ەل ەسىندەگى ەرلىكتەر
سارسەنبى, 11 قاڭتار 2012 7:45
اعا لەيتەنانت مەدەت دوسىمحانوۆ قامىستى اۋدانىنىڭ اداەۆكا كەنتىنە باعىت العاندا قىلمىسكەردى تاۋىپ, جابىرلەنگەندەردىڭ قۇقىقتىق تالابىن قامتاماسىز ەتۋدى ويلادى. بىراق ءوزىن الدا نە كۇتىپ تۇرعانىن بىلگەن جوق.
ارينە, كەز-كەلگەن پوليتسيا قىزمەتكەرى ءۇشىن قىلمىس بولىپ جاتقان وقيعا ورنىنا اتتاناردا ءوزىن الدا نە كۇتىپ تۇراتىنى بەسەنەدەن بەلگىلى سەكىلدى. ويتكەنى, بىرەۋگە قاراقشىلىق جاساعان, ياكي بىرەۋدى توناعان, زورلاعان نەمەسە ولتىرگەن قاندى قولدار ءوزىنىڭ قۇتىلىپ كەتۋى ءۇشىن نەگە بولسا دا باس تىگەدى. ال مۇندايدا جولىنا تۇرعان پوليتسيا قىزمەتكەرىن قاراقشىلار مۇلدە ايامايتىنى انىق.
سارسەنبى, 11 قاڭتار 2012 7:45
اعا لەيتەنانت مەدەت دوسىمحانوۆ قامىستى اۋدانىنىڭ اداەۆكا كەنتىنە باعىت العاندا قىلمىسكەردى تاۋىپ, جابىرلەنگەندەردىڭ قۇقىقتىق تالابىن قامتاماسىز ەتۋدى ويلادى. بىراق ءوزىن الدا نە كۇتىپ تۇرعانىن بىلگەن جوق.
ارينە, كەز-كەلگەن پوليتسيا قىزمەتكەرى ءۇشىن قىلمىس بولىپ جاتقان وقيعا ورنىنا اتتاناردا ءوزىن الدا نە كۇتىپ تۇراتىنى بەسەنەدەن بەلگىلى سەكىلدى. ويتكەنى, بىرەۋگە قاراقشىلىق جاساعان, ياكي بىرەۋدى توناعان, زورلاعان نەمەسە ولتىرگەن قاندى قولدار ءوزىنىڭ قۇتىلىپ كەتۋى ءۇشىن نەگە بولسا دا باس تىگەدى. ال مۇندايدا جولىنا تۇرعان پوليتسيا قىزمەتكەرىن قاراقشىلار مۇلدە ايامايتىنى انىق. الايدا, وسى ساقشىلار بولماسا بىرەۋدى جابىرلەگەندەردىڭ جولىن كەسۋگە كىم شىقپاق؟ دەمەك ولاردىڭ بەيبىت ۋاقىتتاعى قىزمەتىنىڭ ءوزى ادىلدىك ءۇشىن ارپالىسقا تولى كۇندەر مەن تۇندەر دەسەك, قوستاناي وبلىسىنا قاراستى تاران اۋداندىق ىشكى ىستەر ءبولىمى كريمينالدىق پوليتسيا بولىمشەسىنىڭ باستىعى مەدەت باۋىرجان ۇلى دا كەزەكتى مىنا تەكسەرىستىڭ توسىن جاعدايىنا دايىن كۇيدە اتتانعان ەدى.
تەرگەۋ توبىنا جەتكەن اقپارات بويىنشا پريوزەرسك كەنتىندەگى مال شارۋاشىلىعىنان ازامات ب.نۇرمۇحانبەتوۆكە تيەسىلى ەكى جىلقى ۇرلانعان ەكەن. كىم ۇرلاعانى, ارينە, بەلگىسىز. بىراق الدىن الا ءمالىمەتتەر بويىنشا, ياعني تاران اۋداندىق ىشكى ىستەر ءبولىمىنىڭ كريمينالدىق پوليتسيا قىزمەتكەرلەرىنىڭ زەردەلەۋىنە قاراعاندا ءۇش كۇدىكتى نازارعا ىلىككەن سەكىلدى. ولاردىڭ كىم ەكەندىكتەرى دە تەز ارادا بەلگىلى بولدى. سوسىن اتالعان قىلمىستى جاساۋى مۇمكىن دەپ تابىلعان ءۇش كۇدىكتىنىڭ ءبىرى ش.دوسانوۆتىڭ وعان قاتىسى بار-جوقتىعىن انىقتاۋ ءۇشىن م.دوسىمحانوۆ باستاعان توپ ونىڭ ۇيىنە بەت الدى. پوليتسيا قىزمەتكەرلەرى ش.دوسانوۆتى ۇيىنەن تاپقانىمەن, ول بىردەن قارسىلىق كورسەتەدى. ءتىپتى وعان كومەككە جەتكەن اعاسى ۇيدەن مىلتىق الىپ شىعىپ كەزەنەدى. وسى كەزدە وزگەلەرگە قاۋىپ تونگەنىن تۇسىنگەن اعا لەيتەنانت م.دوسىمحانوۆ قىلمىسكەردىڭ جولىن بوگەمەكشى بولادى. الايدا, ءمان-جايدى سابىرلىلىقپەن انىقتاۋعا جەتكىزبەگەن ج.دوسانوۆ اڭشى مىلتىعىن اعا لەيتەنانتقا كەزەنىپ, ءشۇرىپپەنى باسىپ قالادى.
ج.دوسانوۆ بۇرىن سوتتالعان ەكەن. سوندىقتان ول ەش شىمىرىكپەستەن ادامعا وق اتادى. سول مەزەتتە اعا لەيتەنانت سول جاق يىعىنان قاتتى جاراقات الادى. شاشىراي تيگەن بىتىرادان قان سۋداي اعادى. م.دوسىمحانوۆ تەز ارادا قامىستى ورتالىق اۋرۋحاناسىنا جەتكىزىلەدى. بىراق قاننىڭ توقتاۋسىز كوپ اعىپ كەتۋىنەن قانسىراعان اعا لەيتەنانت كوز جۇمدى. بىتىرا كۇرە تامىردى قيىپ جىبەرگەن ەكەن.
مەدەت باۋىرجان ۇلى 1980 جىلى قوستاناي وبلىسىنىڭ اۋليەكول اۋدانىنىڭ اۋليەكول اۋىلىندا تۋعان. سوندا مەكتەپتى بىتىرگەن سوڭ قوستاناي الەۋمەتتىك اكادەمياسىن كەدەن ءىسى بويىنشا 2003 جىلى وقىپ تاۋىسادى. سوسىن بىردەن رۋدنىي قالاسىنىڭ ىشكى ىستەر بولىمىنە قىزمەتكە ورنالاسادى. جاس كەلسە ىسكە دەگەندەي, كوپ ۇزاماي ول ءوزىنىڭ العىرلىعىمەن كوزگە ءتۇسىپ, كريمينالدىق پوليتسيا بولىمشەسى ايماقتىق توبىنىڭ اعا جەدەل وكىلى – اعا مامان لاۋازىمىنا كوتەرىلەدى. ال 2007 جىلى مەدەت تاران اۋداندىق ءىىب كريمينالدىق پوليتسيا بولىمشەسى باستىعىنىڭ ورىنباسارى قىزمەتىنە جوعارىلايدى. بۇل لاۋازىمدا دا ءوزىنىڭ بىلىكتىلىگىمەن تالاي ءىستى اشا بىلگەن م.دوسىمحانوۆ 2009 جىلى اتالعان كريمينالدىق پوليتسيا بولىمشەسىنىڭ باستىعى بولىپ تاعايىندالادى. وسى جىلدار ىشىندە ول ناتيجەلى قىزمەتى ءۇشىن بىرنەشە رەت قوستاناي وبلىستىق ءىىد باسشىلىعى تاراپىنان بىرقاتار ماراپاتتارعا كەنەلەدى. وسىنداي جاستىق شاعىندا قاجىرلى جۇمىس ىستەپ, قاناتىن قاتايتا باستاعان, بار بولعانى 28 جاسقا ەندى تولعان جىگىت جابىرلەنگەندەردىڭ قۇقىن قورعايمىن دەپ قاندىقول قاراقشىنىڭ قولىنان قاپىدا مەرت بولدى.
ۇلتتىق قاۋىپسىزدىكتى نىعايتۋ جانە قۇقىقتىق ءتارتىپتى, زاڭدىلىقتى قامتاماسىز ەتۋ بارىسىندا كورسەتكەن ەرلىگى مەن قايسارلىعى, اسكەري جانە قىزمەتتىك مىندەتىن ۇلگىلى اتقارعانى ءۇشىن پرەزيدەنت جارلىعىمەن م.ب.دوسىمحانوۆ II دارەجەلى «ايبىن» وردەنىمەن (قايتىس بولعان سوڭ) ماراپاتتالدى. ونىڭ ەسىمى ەرلىگىمەن ەل ەسىندە قالدى. قوستاناي وبلىستىق ءىىد جەكە قۇرامى اۋليەكول اۋىلىندا وزدەرىنىڭ ارىپتەستەرىنە سوڭعى قۇرمەت كورسەتتى. قارالى ءراسىم قوشتاسۋىندا ءسوز العاندار قايتىس بولعان مەدەت دوسىمحانوۆ جونىندە ەستەلىك ايتىپ, ونىڭ ەرلىك ارەكەتى قۇقىق قورعاۋ ورگاندارىنىڭ كەلەشەك قىزمەتكەرلەرى ءۇشىن قىزمەتتىك مىندەتتى اتقارۋدىڭ ءۇلگىسى رەتىندە ساقتالاتىندىعىن مالىمدەدى.
قارالى جيىندا ءسوز العان ونىڭ دوستارى, ارىپتەستەرى جانە ىشكى ىستەر ورگانىنىڭ ارداگەرلەرى مەدەت دوسىمحانوۆتىڭ اتا-بابا ءداستۇرىن جالعاستىرۋشى ساقشى ەكەنىن, ونىڭ اكەسى باۋىرجان جيىرما جىل جەدەل قىزمەتكەر بولىپ جۇمىس ىستەگەنىن, پوليتسەيلىك ءالىپپەنى ۇلىنا اكەسى سىڭىرگەنىن, سونىڭ ارقاسىندا اعا لەيتەنانت دوسىمحانوۆتىڭ ناتيجەلى ەڭبەك ەتكەنىن, ءسويتىپ بار بولعانى التى جىلعى قىزمەت كەزىندە قاراپايىم جەدەل قىزمەتكەردەن كريمينالدىق پوليتسيا بولىمشەسىنىڭ باستىعىنا دەيىن جوعارىلاعانىن جەتكىزدى. مارقۇمنىڭ ارتىندا كوزدەرى بوتالاعان ورىمدەي ەكى كىشكەنتاي قىزى, جارى قالدى. رۋدنىي قالالىق ىشكى ىستەر باسقارماسى كريمينالدىق پوليتسيا ءبولىمشەسىنىڭ باستىعى كاپيتان يۋ.پوليۋحوۆ مەدەت قولعا العان ءىسىن قاشاندا اياعىنا دەيىن ءوزى جەتكىزەتىنىن ايتادى. بۇل جولى دا سولاي بولدى, جىلقىنىڭ ۇرلىعىنا قاتىستى كۇدىكتىلەر جونىندەگى جەدەل اقپاراتتى تەكسەرۋشى توپقا جەكە ءوزى باسشىلىق ەتتى دەيدى ول. ولار وتباسىلارىمەن دوس بولعان جاندار ەكەن.
وتباسى, تۋعان-تۋىسقاندارى, قىزمەتتەستەرى ءۇشىن دە ورنى تولماس قازانىڭ كۇيىنىشىن جەتكىزۋ مۇمكىن ەمەستىگىن ايتقان قوستاناي وبلىستىق ءىىد باستىعى گەنەرال-مايور ب.بايجاساروۆ: «پوليتسەيلەر قىزمەتىنە كىرىسەر الدىندا بەرەتىن انتىندا ولاردىڭ ازاماتتاردىڭ قۇقىن قورعاۋ جولىندا, ەگەر قاجەت بولسا ءوز ومىرلەرىن دە ويلانباستان قيۋعا باراتىندىعى جازىلعان. مەدەت دوسىمحانوۆ انتىنا ادال بولدى, ول ۇرلانعان م ۇلىك قايتارىلۋى ءۇشىن اتىلعان وققا ارقاسىن توسپاي, قارسى تۇردى. ول قايتىس بولعان سوڭ مەملەكەتتىك ناگراداعا ۇسىنىلدى. ونىڭ ەسىمى قوستاناي وبلىستىق ىشكى ىستەر ورگانىنىڭ تاريحىنا جازىلىپ قالدى» دەدى. ءيا, وسىلايشا بەيبىت كۇندە دە ەرلەردىڭ ەرلىكتەرى حالىقتىڭ قاۋىپسىزدىگى مەن زاڭدىلىقتىڭ ساقتالۋى ءۇشىن جالعاسا بەرەتىندىگى اقيقاتقا اينالدى.
الەكساندر تاسبولاتوۆ.
