قازاقستاننىڭ تۇڭعىش پرەزيدەنتى – ەلباسى «Nur Otan» پارتياسىنىڭ ورتالىق اپپاراتىنا بارىپ, ونىڭ قازىرگى جۇمىسىمەن تانىستى جانە قۇرىلىمدىق بولىمشەلەر جەتەكشىلەرىنىڭ قاتىسۋىمەن كەڭەس وتكىزدى.
ەلباسى نۇرسۇلتان نازارباەۆ ەلىمىزدە بولعان سوڭعى ساياسي وقيعالارعا بايلانىستى پارتيانىڭ الدىندا ستراتەگيالىق ماڭىزى بار بىرقاتار مىندەت تۇرعانىن ايتتى.
– ءبىز جاقىندا «Nur Otan» پارتياسىنىڭ سەزىن وتكىزىپ, ونىڭ 20 جىلدىق مەرەيتويىن اتاپ وتتىك. پارتيانىڭ جاڭا ماقسات-مىندەتتەرى ايقىندالدى. ەلىمىزدە بولعان وقيعالار بارشا جۇرتقا بەلگىلى. مەن پارتيانىڭ, قاۋىپسىزدىك كەڭەسىنىڭ جانە قازاقستان حالقى اسسامبلەياسىنىڭ توراعاسى بولىپ قالا بەرەمىن, – دەدى قازاقستاننىڭ تۇڭعىش پرەزيدەنتى.
نۇرسۇلتان نازارباەۆ بەلسەندى ءارى ناتيجەلى جۇمىستىڭ ارقاسىندا «Nur Otan» پارتياسى ەلىمىزدىڭ باستى ساياسي كۇشىنە اينالعانىن اتاپ ءوتتى.
– رەفورمالار, دامۋ, ازاماتتىق قوعام – پارتيانىڭ جۇمىلدىرۋشى نەگىزى. قوعامنىڭ تۇراقتىلىعى, حالىقتىڭ بىرلىگى مەن كەلىسىمى ءوسىپ-وركەندەۋىمىزدىڭ باستى باسىمدىقتارىنا اينالدى. ازاماتتارىمىزدىڭ لايىقتى ءومىر ءسۇرۋ دەڭگەيىن قامتاماسىز ەتۋ جانە قازاقستاندى الەۋمەتتىك مەملەكەت رەتىندە دامىتۋ ماسەلەسى باسىم باعىتىمىز بولىپ قالا بەرەدى, – دەدى «Nur Otan» پارتياسىنىڭ توراعاسى.
قازاقستاننىڭ تۇڭعىش پرەزيدەنتى تۇرعىندار ءۇشىن جاڭا جۇمىس ورىندارىن اشۋدىڭ ماڭىزدىلىعىن اتاپ ءوتىپ, الەۋمەتتىك ماسىلدىققا جول بەرمەۋ قاجەتتىگىنە باسا ءمان بەردى.
نۇرسۇلتان نازارباەۆ قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنىڭ وتۋىنە بايلانىستى «Nur Otan» پارتياسى الداعى سايلاۋ ناۋقانىنا بەلسەندى قاتىسۋعا ءتيىس ەكەنىن ايتتى.
– كەشە قاسىم-جومارت توقاەۆ ءوزىنىڭ زاڭدى قۇقىعىن پايدالانىپ, قازاقستان پرەزيدەنتىنىڭ كەزەكتەن تىس سايلاۋىن وتكىزۋ تۋرالى جارلىققا قول قويدى. بۇل سايلاۋ بيلىكتىڭ زاڭدىلىعىن ودان ءارى نىعايتىپ, ەلىمىزدە تۇراقتىلىقتى قامتاماسىز ەتۋ ءۇشىن قاجەت. ەندى بىزگە پارتيانىڭ سەزىن وتكىزىپ, ەل پرەزيدەنتتىگىنە كانديداتۋرا ۇسىنۋىمىز كەرەك. پارتيانىڭ اپپاراتى سەزدى وتكىزۋ ءۇشىن قاجەتتى جۇمىستاردىڭ ءبارىن جىلدام ىسكە اسىرۋعا ءتيىس. پارتيامىزدىڭ اتىنان كانديداتۋرا ۇسىنعاننان كەيىن قوعامدىق سايلاۋ شتابىنىڭ جۇمىسىن ۇيىمداستىرۋ قاجەت. بۇل جۇمىسپەن مەنىڭ ءبىرىنشى ورىنباسارىم ماۋلەن اشىمباەۆ اينالىسادى, – دەدى قازاقستاننىڭ تۇڭعىش پرەزيدەنتى.
سونىمەن قاتار, نۇرسۇلتان نازارباەۆ سايلاۋدى تولىعىمەن ەل زاڭناماسىنا سايكەس جانە بارلىق دەموكراتيالىق نورمالار مەن راسىمدەردى ساقتاي وتىرىپ وتكىزۋ قاجەتتىگىنە نازار اۋداردى.
كەڭەس بارىسىندا پارتيا توراعاسىنىڭ ءبىرىنشى ورىنباسارى م.اشىمباەۆ سايلاۋ شتابىن ۇيىمداستىرۋ جۇمىستارى تۋرالى باياندادى.
نۇرسۇلتان نازارباەۆ م.اشىمباەۆتىڭ اقپاراتىن نازارعا الىپ, پارتيانىڭ ورتالىق اپپاراتى مەن فيليالدارى الداعى ءىس-شارالاردى ۇيىمداستىرۋ ءۇشىن جىلدام ءارى ۇيلەسىمدى جۇمىس ىستەۋگە ءتيىس ەكەنىنە توقتالدى.
– پارتياعا زور جاۋاپكەرشىلىك جۇكتەلىپ وتىر. بۇل – تاڭداپ العان ساياسي باعدارىمىزدىڭ ساباقتاستىعىن جانە ءوزىم بەلگىلەگەن بارلىق ستراتەگيالىق مىندەتتەردى ىسكە اسىرۋدى قامتاماسىز ەتۋ. «Nur Otan» قازاقستاندى جاڭعىرتاتىن باستى قوزعاۋشى كۇشكە اينالدى. سوندىقتان, بەلگىلەنگەن مىندەتتەردىڭ ءبارى تولىعىمەن ورىندالۋعا ءتيىس, – دەدى نۇرسۇلتان نازارباەۆ.
«Nur Otan» پارتياسىنىڭ توراعاسى «باقىتتى وتباسى», «قۇتتى مەكەن», «اۋىل – ەل بەسىگى» جانە «حالىققا كومەك» جوبالارىن ءتيىمدى ىسكە اسىرۋ ماسەلەلەرى تۋرالى ايتتى.
سونداي-اق, ەلباسى پارتيانىڭ 2030 جىلعا دەيىنگى جاڭا باعدارلاماسىن ىسكە اسىرۋ ءۇشىن ناقتى ءىس-شارالار جوسپارىن بەكىتۋدى تاپسىردى.
نۇرسۇلتان نازارباەۆ پارتيانىڭ مەملەكەتتىك باسقارۋ جۇيەسى ءۇشىن كادر دايىندايتىن نەگىزگى قۇرىلىم بولۋعا ءتيىس ەكەنىن اتاپ ءوتىپ, «Nur Otan» پارتياسىنىڭ رەسپۋبليكالىق كادر رەزەرۆىن جاساقتاۋدى تاپسىردى.
ەلباسى مەملەكەتتىك ساياساتتىڭ وزەكتى ماسەلەلەرى بويىنشا پارتيا مۇشەلەرى جۇرگىزەتىن ءتيىمدى اقپاراتتىق-ءتۇسىندىرۋ جۇمىستارىنىڭ ماڭىزدىلىعىن اتاپ ءوتتى.
– «Nur Otan» پارتياسى مەنىڭ ساياساتىمنىڭ ءمانىن ءتۇسىندىرۋ ىسىندە باستى ينستيتۋت بولۋعا ءتيىس. ۋاقىت پەن قول جەتكىزگەن جەتىستىكتەر ۇستانعان باعىتىمىزدىڭ دۇرىستىعىن كورسەتتى. بۇل باعداردى ودان ءارى ىسكە اسىرۋ ءۇشىن ناقتى جۇمىس ىستەۋ كەرەك, – دەدى قازاقستاننىڭ تۇڭعىش پرەزيدەنتى.
