كەڭەستى اۋدان اكىمى مۇرات ەرگەشباەۆ اشىپ, ءسوز تىزگىنىن قىزىلوردا وبلىستىق ءماسليحاتىنىڭ حاتشىسى ناۋرىزباي بايقاداموۆقا بەردى.
كەڭەس وتىرىسىنا قىزىلوردا وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ابۋوۆا ميرا جانە «قىزىلوردا وبلىسىنىڭ مادەنيەت, ارحيۆتەر جانە قۇجاتتاما باسقارماسىنىڭ «قىزىلوردا وبلىستىق تاريحي جانە مادەني ەسكەرتكىشتەردى قورعاۋ جونىندەگى» كوممۋنالدىق مەملەكەتتىك مەكەمەسى ديرەكتورى كوزەيباەۆ ساپار قاتىستى.
قازالى اۋدانىنداعى تاريحي-مادەني ەسكەرتكىشتەرگە بايلانىستى اتقارىلعان جۇمىستار تۋرالى اۋدان اكىمىنىڭ ورىنباسارى ءالىمجان جارىلقاعانوۆ باياندادى.
«قازىرگى تاڭدا, قازالى اۋدانىندا مەملەكەت قورعاۋىنا الىنعان 6 رەسپۋبليكالىق دارەجەدەگى, 53 جەرگىلىكتى ساناتتاعى جانە 40 الدىن-الا ەسەپكە الىنعان, بارلىعى 99 تاريحي-مادەني ەسكەرتكىش بار. ونىڭ 93-ءى قالا قۇرىلىسى جانە ساۋلەت نىساندارى بولسا, 6-ى ارحەولوگيالىق ەسكەرتكىش. ۇستىمىزدەگى جىلدىڭ جاز, كۇز مەزگىلدەرىندە اۋدان اكىمىنىڭ قولداۋىمەن تاريحي-مادەني ەسكەرتكىشتەردى تولىعىراق زەرتتەۋ ءۇشىن ەكسپەديتسيا جۇرگىزۋ جوسپارعا ەنگىزىلگەن. ەسكەرتكىش تاريحى جايلى مالىمەتتەردى بايانداعان ەل اقساقالدارىمەن سۇحبات ۇيىمداستىرىپ, جەرگىلىكتى دەڭگەيدە بەينەبايان ءتۇسىرۋدى 2019-2020 جىلدارعا قولعا الماقپىز. بۇل فيلمدەر ءبىزدىڭ كەلەشەككە دەگەن ۇلكەن سىيىمىز بولماق», - دەيدى ول.
كەڭەستە وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى ميرا راحىمجانقىزى وركەندەۋ ەلدىمەكەنىندەگى جانكەنت شاھارى يۋنەسكو-نىڭ قورعاۋىنا الىناتىن مادەني مۇرالار تىزىمىنە حالىقارالىق اتالىم بويىنشا ەنگىزىلەتىنىن ايتىپ, جۇرتتىڭ قۋانىشىمەن ءبولىستى.
