«مي-8 - 1988 شىعارىلعان تىكۇشاق. الماتى قالاسىنداعى №405 اۆياجوندەۋ زاۋىتىندا كۇردەلى جوندەۋدەن وتكەن. زاۋىتتان شىققاننان كەيىن تىكۇشاققا اۋەدە 2000 ساعات نەمەسە 8 جىل ۇشۋ رەسۋرسى بەرىلەدى. بۇگىنگە دەيىن تىكۇشاق اۋەدە 773 ساعات ۇشقان», دەدى اسكەري-اۋە كۇشتەرىنىڭ قولباسشىسى داۋرەن قوسانوۆ.
ونىڭ ايتۋىنشا, تەحنيكالىق تۇرعىدا تىكۇشاقتا ەشقانداي اقاۋ بولماعان. مەملەكەتتىك كوميسسيا تەرگەۋ جۇرگىزىپ جاتقاندىقتان, مي-8 ءتيپتى تىكۇشاقتاردىڭ ۇشۋى توقتاتىلدى.
«اپتا بويى ولار تەحنيكالىق تەكسەرىستەن وتەدى. مي-8 - پوستكەڭەستىك ەلدەردىڭ ىشىندە عانا ەمەس, بۇكىل الەمدەگى ەڭ ادام كوپ سياقتىن تىكۇشاق سانالادى. ەڭ قاراپايىم ءارى سەنىمدى تىكۇشاق. قازىرگى تاڭدا ءبىز مي-17 جانە مي-171 تىكۇشاقتارىن, سونىمەن بىرگە مي-35 جاۋىنگەرلىك تىكۇشاقتارىن ساتىپ الۋدامىز. جوسپارلى جۇمىستار جۇرۋدە», دەدى د.قوسانوۆ.
ول سونداي-اق مەملەكەتتىك كوميسسيا تەرگەۋ امالدارىن جۇرگىزىپ جاتقانىن اتاپ ءوتتى.
«ناتيجەسى رەسمي تۇردە حابارلانادى. بارلىق سەبەپتەر سارالانۋدا: تەحنيكانىڭ ىستەمەي قالۋى, ادامي فاكتور جانە مەتەوجاعداي. مەن كوميسسيا مۇشەسى ەمەسپىن. سول سەبەپتى, ول جايىندا پىكىر بىلدىرۋگە قاقىم جوق. قارا جاشىك مەملەكەتتىك كوميسسيادا. ونى تەكسەرۋ قۇقىعى بىزدە جوق», دەدى داۋرەن قوسانوۆ.
سونىمەن قاتار, داۋرەن قوسانوۆتىڭ ايتۋىنا قاراعاندا, قر زاڭىنا سايكەس, كوز جۇمعان اسكەري قىزمەتشىلەردىڭ وتباسىنا ءبىر جولعى وتەماقى بەرىلەدى. بۇل - ونىڭ 5 جىلدىق جۇمىسى بويىنشا جالاقىسى. سونىمەن بىرگە, وتباسىلار قىزمەتتىك باسپانانى قايتارىمسىز زاڭداستىرىپ الۋعا قۇقىلى. جەرلەۋ ءراسىمى بويىنشا بارلىق شىعىندار وتەلەدى. سونداي-اق, وتباسىندا قانشا ادامنىڭ بولۋىنا بايلانىستى باسپاناعا قاتىستى وتەماقى تولەنەدى. بۇل ادام باسىنا قاراي ءار اسكەري قىزمەتشىنىڭ وتباسىنا ءارتۇرلى وتەماقى بەرىلمەك.
ەسكە سالايىق, 27 ناۋرىز كۇنى كەشكە قىزىلوردا وبلىسىنىڭ جالاعاش اۋدانىندا مي-8 تىكۇشاعى اپاتقا ۇشىراعان بولاتىن.
