بۇقار جىراۋ اۋدانىنداعى سادوۆوە ەلدى مەكەنىنە توتەنشە جاعدايلار دەپارتامەنتى مەن ۇلتتىق ۇلانعا قاراستى №52859 اسكەري ءبولىمنىڭ كۇشتەرى جۇمىلدىرىلعان. قازىرگى ۋاقىتتا سامارقان سۋ قويماسىنا جاقىن بۇل جەردە 131 ادام, 31 تەحنيكا بىرلىگى شوعىرلانىپ, جۇمىس ىستەۋدە. سۋ كەتەدى-اۋ دەگەن تۇستارعا قۇم تولتىرىلعان 5 مىڭ قاپ قالانىپ, قورعانىس شەبى تۇزىلگەن. ازىرگە ەلدى مەكەندە سۋ العان ءۇي جوق.
رەسپۋبليكالىق, وبلىستىق جانە جەرگىلىكتى ماڭىزداعى جولداردىڭ كەيبىر ويپاڭ تۇستارىنان سۋ ءجۇرىپ جاتىر. بۇل جەرلەردە پوليتسيا قىزمەتكەرلەرى, جول قىزمەتى مەن جەرگىلىكتى اتقارۋشى ورگانداردىڭ وكىلدەرى كەزەكشىلىك ۇيىمداستىرعان. سۋ اعىپ جاتقان جەرلەرگە ەسكەرتۋ بەلگىلەرى قويىلىپ, جول تابانىن شايدىرماۋدىڭ امالدارى قاراستىرىلىپ جاتىر.
كەشە جاڭاارقا اۋدانىندا جوعالىپ كەتكەن ەر ادامنىڭ ءمايىتى دالادان تابىلدى. قازىرگى ۋاقىتتا مارقۇمنىڭ ولىمىنە تاسقىن سۋدىڭ سەبەپشى بولعان, بولماعانى تەكسەرىلىپ جاتىر.
وبلىستاعى سۋ قويمالارىنداعى سۋدى اعىزۋ جۇمىستارى جالعاسۋدا. جەرگىلىكتى تج دەپارتامەنتىنىڭ ءباسپاسوز قىزمەتى تاراتقان مالىمەتكە سەنسەك, ازىرگە سۋ تاسقىنى جاعدايى تۇراقتى جانە ول ءتيىستى ورگاندار تاراپىنان ۇدايى باقىلاۋعا الىنعان.
بۇگىن اپپاراتتىق جيىن بارىسىندا وبلىس اكىمى ە.قوشانوۆ جاعدايدىڭ ءالى دە كۇردەلى ەكەنىن ايتتى. «ەڭ ءبىرىنشى كەزەكتە تۇرعىندارعا كومەكتەسۋ كەرەك. ەگەر قانداي دا ءبىر شىعىندار بولسا, ەسەبىن شىعارىپ, قالپىنا كەلتىرگەن ءجون», دەدى ول.
قايرات ءابىلدا,
«Egemen Qazaqstan»
قاراعاندى وبلىسى
