«رەسپۋبليكالىق بيۋدجەت شىعىستارى 2 705 ملرد تەڭگەنى قۇرادى. وتكەن جىلدىڭ وسىنداي كەزەڭىمەن سالىستىرعاندا ءوسۋ قارقىنى 119,4%-ءتى, ياعني 440 ملرد تەڭگەنى قۇرادى. اتقارىلعان قاراجاتتىڭ 47% الەۋمەتتىك سالاعا باعىتتالدى. سونىمەن بىرگە بيۋدجەت قاراجاتى 28 ملرد تەڭگەگە اتقارىلمادى. ونىڭ 7 ملرد تەڭگەسى ۇنەمدەۋ بولادى. ال, يگەرىلمەۋ سوماسى 21 ملرد تەڭگەنى قۇرادى. بۇل 2018 جىلدىڭ 1 ساۋىرىندەگى كورسەتكىشتەن (89 ملرد تەڭگە) 4 ەسە از», دەدى ۆەدومستۆو باسشىسى.
ءمينيستردىڭ كەلتىرگەن دەرەكتەرىنە سۇيەنسەك, يگەرىلمەگەن سومانىڭ ەڭ كوبى ادىلەت مينيسترلىگىنە تيەسىلى. اتالعان ۆەدومستۆو 3,4 ميلليارد تەڭگەنى يگەرمەگەن. بۇدان بولەك, ىشكى ىستەر مينيسترلىگى – 2,2 ملرد تەڭگە, مادەنيەت جانە سپورت مينيسترلىگى – 2,2 ملرد تەڭگە, جوعارعى سوت – 1,8 ملرد تەنگە, يندۋستريا جانە ينفراقۇرىلىمدىق دامۋ مينيسترلىگى – 1,6 ملرد تەڭگە, ۇلتتىق ەكونوميكا مينيسترلىگى – 1,5 ملرد تەڭگەنى يگەرمەگەن. ال جەرگىلىكتى بيۋدجەتتەردىڭ شىعىستارى 945 ملرد تەڭگەگە يگەرىلدى. 12 ملرد تەڭگە ورىندالماعان. بۇل كورسەتكىش بىلتىرعى جىلدىڭ وسىنداي كەزەڭىمەن سالىستىرعاندا 60%-كە جاقساردى (2018 جىلدىڭ 1 ءساۋىرى – 20 ملرد تەڭگە).
«رەسپۋبليكالىق بيۋدجەتتەن وڭىرلەرگە 1 112 ملرد تەڭگە نىسانالى ترانسفەرتتەردىڭ قاراستىرىلعان. 1 توقساندا ولارعا 171 ملرد تەڭگە ءبولىندى. ونىڭ 96,8%-ءى يگەرىلدى نەمەسە 165 ملرد تەڭگە. 4,7 ملرد تەڭگە يگەرىلمەدى. نەگىزگى سەبەپتەرى: كونكۋرستاردىڭ ۋاقىتىندا وتكىزىلمەۋى, كەلىسىم-شارتتارعا قول قويىلماۋ, سونىڭ سالدارىنان ولاردى قازىناشىلىق ورگاندارىندا تىركەمەۋ, جۇمىس كەستەسىنەن كەيىن قالۋ», دەدى ءا. سمايىلوۆ ءوز بايانداماسىندا.
سونداي-اق مينيستر 2018 جىلى ءبىز مەملەكەتتىك ساتىپ الۋدىڭ پروتسەدۋرالارىن جەتىلدىرىلگەنىنە توقتالدى. «ونىڭ بارلىق پروتسەسستەرى ەلەكتروندى فورماتقا كوشىرىلدى. بىراق شىعىستاردىڭ يگەرىلمەۋ سەبەپتەرى مەملەكەتتىك باسقارۋدىڭ بارلىق دەڭگەيلەرىندە الىدە بولسا وسى كونكۋرستاردىڭ ۋاقىتىلى وتكىزبەۋىنە, ولاردىڭ وتپەي قالۋىنا بايلانىستى بولىپ وتىر. بۇل جاعداي مەملەكەتتىك ورگانداردا مەملەكەتتىك ساتىپ الۋ جۇمىسىنىڭ دۇرىس ۇيىمداستىرىلماعانىن كورسەتەدى», دەدى ول.
