قر مادەنيەت جانە سپورت ءمينيسترى ارىستانبەك مۇحامەدي ۇلى ناۋرىز مەرەكەسىنىڭ بار شاراپاتى كىشكەنتاي بۇلدىرشىندەرگە ارنالۋى كەرەك دەپ اتاپ كورسەتكەندەي, العاشقى قايىرىمدىلىق كورسەتىلىم 22, 24 ناۋرىز كۇندەرى بولىپ ءوتتى.
مەرەكە كۇندەرى «مۇزبالاق» ءمۋلتفيلمىن قازاق جانە ورىس تىلدەرىندە تەگىن تاماشالاعان 5 600 جاس ءبۇلدىرشىننىڭ قۋانىشىندا شەك بولعان جوق. اتا-انالار دا يگى ءىس-شارانىڭ ۇيىمداستىرۋشىلارىنا ءوز العىستارىن جەتكىزدى.
ناۋرىز مەرەكەسىنەن باستاۋ العان يگى باستاما ءالى دە جالعاسىن تابۋدا.
7 ءساۋىر كۇنى «QAZAQSTAN» ورتالىق كونتسەرت زالىندا «كۇلتەگىن» ءمۋلتفيلمىنىڭ قايىرىمدىلىق كورسەتىلىمى وتەدى. تۇرىك قاعاناتىنىڭ داڭقتى اسكەري قولباسشىسى كۇلتەگىننىڭ ەرلىگى تۋرالى باياندايتىن بۇل ءمۋلتفيلمدى قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن.
7 ءساۋىر كۇنى «QAZAQSTAN» وكز-دا كىشكەنتاي كورەرمەندەردى ءمۋلتفيلمنىڭ ەكى سەانسى كۇتۋدە. انيماتسيا, گرافيكا جاعىنان شەتەلدىك مۋلتفيلمدەردەن كەم تۇسپەيتىن تۋىندى ساعات 15.00-دە قازاق تىلىندە, ال 17.00-دە ورىس تىلىندە كورسەتىلمەك. ءمۋلتفيلمنىڭ كورسەتىلىمىنە كىرۋ بارلىق بالالار ءۇشىن تەگىن.
