قازاقستان پرەزيدەنتى قاسىم-جومارت توقاەۆ سالتاناتتى راسىمدە سويلەگەن ءسوزىندە وزبەكستان رەسپۋبليكاسىنىڭ پرەزيدەنتى شاۆكات ميرزيوەۆكە جانە وزبەك حالقىنا جىلى قارسى الىپ, قوناقجايلىلىق كورسەتكەنى ءۇشىن ريزاشىلىعىن ءبىلدىردى.
– ءبىزدى ءتىلىمىزدىڭ بىرلىگى, ءدىنىمىز, ورتاق تاريحىمىز بەن ءبىرتۇتاس تاعدىرىمىز بىرىكتىرەدى. حالىقتارىمىز – ورتالىق ازياداعى ەجەلگى ءارى ۇلى وركەنيەتتىڭ مۇراگەرى. ءبىز ءداستۇرىمىزدى, بابالارىمىزدىڭ قۇندىلىقتارى مەن مادەني-تاريحي مۇرالارىن ساقتاپ قالدىق. سونىمەن قاتار كوپتەگەن قيىن سىناقتاردى باستان وتكەردىك, – دەدى مەملەكەت باسشىسى.
قاسىم-جومارت توقاەۆ قازاقستان مەن وزبەكستان اراسىنداعى ستراتەگيالىق ارىپتەستىك پەن جەمىستى ىنتىماقتاستىقتىڭ قازىرگى كەزەڭدەگى جوعارى دەڭگەيگە كوتەرىلگەن تاريحي دوستىقتىڭ قيسىندى جالعاسى ەكەنىن ايتتى.
– شەكارا ماڭىنداعى ىنتىماقتاستىق نىعايىپ, تاۋار اينالىمى ءوسىپ كەلەدى. بۇگىندە قازاقستان-وزبەكستان قارىم-قاتىناستارىندا شەشىلمەگەن ەشقانداي ماسەلە جوق ەكەنىن ناقتى ايتا الامىن. قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ پەن قۇرمەتتى پرەزيدەنت شاۆكات ميرزيوەۆتىڭ ارقاسىندا قازاق-وزبەك قاتىناستارى جوعارى دەڭگەيگە كوتەرىلدى, – دەدى قازاقستان پرەزيدەنتى.
مەملەكەت باسشىسى ۇلى ابايدىڭ قازاقتارعا باۋىرلاس وزبەك حالقىنىڭ ەڭبەكقورلىعىن, قايىرىمدى ىستەرى مەن قاراپايىمدىلىعىن ۇلگى ەتىپ, ۇيرەنۋگە شاقىرعانىن ايتىپ, وزبەكستان باسشىلىعىنا قازاق مادەنيەتىن قولداعانى ءۇشىن ريزاشىلىعىن ءبىلدىردى.
– پرەزيدەنت شاۆكات ميرزيوەۆتىڭ «قازاقتىڭ ۇلى اقىنى ءھام ويشىلى اباي قۇنانباەۆتىڭ شىعارماشىلىق مۇراسىن كەڭىنەن وقۋ مەن ناسيحاتتاۋ تۋرالى» قاۋلىسى اياسىندا اتقارىلعان اۋقىمدى شارالار ءۇشىن ريزاشىلىعىمدى بىلدىرەمىن, – دەدى قاسىم-جومارت توقاەۆ.
مەملەكەت باسشىسى قازاقستانداعى وزبەك دياسپوراسىن قولداۋ شارالارىنا جەكە توقتالدى.
– ءبىز ءوز ەلىمىزدە ءومىر ءسۇرىپ جاتقان وزبەك حالقىنىڭ رۋحاني, الەۋمەتتىك قاجەتتىلىكتەرىن تولىق قاناعاتتاندىرۋ ءۇشىن جان-جاقتى شارالار جاساپ جاتىرمىز. قازاقستاننىڭ بارلىق دەرلىك وڭىرىندە وزبەك ەتنومادەني بىرلەستىكتەرى اشىلعان. وزبەك ءتىلى قازاقستاننىڭ مەديا سالاسىندا, ءبىلىم جۇيەسىندە جانە مادەني ومىرىندە ورنىن العان. ەكى وزبەك تەاترى تابىستى جۇمىس ىستەۋدە, – دەدى قاسىم-جومارت توقاەۆ.
قاسىم-جومارت توقاەۆ بىرلەسكەن 200-دەن استام شارانى قامتىعان ءوزبەكستاننىڭ قازاقستانداعى جىلى ەكىجاقتى بايلانىستىڭ نىعايۋىنا ىقپال ەتكەنىن اتاپ ءوتىپ, شىمكەنتتە وتكەن العاشقى وڭىرارالىق فورۋمعا ەرەكشە توقتالدى.
– ەكىجاقتى تاۋار اينالىمىن 5 ميلليارد دوللارعا جەتكىزۋ تۋرالى ماقساتىمىزعا بىرتىندەپ جاقىنداپ كەلەمىز. كولىك قاتىناستارىنىڭ قارقىنىن ارتتىرۋ بويىنشا جۇمىستار جۇرگىزىلۋدە. ءبىزدىڭ ەلدەرىمىزدىڭ كولىك-لوگيستيكالىق ينفراقۇرىلىمدارىنىڭ دامۋى ەۋروپا مەن ازيا نارىقتارىنا شىعۋعا مۇمكىندىكتەر اشادى, – دەدى قازاقستان پرەزيدەنتى.
مەملەكەت باسشىسى قازاقستاننىڭ وزبەكستانداعى جىلى ەكى ەل قارىم-قاتىناسى ءۇشىن عانا ەمەس, تۇتاس ورتالىق ازيادا ءوزارا تۇسىنىستىك جانە سەنىم اۋانىنىڭ قالىپتاسۋى ءۇشىن ماڭىزى بار ايتۋلى وقيعا ەكەنىن اتاپ ءوتتى.
– ورتالىق ازيانىڭ تابىستى ەكونوميكالىق دامۋى, تۇراقتىلىعى مەن قاۋىپسىزدىگى, نەگىزىنەن, قازاقستان مەن وزبەكستاننىڭ تىعىز ىقپالداستىعى مەن كەلىسىلگەن ءىس-ارەكەتتەرىنە بايلانىستى. شۇعىل تۇردە تۇركى دۇنيەسىنىڭ عانا ەمەس, الەمدىك مادەنيەتتىڭ ماقتانىشىنا اينالعان ءبىزدىڭ ەلدەرىمىزدىڭ باستى رۋحاني جانە تاريحي ورتالىقتارىن ءبىر-بىرىمەن بايلانىستىراتىن تۇركىستان, سامارقاند, بۇحارانى ءبىر باعىتقا قوساتىن تۋريستىك كلاستەر اشۋدى ۇسىنامىن, – دەدى مەملەكەت باسشىسى.
قازاقستان پرەزيدەنتى ءسوزىنىڭ سوڭىندا اتا-بابالارىمىز مۇرا ەتىپ قالدىرعان قازاق-وزبەك حالىقتارىنىڭ دوستىعى مەن بىرلىگىن ساقتاۋ قازىرگى ۇرپاقتىڭ ورتاق پارىزى ەكەنىن اتاپ ءوتىپ, قازاقستاننىڭ وزبەكستانداعى جىلىن اشىق دەپ جاريالادى.
سالتاناتتى ءراسىم الىبەك دىنىشەۆ, ايمان مۇساقوجاەۆا, مەدەت شوتاباەۆ, نۇرلان بەكمۇحامبەتوۆ, ديماش قۇدايبەرگەن, ماريا مۋدرياك سىندى قازاقستان ونەرىنىڭ قايراتكەرلەرى مەن ساحنا شەبەرلەرى, شىعارماشىلىق ۇجىمدارىنىڭ قاتىسۋىمەن وتكەن گالا-كونتسەرتپەن قورىتىندىلاندى.
