«باتىس» وڭىرلىك قولباسشىلىعىنىڭ «ويماشا» وقۋ-جاتتىعۋ پوليگونىندا «ەلدى مەكەنگە شابۋىلداۋ كەزىندەگى باتالوندىق تاكتيكالىق توپ» تاقىرىبىندا جالپىاسكەري جانە دەسانتتىق-شابۋىلداۋ بريگادالارىنىڭ كومانديرلەرىمەن كورسەتپەلى ادىستەمەلىك-نۇسقاۋلىق ساباقتارى ءوتتى.
ساباقتاردىڭ باستى ماقساتى - شابۋىلداۋ جاساعىنىڭ قۇرامى مەن ىقتيمال تاپسىرمالارىن جەتكىزۋ, كومانديرلەردىڭ ەلدى مەكەنگە شابۋىلداۋعا بولىمشەنىڭ دايىندىعى جونىندە جۇمىس ەرەكشەلىكتەرىن ۇعىنۋى جانە شابۋىلداۋ جاساۋ كەزىندە جەكە قۇرام مەن اسكەري تەحنيكانىڭ ءىس-قيمىلدارىن كورسەتۋ بولدى.
ساباقتار بارىسىندا شابۋىلداۋ جاساعىنىڭ قۇرامىن تاڭداۋ جانە ەلدى مەكەندى بارلاۋ جونىندەگى ماسەلەلەر قارالدى, سونداي-اق, ەلدى مەكەنگە شابۋىل جاساۋ كەزىندە باتالوندىق تاكتيكالىق توپ جەكە قۇرامى مەن اسكەري تەحنيكاسىنىڭ پراكتيكالىق ءىس-قيمىلدارى پىسىقتالدى. «باتىس» وڭق اسكەرلەرىنىڭ قولباسشىسى, گەنەرال-مايور قانىش ابۋباكىروۆتىڭ ايتۋىنشا, ساباقتار تاقىرىپتارىنىڭ وزەكتىلىگى زاماناۋي اسكەري قاقتىعىستاردىڭ سيپاتى مەن ۋربانيزاتسيالانۋدىڭ (كەنتتەنۋدىڭ) جوعارى دەڭگەيى بولاشاقتا جاۋىنگەرلىك ءىس-قيمىلدار كوبىنەسە قالالىق جەرلەردە وتەتىنىن جوعارى ىقتيمالدىلىعىمەن بايلانىستى بولىپ وتىر.
