بايقاۋعا قابىلداناتىن شىعارمالاردا باس باسىلىمنىڭ قازاق باسپاسوزىندەگى ورنى مەن ۇلتتىق ءتىل عىلىمىن ناسيحاتتاۋداعى ماڭىزى باسا نازارعا الىنباق. ۇمىتكەرلەر بايقاۋ شارتىنا سايكەس 29 ساۋىرگە دەيىن پۋبليتسيستيكالىق شىعارمالارىن وبلىستىق تىلدەردى دامىتۋ جونىندەگى باسقارماعا جولداي الادى.
- جارىق كورگەنىنە 100 جىل تولىپ وتىرعان «Egemen Qazaqstan» گازەتى العاشقى سانى شىققان كۇننەن باستاپ قازاق ءتىلىنىڭ دامۋى مەن ۇلتتىق ءتىل قورىنىڭ جاساقتالۋىنا ولشەۋسىز ۇلەس قوسىپ كەلەدى. قازاق مەملەكەتىنىڭ قالىپتاسۋ تاريحىندا ۇلتىمىز 3 رەت جازۋ ءالىپبيىن اۋىستىرعانى بەلگىلى. لاتىن, توتە جازۋ جانە كيريلل قارپىنە كوشۋ كەزەڭىندە «Egemen Qazaqstan» گازەتى وقىرماندارعا جاڭا ءالىپبيدى ناسيحاتتاۋ, دارىپتەۋ, بەيىمدەۋ جۇمىستارىنىڭ كوش باسىندا بولدى. بۇل ۇلتتىق ءتىل عىلىمىنىڭ ناسيحاتتالۋى مەن جاڭعىرۋىنا قوسىلعان ۇلەس بولىپ قالدى. قازىرگى كۇنى ەلباسى ن. نازارباەۆتىڭ باستاماسىمەن ەلىمىزدە لاتىن قارپىنە كوشۋ جۇمىسى قانات جايىپ وتىر. وسى باعىتتا دا «Egemen Qazaqstan» گازەتى باستاما كورسەتىپ, گازەت اتاۋىن, تاقىرىپتارىن لاتىن تىلىنە كوشىردى. بۇگىندە اپتاسىنا 5 رەت جارىق كورەتىن گازەتتىڭ ءار نومىرىندە لاتىن قارپىندە 1 بەت ماتەريال جارىق كورۋدە. بۇل مەملەكەتتىك ءتىلدىڭ دامۋىنا دەگەن ۇلكەن قۇرمەت. ءبىز ءوز تاراپىمىزدان وتانىمىزدىڭ باس گازەتىنىڭ مەرەيتويىن لايىقتى اتاپ وتۋگە ۇلەس قوسپاقپىز, - دەيدى الماتى وبلىستىق تىلدەردى دامىتۋ باسقارماسىنىڭ باسشىسى ايدار باشباەۆ.
