رەسمي قارسى الۋ راسىمىنەن كەيىن مەملەكەتتەر باسشىلارى شاعىن قۇرامدا كەلىسسوزدەر جۇرگىزدى. مەملەكەت باسشىسى جىلى قارسى الىپ, قوناقجايلىق كورسەتكەنى ءۇشىن شاۆكات ميرزيوەۆكە ريزاشىلىق ءبىلدىرىپ, وسى مەملەكەتتىك ساپاردىڭ ماڭىزدىلىعىن اتاپ ءوتتى.
– تۇڭعىش پرەزيدەنتىمىز – ەلباسى نۇرسۇلتان ءابىش ۇلى نازارباەۆ مىقتى ءارى ۇيلەسىمدى ەكىجاقتى قاتىناستاردى قالىپتاستىرۋعا زور ۇلەس قوستى. سىزدەر دە ەكى مەملەكەتتىڭ كوشباسشىلارى رەتىندە قازاقستان مەن وزبەكستان ارىسىنداعى ىنتىماقتاستىقتى بيىك دەڭگەيگە كوتەردىڭىزدەر, – دەدى قاسىم-جومارت توقاەۆ.
مەملەكەت باسشىسى ەكىجاقتى ىنتىماقتاستىقتىڭ ساپاسى مەن ىقپالداستىقتىڭ مازمۇنىنا جوعارى باعا بەردى, سونداي-اق, كەلىسسوزدەردىڭ كۇن تارتىبىندە تۇرعان بارلىق ماسەلە بويىنشا جەمىستى پىكىر الماساتىنىن ايتتى.
– مەنىڭ مىندەتىم بايلانىستارىمىزدىڭ ساباقتاستىعى مەن جوعارى قارقىنىن ساقتاۋ دەپ ويلايمىن. مەن دە ءوز تاراپىمنان قازاق-وزبەك ىنتىماقتاستىعىنىڭ ەش كەدەرگىسىز وركەندەپ, دامۋىنا بارلىق مۇمكىندىكتى جاسايمىن. كەشە ساياسي, تاريحي, مادەني, گۋمانيتارلىق سياقتى بىرقاتار ماسەلەگە قاتىستى الدىن الا پىكىر الماستىق جانە تاريحي تۇرعىدان حالىقتارىمىزعا ورتاق كوپ دۇنيە بار دەگەن تۇسىنىككە كەلدىك. ءبىزدى ورتاق تاريحي تاعدىرىمىز, تۋىستاس ءتىلىمىز, ءدىنىمىز بەن مادەني قۇندىلىقتارىمىز بىرىكتىرەدى, – دەدى قازاقستان پرەزيدەنتى.
سونىمەن قاتار, قاسىم-جومارت توقاەۆ شاۆكات ميرزيوەۆكە وزبەكستانداعى قازاقستان جىلىن وتكىزۋگە مۇمكىندىك تۋعىزعانى ءۇشىن العىس ايتىپ, بۇل شارانىڭ ەكى مەملەكەت حالقىن جاقىنداستىرۋ تۇرعىسىنان العاندا اسا ماڭىزدى ەكەنىن اتاپ ءوتتى.
شاۆكات ميرزيوەۆ قاسىم-جومارت توقاەۆتى قازاقستان پرەزيدەنتى قىزمەتىنە كىرىسۋىمەن قۇتتىقتاپ, وزبەكستان رەسپۋبليكاسىنا مەملەكەتتىك ساپارمەن كەلگەنى ءۇشىن ريزاشىلىق ءبىلدىردى.
– قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ ءرولىن ەرەكشە اتاپ وتكىم كەلەدى. سول كىسىنىڭ ارقاسىندا ءوزارا قارىم-قاتىناستارىمىزدىڭ جوعارى دەڭگەيگە كوتەرىلۋىنە قول جەتكىزدىك. ءسىز دە مينيستر, پرەمەر-مينيستر, سەنات توراعاسى قىزمەتتەرىن اتقارعان كەزىڭىزدە ەكى ەل بايلانىستارىن جاقسارتۋعا سەپتىگىڭىزدى تيگىزدىڭىز, – دەدى شاۆكات ميرزيوەۆ.
سونىمەن قاتار, وزبەكستان رەسپۋبليكاسىنىڭ باسشىسى قازاقستاندىق تاراپقا ەكىجاقتى بايلانىستاردىڭ نىعايۋىنا تىڭ سەرپىن بەرگەن قازاقستانداعى وزبەكستان جىلىن تابىستى وتكىزگەنى ءۇشىن ريزاشىلىق ءبىلدىرىپ, اتاپ ءوتتى.
جوعارى دارەجەدە وتكەن كەلىسسوزدەر بارىسىندا مەملەكەتتەر باسشىلارى وڭىرلىك جانە حالىقارالىق كۇن تارتىبىندەگى ەكىجاقتى ىنتىماقتاستىقتىڭ وزەكتى ماسەلەلەرىن تالقىلادى.
