«ەلوردادا 304 سايلاۋ ۋچاسكەسى تىركەلگەن. ونىڭ 239-ى قالا ىشىندە. 65-ءى شەتەلدەردەگى وكىلدىكتەردە, ەلشىلىكتەر مەن كونسۋلدىقتاردا. شەتەلدەگى سايلاۋ ۋچاسكەلەرىمەن سىرتقى ىستەر ءمينيسترى اينالىسادى. جالپى, ءبىزدىڭ ەسەبىمىز بويىنشا نۇر-سۇلتاندا 600 مىڭعا جۋىق داۋىس بەرۋشى بولادى. بىراق, بۇل ناقتى سان ەمەس. سايلاۋ كۇنى قارساڭىندا ناقتى قانشا ەلوردالىقتىڭ داۋىس بەرە الاتىنى جايلى قوسىمشا اقپارات بەرەمىز», دەيدى نۇر-سۇلتان قالاسى اكىمى اپپاراتى باسشىسىنىڭ ورىنباسارى ازامات احمەدجانوۆ.
بۇل تۋرالى ول قر پرەزيدەنتىنىڭ كەزەكتەن تىس سايلاۋىن ۇيىمداستىرۋ جانە ەلوردانىڭ سايلاۋ ۋچاسكەلەرىندە ازاماتتاردى تىركەۋدى وتكىزۋ ماسەلەلەرى جونىندەگى قالالىق اكىمدىكتە وتكەن بريفينگتە ايتتى.
ونىڭ ايتۋىنشا, شەتەلدەردە قازاقستاننىڭ ديپلوماتيالىق ەلشىلىكتەرى مەن وكىلدىكتەرى بار. ياعني, شەتەلدە جۇرگەن ەلوردالىقتار نەمەسە قازاقستاندىقتار سول وكىلدىكتەر ارقىلى پرەزيدەنت سايلاۋىندا داۋىس بەرۋگە قاتىسا الادى.
سايلاۋشىلاردىڭ ءتىزىمىن ناقتىلاۋ جانە وزەكتەندىرۋ ماقساتىندا نۇر-سۇلتان قالاسىنىڭ اكىمدىگى ءبىرشاما جولداردى قاراستىرىپ وتىر.
اتاپ ايتقاندا, سايلاۋشى ءوزىنىڭ سايلاۋ ۋچاسكەسى تۋرالى مالىمەتتەردى ءبىلۋ ءۇشىن IKomek بىرىڭعاي بايلانىس ورتالىعىنىڭ 109 تەلەفونىنا حابارلاسا الادى (24/7 رەجىمىندە). سول سەكىلدى Smart Astana موبيلدىك قوسىمشاسى ارقىلى دا ءوزىڭىزدىڭ سايلاۋ ۋچاسكەڭىز قايدا ەكەنىن بىلە الاسىز. سول سەكىلدى, اقپارات الۋ ءۇشىن Telegram الەۋمەتتىك جەلىسىندەگى @smartastana_bot چات-بوتىنا تىركەلۋگە بولادى. بۇل قىزمەتتەر بۇگىننەن باستاپ جۇمىسىن باستايدى.
«18 ساۋىردەن باستاپ مەكەنجاي دەرەكتەرىن (كوشەسى, ءۇيى) ەنگىزۋ ارقىلى قالانىڭ ەلەكتروندىق كارتاسىندا سايلاۋ ۋچاسكەلەرىن كورۋگە بولاتىن maps.astana.kz گەوپورتالىنان اقپارات الۋعا بولادى. ال 24 ساۋىردەن باستاپ Whatsapp messenger جانە Instagram الەۋمەتتىك جەلىسىندە قىزمەتتەر ىسكە قوسىلادى. ازاماتتى ناقتى سايلاۋ ۋچاسكەسىندە سايلاۋشىلار تىزىمىنە ەنگىزۋ ءۇشىن ونىڭ وسى سايلاۋ ۋچاسكەسىنىڭ اۋماعىنداعى تۇرعىلىقتى جەرى بويىنشا تىركەلۋ فاكتىسى نەگىز بولىپ تابىلادى. مەكەنجايلىق اقپاراتتى تىركەۋ, تۇزەتۋ جانە تەكسەرۋ ءۇشىن egov.kz ەلەكتروندىق ۇكىمەت پورتالىنا, «ازاماتتىق, ميگراتسيا جانە يمميگراتسيا», «حالىقتى تىركەۋ جانە تىركەۋ ەسەبىنەن الىپ تاستاۋ» بولىمىنە نەمەسە «ازاماتتارعا ارنالعان ۇكىمەت» مەملەكەتتىك كورپوراتسياسىنا حابارلاسۋعا بولادى», دەيدى ازامات احمەدجانوۆ.
