تاراپتار ەكىجاقتى قارىم-قاتىناستى, سونىڭ ىشىندە, پارلامەنتارالىق ىنتىماقتاستىقتى نىعايتۋدىڭ وزەكتى ماسەلەلەرىن تالقىلادى.
ن. نىعماتۋليننىڭ پىكىرىنشە, امەريكا ەلىمەن جان-جاقتى ءارى ءوزارا ءتيىمدى قاتىناستى نىعايتۋ ءبىزدىڭ ەلىمىزدىڭ سىرتقى ساياساتىنىڭ ماڭىزدى باعىتتارىنىڭ ءبىرى. اعىمداعى جىلى قوس مەملەكەت اراسىندا ديپلوماتيالىق قاتىناستىڭ ورناعانىنا 28 جىل تولادى. وسى ۋاقىتتار ىشىندە, سەنىمدى ساياسي ديالوگ ورناپ, ەكىجاقتى بايلانىس كەڭەيتىلگەن ستراتەگيالىق ارىپتەستىك دەڭگەيىنە جەتتى.
پالاتا توراعاسى اتاپ وتكەندەي, 2018 جىلى قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ اقش-قا رەسمي ساپارى ءبىزدىڭ ەلدەرىمىز اراسىنداعى ىقپالداستىقتىڭ ايرىقشا سيپاتىن كورسەتتى.
ساۋدا-ەكونوميكالىق سالانى ءسوز ەتكەندە, ن. نىعماتۋلين ەكىجاقتى تاۋار اينالىمى 2018 جىلى 2,25 ملرد. دوللارعا جەتكەنىن, وتكەن جىلمەن سالىستىرعاندا 37 پايىزعا وسكەنىن العا تارتتى.
ءماجىلىس توراعاسىنىڭ ايتۋىنشا, ەكى مەملەكەتتىڭ ينۆەستيتسيالىق ىنتىماقتاستىعىندا قارجى سەكتورى, كولىك, كوممۋنيكاتسيا, تاۋ-كەن ءوندىرىسى, فارماتسەۆتيكا سالالارى باسىم باعىتتارعا يە.
ءماجىلىس سپيكەرى ەلدەرىمىز اراسىنداعى پارلامەنتارالىق ءوزارا ءىس-قيمىلدى تەرەڭدەتۋدىڭ ماڭىزدىلىعىن ايتتى.
ماجىلىستە اقش-پەن ىنتىماقتاستىق جونىندەگى توپ جۇمىس ىستەيدى. امەريكادا قۇرىلعان «قازاقستان دوستارى توبىمەن دە» بەلسەندى ارىپتەستىك بار. ن. نىعماتۋلين زاڭنامالىق تاجىريبەنى مەڭگەرۋ جانە ەتەنە بايلانىس ورنتاۋ ماقساتىندا اتالعان توپتار مەن بەيىندى كوميتەتتەر دەڭگەيىندە ساپارلار الماسۋ پراتيكاسىن ەنگىزۋدىڭ قاجەتتىلىگىنە توقتالدى.
سونداي-اق, ءماجىلىس سپيكەرى اقش كونگرەسى قارجىلاندىراتىن «اشىق الەم» باعدارلاماسىنىڭ دا دەپۋتاتتار مەن اپپارات قىزمەتكەرلەرى ءۇشىن قۇقىقتىق جانە كاسىبي تاجىريبە الماسۋدىڭ ەرەكشە مۇمكىندىگى ەكەنىن اتاپ ءوتتى.
تاراپتار بىرلەسكەن سىندارلى جۇمىس - پارلامەنتارالىق بايلانىستاردى, سونىمەن بىرگە, ەكىجاقتى قاتىناستاردى نىعايتۋعا كەڭ جول اشاتىنىنا سەنىمدى.
