ايماقتار • 04 ءساۋىر، 2019

«تۇلعاتانۋدىڭ عىلىمي نەگىزدەرى: بۇگىنى مەن بولاشاعى» تاقىرىبىندا دوڭگەلەك ۇستەل ءوتتى

660 رەت كورسەتىلدى

اباي اتىنداعى قازۇپۋ « ۇلى دالا تۇلعالارى» ورتالىعىنىڭ ۇيىمداستىرۋىمەن «تۇلعاتانۋدىڭ عىلىمي نەگىزدەرى: بۇگىنى مەن بولاشاعى» تاقىرىبىندا دوڭگەلەك ۇستەل ءوتتى.

بۇل اۋقىمدى ءىس-شاراعا ۇعا بەلگىلى عالىمدارى، عىلىمي-زەرتتەۋ ورتالىقتارىنىڭ ماماندارى قاتىستى.

دوڭگەلەك ۇستەلدە ۇلى دالانىڭ ەجەلگى تۇلعالارى، تۇلعاتانۋدىڭ مەتودولوگيالىق قىرلارى، ۇلى دالا بي-شەشەندەرى – قازاق وركەنيەتىنىڭ مەملەكەتشىل قايراتكەر، دانا تۇلعالارى، ۇلى دالانىڭ ويشىلدارىنىڭ مادەني مۇرالارى مەن تۇلعالىق تانىمدىلىعى، تۇلعاتانۋدىڭ ساياسي قىزمەتى حاقىندا عىلىمي نەگىزدى تۇجىرىمدارىن ورتاعا سالدى.

ۇعا اكادەميگى، ەكونوميكا عىلىمدارىنىڭ دوكتورى، پروفەسسور كوپجاسار نارىباەۆ شارانى جۇرگىزىپ، تالقىلاناتىن تاقىرىپ بارىسىنا توقتالىپ ءوتتى. تاريح عىلىمدارىنىڭ دوكتورى، پروفەسسور تالاس وماربەكوۆ « ۇلى دالانىڭ تاريحى دەگەنىمىز شىن مانىندە وسى ايماقتا حالىقتى باسقارعان جانە ەلگە ءارتۇرلى جاعىمدى، ەرەكشە قاسيەتتەرىمەن كەڭىنەن تانىلعان تۇلعالاردىڭ تاريحى بولىپ شىعادى. مەملەكەتتىڭ دە، حالىقتىڭ دا تاريحى جەكە ەسىمدەرمەن تىعىز بايلانىستى. قاعاناتتار مەن حاندىقتار مەملەكەتتىك يدەولوگيا جەتىسپەگەن حالىق ءبىر سەنىمگە باعىنباعان قايشىلىقتى زاماندا مەملەكەت قۇرۋ يدەياسىن جالپىعا ءمالىم حالىقتىق شەجىرەدەن بەرىك ورىن العان داڭقتى تۇلعالار ەسىمدەرىمەن بايلانىستىردى» دەپ اتاپ وتسە، تاريح عىلىمدارىنىڭ دوكتورى، پروفەسسور حانگەلدى ءابجانوۆ «قازاقستان تاريحىنىڭ نەگىزىندە، مەنىڭ ويىمشا، ءۇش تىرەك بار. ءبىرىنشىسى جەر، ەكىنشىسى ءتىل، ءۇشىنشىسى مەملەكەت. بۇلار ۇلتتىق تاريحىمىزدىڭ ماتەريالدىق، رۋحاني، ساياسي قىرلارىن جارقىراتۋعا كورسەتۋگە مۇمكىندىك بەرەتىن ۇستانىمدار. بۇلارعا سۇيەنبەيتىن، بۇلاردان قۋات المايتىن تاريح جوق جانە بولمايدى دا. تاريحتاعى تۇلعانىڭ ءرولىن ايتساق ءوز باسىم ارتىندا وشپەس ءىز قالدىرعان تۇلعالاردى 4 توپقا جىكتەگەندى ءجون سانايمىن» دەگەن وي-تۇجىرىمىن ءبىلدىردى.  وسى مازمۇندا فيلولوگيا عىلىمدارىنىڭ دوكتورى، پروفەسسور تەمىرحان تەبەگەنوۆ، « ۇلى دالا بي-شەشەندەرى - قازاق وركەنيەتىنىڭ مەملەكەتشىل قايراتكەر، دانا تۇلعالارى» زەرتتەلگەن تاقىرىپ اياسىندا تۇشىمدى ويلارىن بىلدىرسە، تاريح عىلىمدارىنىڭ دوكتورى، قازاق ۇلتتىق اگرارلىق ۋنيۆەرسيتەتىنىڭ پروفەسسورى سۆەتلانا سماعۇلوۆا « ۇلى دالانىڭ ويشىلدارى: مادەني مۇرالارى مەن تۇلعالىق تانىمدىلىعى»، گۇلشات نۇرىمبەتوۆا – ساياسي عىلىمدارىنىڭ دوكتورى، پروفەسسور، اباي اتىنداعى قازۇپۋ « ۇلى دالا تۇلعالارى» ورتالىعىنىڭ ديرەكتورى «تۇلعاتانۋدىڭ ساياسي قىرلارى» بايانداماسىندا تاقىرىپ اۋقىمىنداعى عىلىمي تۇجىرىمدارىمەن ءبولىستى.

ۇقساس جاڭالىقتار