وبلىستىق توتەنشە جاعدايلار دەپارتامەنتىنىڭ باستىعى باۋىرجان سىزدىقوۆتىڭ حابارلاۋىنشا ءورت 9 قاباتتى №73 ءۇيدىڭ بالكونىنان شىققان. ءورت ءسوندىرۋ جۇمىسىنا تجد-ءنىڭ 29 قىزمەتكەرى مەن 8 تەحنيكا تارتىلدى. ورتتەن ءۇيدىڭ تۇرعىندارى زارداپ شەككەن جوق. جالپى اۋماعى 6 شارشى مەتردى قۇراعان ءورت ورنىنان 50 ادام ەۆاكۋاتسيالاندى.
ءورت بولعان جەرگە ارنايى كەلىپ تۇرعىندارمەن كەزدەسكەن و.ورازالين تۇستەن كەيىن بارلىق جاۋاپتى مەملەكەتتىك ورگانداردى جيناپ, ارنايى تاپسىرمالار بەردى.
«بۇل ەكىنشى رەت قايتالانىپ وتىرعان توتەنشە جاعداي. وسى جايت تۇرعىندار تاراپىنان نارازىلىق تۋدىرىپ وتىر. الداعى ۋاقىتتا مۇنداي جاعدايلاردى بولدىرماۋ ماقساتىندا جان جاقتى جۇمىس جۇرگىزۋىمىز قاجەت. قۋانىشىمىزعا وراي, ءورت ءسوندىرۋ قىزمەتىنىڭ شۇعىل كەلۋىنىڭ ارقاسىندا ادام شىعىنى بولعان جوق. ەندىگى مىندەت - قالا تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا قالا اكىمدىگى وسىنداي ءورت تۋدىراتىن قاپتاۋلارى بار بارلىق تۇرعىن ۇيلەردى انىقتاپ, ەسەپكە الۋى ءتيىس» - دەدى وبلىس اكىمى جاۋاپتى ماماندارعا تاپسىرما بەرىپ.
ايتا كەتەيىك, ءورت شىققان ۇيگە ءورت سوندىرۋشىلەر 4 مينۋتتا جەتكەن. تجد قىزمەتىنىڭ العاشقى زەرتتەۋ جۇمىستارىنىڭ قورىتىندىسى بويىنشا ءورتتىڭ شىعۋ سەبەبى وشپەي قالعان تەمەكى نەمەسە سىرىڭكەنىڭ 2013 جىلى قاپتالعان ءۇيدىڭ سىرتقى دەكوراتيۆتى قاپتاۋلارىنا تيۋىنەن تۋىنداۋى مۇمكىن.
