«2017 جىلى ەل بويىنشا ءونىمنىڭ زاتتاي كورىنىستەگى شىعارىلىمىنىڭ ءوسىمى 2015 جىلدىڭ دەڭگەيىمەن سالىستىرعاندا 128% نەمەسە 23,2 ترلن تەڭگەنى قۇرادى. وڭىرلەر بولىنىسىندە ەڭ ۇلكەن ءوسىم اتىراۋ وبلىسىندا, الماتى قالاسىندا جانە قوستاناي وبلىسىندا قامتاماسىز ەتىلگەن. ەڭ تومەن ءوسىم – اقتوبە, پاۆلودار جانە ماڭعىستاۋ وبلىستارىندا بايقالعان», دەدى مينيستر.
سونىمەن قاتار مينيستر 2019 جىلعى 1 قاڭتاردا جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى 1,2 ملن بىرلىككە جەتىپ, وتكەن جىلدىڭ ۇقساس كەزەڭىمەن سالىستىرعاندا بۇل كورسەتكىش 8,3%-كە وسكەنىن ايتتى.
«وتكەن جىلعا جۇمىس ىستەپ تۇرعان شاعىن جانە ورتا بيزنەس سۋبەكتىلەرىنىڭ سانىنىڭ ەڭ ۇلكەن ءوسىمى نۇر-سۇلتان قالاسىندا, قىزىلوردا جانە شىعىس قازاقستان وبلىستارىندا تىركەلگەن. ەڭ تومەن ءوسىم – سولتۇستىك قازاقستان, الماتى جانە اقمولا وبلىستارىندا. جوبالىق باسقارۋ شەڭبەرىندە شاعىن جانە ورتا بيزنەس سۋبەكتىلەرىنىڭ بارىنشا ساپالى پۋلىن قالىپتاستىرۋ ءۇشىن جىلدىق اينالىمى 2 ملن تەڭگەدەن اساتىن شاعىن جانە ورتا بيزنەس سانىن ۇلعايتۋ بويىنشا ينديكاتور ورناتىلعان», دەدى مينيستر.
سونداي-اق ر.دالەنوۆ 2018 جىلعى 1 قاڭتارعا جالپى وسىنداي كاسىپورىندار سانى 337 مىڭ سۋبەكتىدەن استى, بۇل جوسپارلى كورسەتكىشتەن 2,6%-كە جوعارى ەكەنىن اتاپ ءوتتى.
«سونىمەن قاتار, 7 وڭىردە جوسپارلى كورسەتكىشكە قول جەتكىزىلمەگەن. جۇرگىزىلىپ وتىرعان جۇمىس ناتيجەسىن قورىتا كەلە جالپى بيزنەس دامۋىنىڭ وڭ سەرپىنى بايقالادى. اكىمدىكتەردىڭ الىدە اتقاراتىن جۇمىستارى بار. مىسالى, باتىس قازاقستان جانە پاۆلودار وبلىستارىندا سوڭعى جىلدارى ەكونوميكاداعى شاعىن جانە ورتا بيزنەس ۇلەسىنىڭ تومەندەگەنى بايقالادى. ال, كورسەتىلىپ جاتقان مەملەكەتتىك قولداۋ شارالارىنىڭ سانى رەسپۋبليكالىق ورتاشا ماننەن تومەن. اكىمدىكتەر وسى باعىتتا جۇمىستى كۇشەيتۋگە ءتيىس» , دەپ اتاپ ءوتتى مينيستر.
