2017 جىلى قارابالىق اۋدانىنىڭ ورتالىعىندا چاپاەۆ, كارل ماركس, وكتيابر كوشەلەرىنىڭ اتىن وزگەرتۋ تۋرالى شەشىم قابىلدانعان ەدى. وكتيابر كوشەسىنىڭ اتى قاپان بادىروۆ بولىپ وزگەرتىلدى. بىراق قارابالىق پوسەلكەسىنىڭ كەيبىر تۇرعىندارى «ۇيرەنىپ قالعان كوشە اتىن نەگە تانىمايتىن ادامعا بەردى؟» دەگەن نارازىلىقتارىن دا جاسىرا الماعان. كوپتەگەن قارابالىقتىقتاردىڭ اسىعىس ايتقان پىكىرلەرى م.گوركي اتىنداعى قارابالىق ورتا مەكتەبىنىڭ 2-سىنىپ وقۋشىسى كسەنيا پريحودكونىڭ زەرتتەۋ جۇمىسىنان كەيىن باسىلدى دەۋگە بولادى.
كىشكەنتاي ءبۇلدىرشىن بۇرىنعى وكتيابر, قازىرگى قاپان بادىروۆ كوشەسىندە تۇرادى. ول اناسىنا «قاپان بادىروۆتىڭ كىم بولعانىن بىلگىسى, زەرتتەۋ جۇمىسىن جازعىسى كەلەتىنىن ايتتى. اناسى قارسى بولماي, قايتا قىزىنىڭ باستاماسىن قۋانا قابىلدادى. ولار قارابالىق اۋداندىق تاريحي-ولكەتانۋ مۋزەيىنە كەلىپ, تالانتتى اكتەر تۋرالى باي ومىرباياندىق ماتەريال تاپتى.
قازاق دراما تەاترىنىڭ ىرگەتاسىن قالاسقانداردىڭ ءبىرى, قارابالىق اۋدانىنىڭ تۋماسى قاپان بادىروۆ م.اۋەزوۆ اتىنداعى قازاق دراما تەاترىندا 200-دەن اسا رولدە وينادى. ول تەاتر ساحناسىندا سومداعان اباي, امانگەلدى, قوبىلاندى, ناۋان حازىرەت سەكىلدى بەينەلەردى كورەرمەندەر ۇمىتقان جوق. سونىمەن قاتار قاپان 20 كينودا وينادى. ول قاتىسقان «دالا باتىرلارى», «باتىل جاندار», «امانگەلدى», «جاۋىنگەر ۇلى», «جامبىل», «ەڭلىك گۇلدەر وسكەن جەردە» اتتى فيلمدەردەن كورەرمەن سۇيىكتى اكتەرىن بىردەن تانيدى.
كىشكەنتاي كسەنيانىڭ قاپان بادىروۆتىڭ ءومىرى مەن شىعارماشىلىعىن جان-جاقتى بايانداعان «مەنىڭ كوشەم كىمنىڭ اتىندا؟» اتتى عىلىمي جۇمىسى قوستاناي قالاسىندا وتكەن مەكتەپ وقۋشىلارىنىڭ ت.داۋلەتباەۆ اتىنداعى «جاس ۇرپاقتىڭ ينتەللەكتۋالدىق الەۋەتى – قازاقستاندى يندۋستريالىق-يننوۆاتسيالىق دامىتۋدىڭ تابىستى كەپىلى» اتتى ءۇش ايماقتىق كونفەرەنتسياسىنا قاتىسىپ, 2-ورىن الدى. كسەنيانىڭ جاسقانبايتىن شەشەندىك تالانتى دا بايقالدى, ول ءۇشىن «كورەرمەن كوزايىمى» سىيلىعىمەن ماراپاتتالدى.
اۋداندىق «اينا» گازەتى كسەنيا پريحودكونىڭ عىلىمي جۇمىسىنىڭ مازمۇنى مەن ول ارقىلى قول جەتكىزگەن تابىسىن جاريالاعاننان كەيىن, كوشەنىڭ جاڭا اتىنا ريزا ەمەس تۇرعىندار تاڭىرقاسىپ قالعانداي.
قوستاناي
