«ديماشتىڭ كونتسەرتىنە دايىنبىز!»

جيىندا باسقارما توراعاسى «Kinomax» جاڭا موبيلدىك قوسىمشاسىنىڭ ىسكە قوسىلۋى جانە «Arnau» كونتسەرتىنىڭ دايىندىق بارىسى جونىندەگى جاڭالىقتارىمەن ءبولىستى.

– قازىر تسيفرلاندىرۋ ءداۋىرى، كورەرمەندەردىڭ كوبىسى الەۋمەتتىك جەلىلەردە، ءتۇرلى ينتەرنەت سايتتاردا وزدەرىنە قىزىقتى دا قاجەتتى كونتەنتتى تاۋىپ، تاماشالاي الادى. تاڭداۋ كوپ، سوندىقتان تانىمال ترەندتەرگە سايكەس كەلەتىن كونتەنت جاساۋشىلار سانى كۇننەن كۇنگە كوبەيىپ كەلەدى. باسەكەلەستىك كۇشەيدى. وسى ورايدا «قازاقستان» كورپوراتسياسى زامان تالابىنا ساي جۇمىس جاساۋدا. بۇگىن سىزدەردىڭ نازارلارىڭىزعا ۇسىنىپ وتىرعان «Kinomax» ءموبيلدى قوسىمشاسى – Andriod جانە IOS پلاتفورمالارىندا تاۋلىگىنە 24 ساعات بويى قولجەتىمدى ۆيدەوسەرۆيس. وسى قوسىمشا ارقىلى وتاندىق تەلەحيكايالار، كوركەم، دەرەكتى جانە انيماتسيالىق فيلمدەردى ونلاين رەجيممەن قاتار، وففلاين رەجيمدە دە كورۋگە بولادى. بۇل ۆيدەوسەرۆيس وتاندىق كونتەنتتى دامىتۋمەن قاتار اۋديتوريا سۇرانىسىنا ساي ساپالى جوبالاردى ۇسىنۋ ماقساتىندا ىسكە اسىرىلدى. وسى ارقىلى ءبىز كورەرمەندەرىمىزگە نە قىزىقتى ەكەنىن ەسكەرىپ، باسەكەگە قابىلەتتى جانە ءتۇرلى جانرلارداعى كونتەنتتى ۇسىنۋدى كوزدەيمىز، – دەدى ەرلان قارين.

سونىمەن قاتار باسقارما توراعاسى جيىن بارىسىندا «قازاقستان» كورپوراتسياسىنىڭ ۇيىمداستىرۋىمەن وتەتىن ديماش قۇدايبەرگەننىڭ شىعارماشىلىق كەشىنە دايىندىق جۇمىستارى جايلى دا جان-جاقتى توقتالىپ ءوتتى. ەرلان تىنىمباي ۇلىنىڭ ايتۋىنشا، وسى جىلدىڭ 29 ماۋسىمىندا ءوتۋى جوسپارلانعان كونتسەرتكە بيلەت ساتىپ الۋشىلاردىڭ كوشىن وتانداستارىمىز باستاسا، ودان كەيىنگى قاتاردى رەسەي، اقش، قىتاي، ۇلىبريتانيا، فرانتسيا، گەرمانيا، جاپونيا، تۇركيا، نيدەرلاندى، رۋمىنيا، پولشا سىندى الىس-جاقىن شەتەلدىك ازاماتتار تولىقتىرادى ەكەن. ءدۇلدۇل ءانشىنىڭ اسەم ءانىن تىڭداۋعا اسىققان ونەرسۇيەر قاۋىمنىڭ قاتارىندا، سونىمەن قاتار، برازيليا، مەكسيكا، افريكا، كانادا، اۆستراليا سىندى شالعاي مەملەكەتتەردەن كەلەتىن مەيماندار دا بار. بيلەتتەر ساتىلىمعا شىققان العاشقى كۇنى بىردەن 6926 بيلەت (30%) ساتىلىپ كەتسە، ءبىر اپتادان كەيىنگى ەسەپ بويىنشا ساتىلعان بيلەت سانى 11099-عا (48،2%) جەتكەن. ال ءدال وسى ساتتەگى مالىمەت بويىنشا، كونتسەرت زالىنىڭ  66 پايىزى تولىق. ياعني بۇگىنگە دەيىن بارلىعى 15156 بيلەت تىڭدارمانىنىڭ قولىنا ءتيىپ ۇلگەرىپتى.

– ديماشتىڭ كونتسەرتىنە كەلەم دەۋشىلەردىڭ سانى وتە كوپ. شىعارماشىلىق كەش ۇلكەن انشلاگپەن وتەدى دەپ كۇتىلۋدە. قازىردىڭ وزىندە قازاقستان عانا ەمەس، الەمنىڭ تۇكپىرىنەن ءانشىنىڭ داۋسىن تىڭداۋعا قۇمارتقان حالىقتىڭ سانىندا شەك جوق. ياعني ءبارىمىز ءۇشىن الدا سىنعا تولى ۇلكەن جاۋاپكەرشىلىك تۇر. سوندىقتان دا قىزۋ دايىندىقتى باستاپ كەتتىك. وزدەرىڭىز بىلەتىندەي، ديماشتىڭ داۋىسى – ادامداردىڭ جۇرەگىن جاۋلاپ الاتىن ەرەكشە يمپۋلس، كاسىبي تىلمەن جەتكىزگەندە «Kinetic Voice». گرەك تىلىنەن تارجىمالاساق، «Kinetikos» – قيمىلعا اكەلەتىن ارەكەت دەگەن ماعىناعا سايادى. بۇل – ديماش كونتسەرتىنىڭ باستى كونتسەپتسياسى. ءار نومەر – ورتاق يدەيانى جەتكىزەتىن جەكە وقيعا، شاعىن سپەكتاكل دەسە بولادى. قازىرگى ساتتە بارلىق تەحنيكالىق جاعدايلار، مۋلتيمەديالىق شەشىمدەر، ساحنانىڭ ارلەنۋى، دىبىس پەن جارىق ماسەلەسى شەشىلدى. ەندى دەكوراتسيا مەن رەكۆيزيت قاراستىرىلىپ جاتىر. كونتسەرتتىڭ تەلەۆيزيالىق نۇسقاسىن ساپالى ءتۇسىرۋ جۇمىستارى دا ويلاستىرىلۋدا. الداعى 3 ايعا جوسپار قۇرىلدى»، – دەپ ەرلان قارين كونتسەرتتىڭ دايىندىق جۇمىستارىنا كەڭىنەن توقتالىپ ءوتتى.

جيىندا جاريا ەتىلگەن تاعى ءبىر جاعىمدى جاڭالىق –  باسقارما توراعاسى «قازاقستان» رترك اق قولداۋىمەن ديماش تۋرالى دەرەكتى ءفيلمنىڭ ءتۇسىرىلىم جۇمىستارىنىڭ باستالىپ كەتكەندىگىن دە سۇيىنشىلەپ ءوتتى. الداعى ۋاقىتتا ونەرسۇيەر قاۋىم، ءانشىنىڭ جانكۇيەرلەرى ءدۇلدۇل دارىن تۋرالى تاماشا تۋىندىنى تاماشالاپ، جاس تالانتتىڭ ءومىرى مەن شىعارماشىلىعىنا كوزايىم بولا الادى.