحانادا ورناتىلعان LED ەكرانداردا موبيلدى قوسىمشانى پايدالانۋ ەرەجەلەرى بار بەينەروليكتەر ۇدايى كورسەتىلەدى. «Damumed» موبيلدى قوسىمشاسىن پايدالانۋشىلار دارىگەردىڭ قابىلداۋىنا جازىلۋعا نەمەسە دارىگەردى ۇيگە شاقىرتۋعا, جازىلعان رەتسەپتىلەردى جانە زەرتحانالىق زەرتتەۋلەردىڭ ناتيجەلەرىن قاراۋعا, ەڭبەككە جارامسىزدىق پاراقتارىن جۇكتەي الۋعا مۇمكىندىگى بار. ال تۇرعىندار ۇيدە وتىرىپ-اق دارىگەردىڭ قاراۋىنا جازىلا الادى. دارىگەردى ۇيگە شاقىرادى.
اق جەلەڭدى ابزال جاندار جەكە مودۋل ارقىلى ەمدەلۋشىلەردىڭ بارلىق قيمىل-قوزعالىسىن, ەمدەلۋ قورىتىندىلارىن باقىلايدى. سونداي-اق بولىمشەگە تىركەلگەن تۇرعىنداردىڭ تولىق ءتىزىمىن كورە الادى, ولاردى جاسىنا, باسقا دا قاجەتتىلىكتەرىنە قاراي ىرىكتەيدى. بۇل ءتىزىم ارقىلى سكرينينگتەن وتۋگە ءتيىستى تۇرعىنداردى انىقتاپ, ەم-شارالاردىڭ كەستەسىن ءتۇزىپ, حابارلاسۋعا تولىق مۇمكىندىك بار.
جۋىردا دۇنيەجۇزىلىك دەنساۋلىق كۇنىنە وراي «الەۋمەتتىك مەديتسينالىق ساقتاندىرۋ قورى» جانە «جاستار باستامالارىن دامىتۋ ورتالىعىمەن» بىرگە ەمحانا اۋلاسىندا دارىگەرلەرمەن بىرگە جاستار تاڭعى جاتتىعۋ جاسادى.
– كەز كەلگەن ادام ءبىزدىڭ قاتارىمىزعا قوسىلا الادى. تاڭعى جاتتىعۋلارعا اپتا سايىن كەلىپ تۇرۋعا بولادى, – دەيدى دارىگەرلەر.
ال «الەۋمەتتىك مەديتسينالىق ساقتاندىرۋ قورىنىڭ» باس ساراپشىسى تاتيانا دۋبوۆيكتىڭ ايتۋىنشا, تاڭعى جاتتىعۋلارعا شاقىرۋ ارقىلى قوعامنىڭ نازارىن دارىگەرلىك-سكرينينگتىك تەكسەرۋگە اۋدارۋعا, اۋرۋ ەرتە انىقتالعان جاعدايدا ناۋقاستىڭ ءومىرى مەن ەڭبەككە قابىلەتتىلىگىن, ايەل ادامنىڭ بالا تۋ مۇمكىندىگىن ساقتاپ قالۋعا بولادى.
پاۆلودار
