كەلىسسوزدەردىڭ كەزەكتى راۋندى سيريا باعىتىندا ەڭ وزەكتى ماسەلەلەردى, سونىڭ
ىشىندە يدليب پروۆينتسياسى مەن سيريانىڭ سولتۇستىك-شىعىسىنداعى قازىرگى احۋالدى,
قاقتىعىسۋشى تاراپتار اراسىنداعى سەنىمدى ودان ءارى نىعايتۋعا باعىتتالعان
شارالاردى, سونداي-اق بوسقىندار مەن ەل ىشىندەگى قونىس اۋدارعان ادامداردى
قايتارۋعا قولعابىس كورسەتۋ, گۋمانيتارلىق جاعدايدى جاقسارتۋ جانە ەلدى
قاقتىعىستان كەيىنگى قايتا قالپىنا كەلتىرۋ ماسەلەلەرىن تالقىلاۋدى جوسپارلاپ
وتىر. سونىمەن قاتار, الدىن الا كۇن تارتىبىنە سايكەس, سيريا بويىنشا
كونستيتۋتسيالىق كوميسسيانى قۇرۋ جانە ىسكە قوسۋ بويىنشا جۇمىستى اياقتاۋعا باسا
نازار اۋدارا وتىرىپ, ساياسي پروتسەستى ودان ءارى ىلگەرلەتۋ جولدارىن تالقىلاۋ,
سونداي-اق استانا پروتسەسىنە جاڭا باقىلاۋشى مەملەكەتتەردىڭ قوسىلۋ ماسەلەسى
قاراستىرىلادى.
25 ساۋىردە استانا پروتسەسىنىڭ كەپىلگەر ەلدەرىنىڭ ەكىجاقتى جانە
ۇشجاقتى كونسۋلتاتسيالارى, سونداي-اق بايقاۋشى تاراپتارىنىڭ وكىلدەرىمەن
كەزدەسۋلەرى, ال جالپى وتىرىس 26 ساۋىردە وتەدى.
سونىمەن بىرگە, سيريا بويىنشا جوعارى دەڭگەيدەگى 12-ءشى
حالىقارالىق كەزدەسۋ شەڭبەرىندە تۇتقىنداردى بوساتۋ, قازا تاپقانداردىڭ دەنەلەرىن
تابىستاۋ جانە ءىز-ءتۇزسىز جوعالعانداردى ىزدەستىرۋ بويىنشا جۇمىس توبىنىڭ 8-ءشى
وتىرىسىن وتكىزۋ جوسپارلانىپ وتىرعانىن ەسكەرە وتىرىپ, اتالعان وتىرىسقا قاتىسۋ
ءۇشىن بۇۇ بوسقىندار ىستەرى جونىندەگى جوعارعى كوميسسار باسقارماسىنىڭ جانە
حالىقارالىق قىزىل كرەست كوميتەتىنىڭ وكىلدەرىنە ءتيىستى شاقىرۋلار جولدانادى.
