جارىستىڭ اشىلۋ سالتاناتىندا تۇركىستان وبلىسى اكىمىنىڭ ورىنباسارى مالىك وتارباەۆ, داڭقتى باپكەر تۇرسىنعالي ەدىلوۆ جانە وزگە دە ازاماتتار قۇتتىقتاۋ ءسوز سويلەدى.
بەكزاتتىڭ اتا-اناسى سەيىلحان اعا مەن سىرلىكۇل اپا دارا پەرزەنت تۋرالى ەستەلىك ايتىپ, جارىستى ۇيىمداستىرۋشىلارعا العىسىن ءبىلدىردى. سونىمەن بىرگە وليمپيادا چەمپيوندارى – ەرماحان يبرايموۆ, باقتيار ارتاەۆ جانە الەم چەمپيونى ءبىرجان جاقىپوۆ باستاعان ازاماتتار دا جاس سپورتشىلارعا ساتتىلىك تىلەدى. تۇركىستان وبلىستىق دەنەشىنىقتىرۋ جانە سپورت باسقارماسىنىڭ باسشىسى پولات قىرىقباەۆ بەكزات باتىر ماڭگى ەل ەسىندە ساقتالاتىنىن ايتىپ, وعان دەگەن قۇرمەت ءاردايىم جوعارى بولاتىنىن جەتكىزدى.
سونىمەن, تۇركىستان تورىندەگى دوداعا رەسەي, تاجىكستان, قىرعىزستان, وزبەكستان, ءازىربايجان مەملەكەتتەرى مەن قازاقستاننىڭ 14 وبلىسى جانە 3 قالاسىنان كوماندالار كەلدى. ولارعا 11 سالماق دارەجەسىندە جۇلدەلەر تاپسىرىلادى.
بۇل جارىستا بوكستان 2001-2002 جىلدارى تۋىلعان جاستار سايىسقا ءتۇسىپ جاتىر. جارىس جەڭىمپازى اتانعان سپورتشىعا «سپورت شەبەرى» اتاعى بەرىلەدى.
قازىرگى تاڭدا تۇركىستان وبلىسىنىڭ بوكسشىلارى قازاقستاندا ۇزدىكتەر قاتارىندا تۇر. ەل بىرىنشىلىگىندە وسى ءوڭىردىڭ جىگىتتەرى جالپىكوماندالىق ەسەپتە توپ جاردى. باستى مەجە – توكيو وليمپياداسىنان جۇلدە الۋ.
