KFW قوناقتارى قاتارىنان ءۇش كۇن, ياعني, 17-19 ءساۋىر ارالىعىندا مازمۇندى باعدارلاماعا اياسىندا, جاڭا ەسىمدەرمەن, جارقىراعان كيىم ۇلگىلەرىمەن تانىسا الادى.
ەلدەگى باس فەشن-وقيعانىڭ كوڭىل اۋدارار تۇسى – «استانا بالەت» تەاترىنىڭ تارتۋى. تەاتر ارتىستەرى جينالعان قاۋىمدى اسەمدىك پەن قيال الەمىنە جەتەلەپ, ءسان اپتالىعىنىڭ ءسانىن ارتتىرا تۇسپەك. ءۇش كۇن بويى ديزاينەرلىك كوللەكتسيالاردى تاماشالاماس بۇرىن, جينالعان مەيماندارعا تەاتر رەپەرتۋارىنداعى عاجايىپ حورەوگرافيالىق كومپوزيتسيالار كورسەتىلەدى. رومانتيكالى اتموسفەرا – بالەت ونەرىنىڭ حاس سۇلۋلىعى مەن سىمباتىن تانۋعا جول اشادى.
العاش رەت قازاقستاندىق ءسان اپتالىعىن اشۋ قۇرمەتى كاسىبي سانقويلارمەن قاتار, استانالىق تەاتر پريمالارىنا دا بۇيىرىپ وتىر. «استانا بالەت» تەاترىنىڭ جەتەكشى سوليستەرى ريزا قاناتقىزى مەن ايجان مۇقاتوۆا ءسان اپتالىعىنىڭ اشىلۋى مەن جابىلۋىندا Aida Kaumenova, Alex Chzhen, Naiyl Baikuchukov, Yerlan Zholdasbek, Keti Chkhikvadze, Tamara Lamanukaeva سىندى الەمدىك جانە وتاندىق ديزاينەرلەردىڭ كوكتەمگى ءسان ۇلگىلەرىن KFW مىنبەرىندە كورسەتپەك. KFW-2019 بارىسىندا, سونداي-اق, Tiko & Dinara Satzhan, Lariya, Bibisara, Di Siitova, Kiori, Zeken Moda جانە Aya Bapani سەكىلدى بىرەگەي برەند ونىمدەرىمەن دە تانىسۋعا بولادى.
وعان قوسا, Kazakhstan Fashion Week – 2019 باس قوناعى ءارى حەدلاينەرى قازاقستاندىق-امەريكالىق سانقوي, نيۋ-يوركتە تۇراتىن اليونا سۋببوتينا «استانا بالەت» تەاترىندا بىرەگەي شەبەرلىك-سىنىبىن وتكىزەدى.
قازاقستاننىڭ ءىرى بايەرى, ءسان ساراپشىسى ليليا راح, رەسەيلىك توپ-ستيليستەر وكسانا ون مەن گالا بورزوۆا دا اپتالىق اياسىندا بىرەگەي دارىستەرىن وقىپ, شەبەرلىك-سىنىپتارىن جوسپارلاپ قويعان. ولار ستيل سىرىن اشىپ, الەمدىك ءسان نەنى ترەند سانايتىنىمەن بولىسپەك. ال, قازاقستاندىق ديزاينەرلەر نايل بايكۇشىكوۆ پەن ايدا كاۋمەنوۆا «استانا بالەت» تەاترىنىڭ وندىرىستىك تسەحتارى ءۇشىن ارنايى شەبەرلىك-سىنىپتارىن وتكىزەدى.
