تۇرعىندارعا ىڭعايلى بولۋ ءۇشىن اتاۋلى الەۋمەتتىك كومەكتى (ااك) تاعايىنداۋ بويىنشا قۇجاتتاردى جۇمىسپەن قامتۋ ورتالىقتارى مەن اۋدان اكىمشىلىكتەرىندە تاپسىرۋعا بولادى, دەپ حابارلايدى ەلوردا اكىمشىلىگىنىڭ رەسمي سايتى. جاڭا فورماتتاعى اتاۋلى الەۋمەتتىك كومەكتى تاعايىنداۋ ءۇشىن قۇجاتتاردى قابىلداعاننان باستاپ استانالىق جۇمىسپەن قامتۋ ورتالىعى مەن اۋدان اكىمشىلىكتەرىنە 3 مىڭنان اسا تۇرعىن ءوتىنىش ءبىلدىردى.
«1 ساۋىردەن باستاپ ااك تاعايىنداۋدىڭ جاڭا كريتەريلەرى انىقتالدى. وعان سايكەس استانا تۇرعىندارى ءۇشىن جان باسىنا شاققانداعى كەدەيلىك شەگى 21 572 تەڭگە دەڭگەيىندە. سايكەسىنشە, بىزگە الەۋمەتتىك كومەك الۋ ءۇشىن وتباسىنداعى ءبىر ادامعا شاققانداعى كىرىس مولشەرى كەدەيلىك شەگىنەن اسپايتىن بارلىق ادامدار كەلە الادى. بۇگىنگە دەيىن ء بىز 3 مىڭنان استام ادامعا كەڭەس بەردىك, 500 تۇرعىننىڭ قۇجاتىن قابىلدادىق», – دەدى قالالىق جۇمىسپەن قامتۋ ورتالىعى ديرەكتورىنىڭ ورىنباسارى دانيار نۇرپەيسوۆ.
تۇرعىندارعا ىڭعايلى بولۋ ءۇشىن جۇمىسپەن قامتۋ ورتالىعى ساعات 8:30-دان 20:00-گە دەيىن جانە تۇسكى ءۇزىلىسسىز جۇمىس ىستەيدى. سونداي-اق, قۇجاتتاردى تەك جۇمىسپەن قامتۋ ورتالىعىندا عانا ەمەس, اۋدان اكىمدىكتەرىندە دە تاپسىرۋعا بولادى. «قۇجاتتاردى ءساۋىر ايى بويى تاپسىرۋعا بولادى. ااك ءۇشىن قۇجاتتى تۇرعىندار ايدىڭ قاي كۇنى تاپسىرعانىنا قاراماستان, تولەم الادى (راستالعان جاعدايدا). ول 1 ساۋىردەن باستاپ تاعايىندالادى. ەڭبەك جانە حالىقتى الەۋمەتتىك قورعاۋ مينيسترلىگى «ە-حالىق» جاڭا اقپاراتتىق بازاسىن ەنگىزدى.
وعان سايكەس ءوتىنىش بىلدىرۋشىدەن يدەنتيفيكاتسيا جۇرگىزۋ ءۇشىن تەك قانا جەكە كۋالىگى تالاپ ەتىلەدى. بىراق ەرەجەگە ساي, ەگەر جەكە تۇلعانىڭ مالىمەتى بازادا بولماسا, وندا بالالاردى جانە ءوزىن كۋالاندىراتىن تۋ تۋرالى كۋالىك, بانكتىك ەسەپ-شوت تالاپ ەتىلەدى», - دەپ ءتۇسىندىردى ول. كوپ بالالى انا ينديرا جولدىبەكوۆا ءۇشىن ااك ۇلكەن كومەك بولادى.
«مەن – جەتى بالانىڭ اناسىمىن, «التىن القا» يەگەرىمىن. جۇمىسپەن قامتۋ ورتالىعىنا ااك الۋ ءۇشىن قۇجات تاپسىرۋعا كەلدىم. كوپبالالى انالارعا ارناپ وسىنداي مۇمكىندىك جاساعانىنا راحمەت ايتامىن. ااك راسىمدەۋ پروتسەسى وتە تەز, مەن كەزەكتە 10-15 مينۋت قانا تۇردىم. بارلىق قۇجاتتاردى وپەراتور قابىلداپ الدى. كۇيەۋىمدى جۇمىسسىز رەتىندە تىركەدى, جۇمىس تاۋىپ بەرۋگە ۋادە ەتتى», – دەدى ول. كوپبالالى انا بوتاكوز جانۇزاققىزى العاش رەت قۇجات تاپسىرۋىنا بايلانىستى جولداسىنىڭ ەڭبەك تابىسى تۋرالى انىقتاما اكەلۋى كەرەك بولدى, سەبەبى بازادا ول تۋرالى مالىمەت جوق.
«بارلىق قۇجاتتار دايىن, تەك جولداسىمنىڭ ەڭبەك تابىسى تۋرالى انىقتاما جوق. قازىر الىپ كەلەمىن, سوسىن قۇجاتتاردى قابىلدايمىز دەدى. قالعان قۇجاتتار تۇگەل. ەگەر ااك الساق, ءبىزدىڭ وتباسى ءۇشىن ۇلكەن كومەك بولار ەدى», – دەدى ول.
