1967 جىلى قازمۋ-ءدى ءتامامداپ, ءادىل دۇيسەنبەك ەكەۋمىز جۇمىسقا تۇرۋ ءۇشىن «سوتسياليستىك قازاقستان» گازەتىنە جولداما الدىق. ول كەزدە باس رەداكتور ۇزاق باعاەۆ, ءبىرىنشى ورىنباسارى بالعابەك قىدىربەك ۇلى بولاتىن. ورتالىق كوميتەتتىڭ گازەتى سانالاتىن «سق»-عا قويىلاتىن تالاپ كۇشتى, ۇجىم اراسىنداعى ءتارتىپ وتە قاتاڭ ەدى. ادەبي قىزمەتكەر بولعاننان كەيىن قازتاگ-تان تۇسەتىن ماتەريالداردى مەن باقىلاپ, قاداعالايتىنمىن. ۇزاق باعاەۆ «ەگەر «كازاحستانسكايا پراۆدادا» مەملەكەت باسشىلارى تۋرالى مالىمەت بەرىلىپ جاتسا, سەن ءتۇننىڭ ءبىر ۋاعى بولسا دا دەرەۋ مەنىمەن حابارلاس. اقىلداسقاننان كەيىن ونى ءبىز دە گازەتىمىزدىڭ ءبىرىنشى بەتىنە سالايىق», – دەپ ۇنەمى ەسكەرتىپ وتىراتىن.
ول كەزدەگى تالاپ سونداي بولدى. «كازاحستانسكايا پراۆدانىڭ» ءبىرىنشى بەتىندە جارىق كورگەن ماقالا «سوتسياليستىك قازاقستانعا» شىقپاي قالسا, ۇجىمنىڭ باسىنا قاتەر تونەتىن.
ول كەزدەرى تۇنگى كەزەكشىلىكتى ەكى ادام اتقاراتىن. كسرو-نى باسقارعان نيكيتا سەرگەەۆيچ حرۋششەۆ پەن لەونيد يليچ برەجنەۆتىڭ باياندامالارىنان ءبىر جول دا قىسقارتۋعا بولمايتىن. باسپاحانادا تۇندەلەتىپ, قاتتى شارشايتىنبىز. سول كەزدەرى تىڭكوز بولىپ جۇمىس ىستەگەن اسىلباەۆ, ءشارىپوۆا, دايراباەۆانىڭ ەڭبەكتەرىن ەرەكشە اتاپ وتۋگە بولادى.
كەي ۋاقىتتاردا تىڭكوز بولىپ, تاڭ اتقانشا كوررەكتورلاردان كەيىن بەتتەردى وقيتىنمىن. تالاي رەت ءبىر بەتتەگى 3-4 جولدى قورعاسىندى باسقا بەتتەرگە سالىپ, ورنىن اۋىستىرعان ۋاقىتتا باسپاحانانىڭ لينوتيپيستەرىن شاقىرتىپ, بەتتەردى تۇزەتىپ گازەتتى وسىلاي شىعارۋ مەنىڭ كەزەگىمدە ەكى-ءۇش رەت بولعان. ەگەر 3-4 جول قورعاسىندى ءار بەتتىڭ ءوز ورنىنا قويماي, گازەت شىعىپ كەتسە, جۇمىسىڭمەن قوشتاسا بەر.
تىڭداۋشى, تىڭكوز, كوررەكتور ماماندىقتارى ءارتۇرلى بولعانىمەن ءارقايسىنىڭ ءوزىنىڭ قيىنشىلىقتارى بولادى. سول قيىنشىلىقتاردى جەڭە بىلگەن ادام عانا جۋرناليستيكانىڭ ناعىز مامانى بولىپ قالىپتاسادى.
مەن وسى ءساتتى پايدالانا وتىرىپ, ءوزىمنىڭ قاراشاڭىراعىم – «Egemen Qazaqstan» گازەتىن عاسىر مەرەيتويىمەن قۇتتىقتاپ, ۇجىمعا زور دەنساۋلىق جانە شىعارماشىلىق تابىس تىلەيمىن.
عالىم قۇراش
