سوعان سايكەس «حالىققا كومەك» جوباسى قولعا الىنىپ, تىڭ باستامالار جۇزەگە اسىرىلا باستادى. سوندىقتان كەشە پارتيانىڭ رەسپۋبليكالىق قوعامدىق قابىلداۋ بولمەسىندە ازاماتتاردى قابىلداعان ماۋلەن اشىمباەۆ وسى سالاعا ەرەكشە نازار اۋداردى. ال قابىلداۋعا ەلىمىزدىڭ كەيبىر وڭىرىندەگى ازاماتتار بەينەكونفەرەنتس-بايلانىس ارقىلى قاتىستى. سولاردىڭ ءبىرى – تۇركىستان وبلىسى كەنتاۋ قالاسىنىڭ تۇرعىنى, كوپ بالالى جانە جالعىزباستى انا ناعيما ومىرزاقوۆا. ول پارتيادان كۇنكورىس دەڭگەيىنە بايلانىستى مەملەكەت تاراپىنان كورسەتىلەتىن اتاۋلى الەۋمەتتىك كومەك الۋعا جاردەم سۇراي كەلگەن.
ال الماتى وبلىسىنىڭ تۇرعىنى, 8 بالانىڭ اناسى گاۋھار شالعىنباەۆا ءوزىنىڭ جەر تەلىمى بار ەكەنىن ايتىپ, ەندى ءۇي سالۋ ءۇشىن قولداۋ كورسەتىلسە دەگەن ءوتىنىشىن جەتكىزدى. جالعىزباستى انانىڭ بار تىلەگى – بالالارىن باسپانامەن قامتۋ.
پاۆلودارلىق ەلەنا كۋكۋرۋزا دا 4 بالاسىن ءبىر ءوزى تاربيەلەپ وتىر. بۇگىندە بالالارى ءۇشىن الاتىن جاردەماقىعا پاتەر جالداپ وتىرعان ول پارتيادان باسپانا ماسەلەسى بويىنشا قانداي دا ءبىر كومەك بولسا دەگەن ءوتىنىشىن جەتكىزدى. سونداي-اق نۇر-سۇلتان قالاسىنىڭ تۇرعىنى, «التىن القا» يەگەرى, جۇبايىنان ەرتە ايىرىلعان قۇرالاي اقاەۆا دا پارتيادان ماتەريالدىق كومەك سۇراپ, ءوتىنىشىن ءبىلدىردى.
ماۋلەن اشىمباەۆ ولاردىڭ بارلىعىنا «حالىققا كومەك» جوباسى اياسىندا زاڭ شەڭبەرىندە ءتيىستى كومەك كورسەتىلەتىنىن ايتىپ, پارتيانىڭ بىرقاتار ايماقتىق فيليالدارىنا ناقتى تاپسىرمالار بەردى. ءوز كەزەگىندە فيليال توراعالارىنىڭ ءبىرىنشى ورىنباسارلارى اتالعان ماسەلەلەردى وڭ شەشۋدىڭ ءتيىمدى تەتىكتەرىن قاراستىرىپ قويعانىن جەتكىزدى. سوندىقتان كوپ بالالى انالاردىڭ ماسەلەلەرى كوپ ۇزاماي شەشىمىن تابادى دەۋگە تولىق نەگىز بار.
Nur Otan پارتياسى توراعاسى ءبىرىنشى ورىنباسارىنىڭ قابىلداۋىنا كەلگەن دارحان ءبىلالوۆ جۇمىس تابا الماي جۇرگەنىن ايتتى. قۋانىشقا وراي بۇل ماسەلە دەرەۋ شەشىمىن تاۋىپ, جاس مامان تۇراقتى جۇمىسپەن قامتىلدى. ەندى ول پارتيانىڭ قوعامدىق قابىلداۋ بولمەسىندە جۇمىس ىستەيتىن بولدى.
ايتا كەتەيىك, «حالىققا كومەك» جالپىۇلتتىق جوباسى – ەلباسى پارتيانىڭ كەزەكتى XVIII سەزىندە انىقتاپ بەرگەن الەۋمەتتىك باسىمدىقتاردىڭ ءبىرى. ونىڭ نەگىزگى ماقساتى – حالىقتى الاڭداتقان وزەكتى ماسەلەلەردى شەشۋگە پارتيا تاراپىنان ناقتى ۇلەس قوسۋ. ول ءۇشىن پارتيانىڭ بارلىق فيليالىندا جۇمىس ىستەيتىن قوعامدىق قابىلداۋ بولمەلەرىندە بىرىڭعاي الەۋمەتتىك تەرەزەلەر اشىلدى. سول ارقىلى حالىقتى الاڭداتقان بارلىق وزەكتى الەۋمەتتىك ماسەلەلەردى دەرەۋ انىقتاپ, جان-جاقتى تالداپ, ولاردى وڭ شەشۋ ءۇشىن مەملەكەتتىك ورگاندارمەن, ۇكىمەتتىك ەمەس ۇيىمدارمەن جانە بيزنەس قاۋىمداستىقپەن بىرلەسىپ جۇمىس ىستەلمەك.
قوعامدىق قابىلداۋ بولمەلەرىنىڭ مەكەنجايلارى پارتيانىڭ رەسمي سايتىندا تولىق كورسەتىلگەن. ودان بولەك, ازاماتتارعا ۇيالى تەلەفون, الەۋمەتتىك جەلىلەر, ۋاتساپ مەسسەندجەرى, ەلەكتروندى پوشتالار, ەلەكتروندى ۇكىمەت ارقىلى دا ءوز وتىنىشتەرىن جولداۋعا مۇمكىندىك قاراستىرىلعان. وسىلايشا پارتيا ءار ءوتىنىشتى مۇقيات قاراپ, ونىڭ وڭ شەشىلۋىنە ىقپال ەتپەك.
وسىعان بايلانىستى قابىلداۋدا الەۋمەتتىك جەلىلەر مەن مەسسەندجەرلەر ارقىلى كەلگەن وتىنىشتەر دە قارالىپ, ولاردىڭ شەشۋ جولدارى پىسىقتالدى. اتاپ ايتقاندا, جاس كاسىپكەرلەر قاراعاندىلىق الەكسەي لي مەن الماتىلىق اڭسار وڭالباەۆ وتىنىشتەرىن الەۋمەتتىك جەلى مەن ەلەكتروندى پوشتا ارقىلى جولداپ, ءوز ىستەرىنە پارتيا تاراپىنان قولداۋ كورسەتىلۋىن سۇراعان. سوعان بايلانىستى الداعى ۋاقىتتا وسى باعىتتا ءتيىستى جۇمىستار قولعا الىناتىن بولدى.
سونداي-اق قابىلداۋعا «كەدەرگىسىز كەلەشەك», «مەكتەپ اسحانالارى» سياقتى پارتيالىق جوبالارعا قاتىستى ۇتىمدى ۇسىنىستارىن بىلدىرگەن بەلسەندى ازاماتتار دا كەلدى. الماتى قالاسىنىڭ تۇرعىنى, حالىقارالىق بيزنەس اكادەمياسى كوللەدجىنىڭ وقىتۋشىسى ناتاليا كراسنوۆا مۇمكىندىگى شەكتەۋلى ازاماتتارعا قولداۋ كورسەتۋ باعىتىندا ستۋدەنتتەر تەاترىن اشقانىن ايتتى.
م.اشىمباەۆ بۇل باستامانىڭ قامكوڭىل جاندار ءۇشىن بەرەرى مول ەكەنىن ايتىپ, پارتيانىڭ «كەدەرگىسىز كەلەشەك» جوباسى اياسىندا وسى باعىتتا اتقارىپ جاتقان جۇمىستارىنا توقتالىپ ءوتتى. ودان بولەك, پارتيا توراعاسىنىڭ ءبىرىنشى ورىنباسارى تەاتر جۇمىسىن كەڭىنەن ناسيحاتتاۋ ءۇشىن Nur Otan تاراپىنان اقپاراتتىق قولداۋ كورسەتىلەتىنىن جەتكىزدى.
«مەكتەپ اسحانالارى» پارتيالىق جوباسى بويىنشا ءوز ۇسىنىستارىن ايتا كەلگەن تاماقتانۋ ماسەلەلەرى ينستيتۋتىنىڭ ديرەكتورى, مەديتسينا عىلىمدارىنىڭ دوكتورى, پروفەسسور ەربولات دالەنوۆ, دۇرىس تاماقتانۋ بىرلەستىگىنىڭ توراعاسى قابىكەن زاكاريانوۆ جانە مەكتەپتەرگە دۇرىس تاماقتانۋ جۇيەسىن ەنگىزۋ قاۋىمداستىعىنىڭ توراعاسى مارات باەلوۆ ءبىلىم وشاقتارىنداعى تاماقتانۋ جۇيەسىنە كوڭىلدەرى تولمايتىندارىن جەتكىزدى. بۇل ماسەلەنى عىلىمي تۇرعىدا قايتا قاراپ, ورتاق جۇيە ەنگىزۋ كەرەكتىگىن ايتقان ولار جاس بۋىننىڭ دەنى ساۋ, باسەكەگە قابىلەتتى بولىپ قالىپتاسۋى ءۇشىن وسى ءىستىڭ ماڭىزى زور ەكەنىنە باسا ءمان بەردى. بۇعان م.اشىمباەۆ بيىلدىڭ وزىندە ەلىمىز بويىنشا 3500 مەكتەپ اسحاناسىنىڭ جۇمىسى تەكسەرىلەتىنىن ايتتى.
قوعامدىق قابىلداۋ كەزىندە ءوز اۋىلىن اۋىز سۋمەن قامتۋ ماسەلەسىن كوتەرگەن سولتۇستىك قازاقستان وبلىسى اققايىڭ اۋدانى قيالى اۋىلىنىڭ تۇرعىنى تاتيانا يۆانوۆانىڭ دا ءوتىنىشى تىڭدالدى. وعان قازىرگى تاڭدا بۇل ماسەلە بويىنشا وڭىردە «قۇتتى مەكەن» پارتيالىق جوباسى اياسىندا ناقتى جۇمىستار قولعا الىنعانى ايتىلدى.
ءىس-شارا سوڭىندا م.اشىمباەۆ قابىلداۋ ناتيجەسى بويىنشا انىقتالعان ماسەلەلەردى وڭ شەشۋ ءۇشىن پارتيانىڭ ورتالىق اپپاراتى مەن بارلىق ايماقتىق جانە اۋماقتىق فيليالدارىنا تاپسىرمالار بەرىپ, ءار ءوتىنىشتىڭ قاراۋسىز قالماۋى كەرەكتىگىن ەرەكشە اتاپ ءوتتى.
