بوكسشىلاردىڭ ازيا چەمپيوناتى وتكەن عاسىردىڭ الپىسىنشى جىلدارىنان بەرى ۇزدىكسىز ۇيىمداستىرىلىپ كەلەدى. 1963-1992 جىلعا دەيىنگى ارالىقتا ايتۋلى جارىستىڭ جالاۋى 16 مارتە جەلبىرەدى. سول كەزدەرى وڭتۇستىك كورەيا وعلاندارىنىڭ قارقىنى كۇشتى بولعان ەكەن. جالپىكوماندالىق ەسەپتە ولار 11 مارتە (1965, 1967, 1970, 1971, 1980, 1982, 1983, 1985, 1987, 1989, 1992 جىلدارى) توپ جارىپ, وزدەرىن وسى سپورت تۇرىندەگى ازيانىڭ ەڭ ۇزدىك كومانداسى رەتىندە مويىنداتتى. سونداي-اق جاپونيا (1963, 1975) مەن تايلاند (1973, 1991) ەكى رەتتەن جانە يران (1977) ءبىر رەت تەڭدەسسىز دەپ تانىلدى.
كسرو-نىڭ ىرگەسى سوگىلگەننەن كەيىن قازاقستان, وزبەكستان, قىرعىزستان, تۇرىكمەنستان جانە تاجىكستان سەكىلدى بەس رەسپۋبليكانىڭ ورەندەرى جەكە-جەكە كوماندا جاساقتاپ, ايتۋلى دوداعا قاتىسا باستادى. 1994 جىلى يراننىڭ باس شاھارى – تەھراندا وتكەن ازيا چەمپيوناتىندا تۇڭعىش رەت باق سىناعان قازاقستاننىڭ بىلعارى قولعاپ شەبەرلەرى وزدەرىنىڭ مىقتىلىعىن ءبىراۋىزدان مويىنداتىپ, كوماندالىق ەسەپتە كوش باستادى. داڭقتى باپكەر ءابدىسالان نۇرماحانوۆتىڭ شاكىرتتەرى اراسىنان بولات ءجۇمادىلوۆ (51 كيلو), بولات نيازىمبەتوۆ (63,5 كيلو), نۇرجان سمانوۆ (67 كيلو), قاناتبەك شاعاتاەۆ (71 كيلو) جانە اركادي توپاەۆ (75 كيلو) التىن تۇعىرعا كوتەرىلدى. يران مەن تايلاند قوس التىندى قاناعات تۇتسا, وڭتۇستىك كورەيا, قىتاي جانە يندونەزياعا ءبىر-ءبىر باس جۇلدەدەن بۇيىردى.
1995 جىلى تاشكەنتتى «تالقانداپ» قايتتىق. بولات ءجۇمادىلوۆ (51 كيلو), بەكتاس ابۋباكىروۆ (54 كيلو), باقتيار تىلەگەنوۆ (57 كيلو), بولات نيازىمبەتوۆ (63,5 كيلو), ەرماحان ىبىرايىموۆ (71 كيلو) جانە ۆاسيلي جيروۆ (81 كيلو) قارسىلاس شاق كەلتىرمەي, باس جۇلدەنى ولجالادى. وسى التى التىننىڭ ارقاسىندا جالپى ەسەپتە تاعى دا دارا شىقتىق. جارىس قوجايىندارى ءۇش مارتە توپ جارسا, قالعان باس جۇلدەلەر تايلاند, موڭعوليا جانە يراننىڭ بىلعارى قولعاپ شەبەرلەرىنە بۇيىردى.
1997 جىلى مالايزيانىڭ كۋالا-لۋمپۋر قالاسىندا نۇرجان سمانوۆ (67 كيلو) پەن سامات مۇساتاەۆتىڭ (91 كيلو) اسىعى الشىسىنان ءتۇستى. باس جۇلدەنىڭ كەمدىگىنەن كوماندالىق سايىستا ءتورتىنشى ورىندى قاناعات تۇتتىق. وسى جارىستا ءتورت مارتە جەڭىس تويىن تويلاعان تايلاند قۇراماسى العا شىقسا, ءۇش التىنى بار وزبەكستان مەن يران بوكسشىلارى ەكىنشى جانە ءۇشىنشى ساتىلارعا تۇراقتادى.
1999 جىلعى ازيا چەمپيوناتى قايتا تاشكەنتتە ءوتتى. ول كەزدە ادىلدىكتى بەلدەن باسقان «جەرگىلىكتى باسشىلار» جەتى التىندى قورجىنعا سالىپ, كوماندالىق باسەكەدە كوش باستادى. قازاقستان ەكىنشى ورىنعا تابان تىرەدى. وتانداستارىمىزدىڭ اراسىنان نۇرجان كارىمجانوۆ (60 كيلو) پەن ەرماحان ىبىرايىموۆ (71 كيلو) دارا تالانتىمەن وقشاۋلانسا, بەكزات ساتتارحانوۆ (57 كيلو), دانيار مۇڭايتپاسوۆ (67 كيلو), ولجاس ورازاليەۆ (81 كيلو), تالعات دوسانوۆ (91 كيلو) جانە مۇحتارحان ءدىلدابەكوۆ (+91 كيلو) كۇمىستى يەلەندى. بولات ءجۇمادىلوۆ (51 كيلو), سەرىك ەلەۋوۆ (54 كيلو), باتىرحان جاقسىباەۆ (63,5 كيلو) جانە ۆياچەسلاۆ بۋربا (75 كيلو) قولاعا قول سوزدى. ال وڭتۇستىك كورەيا, قىتاي جانە تايلاندتا ءبىر-ءبىر التىننان بار.
2002 جىلى ازيانىڭ جۋان جۇدىرىقتى جىگىتتەرى مالايزيانىڭ سەرەمبان قالاسىندا سايىسقا ءتۇستى. بۇل جولى دا وزبەكستان قۇراماسىنىڭ باعى جاندى. ولار بەس التىن ولجالادى. پاكستان مەن تايلاندتىڭ تۇلەكتەرى ەكى ءمارتە جەڭىسكە جەتتى. وڭتۇستىك كورەيا, مالايزيا جانە قىتايدىڭ بوكسشىلارى دا التىن تۇعىردان قول بۇلعادى. قازاقستان قۇراماسى جوعارىدا اتالعان كوماندالاردىڭ بارلىعىنان قالىپ قويدى. ءبىزدىڭ ورەندەر اراسىنان ەڭ ۇزدىك كورسەتكىشكە باقتيار ارتاەۆ (67 كيلو) قول جەتكىزدى. ول كۇمىس مەدالدى موينىنا ءىلدى. تاعى ءتورت جەرلەسىمىز ءۇشىنشى ساتىعا جايعاستى.
2004 جىلعى ءفيليپپيننىڭ پۋەرتو-پرينتسەسسا قالاسىندا وتكەن جارىستا قازاقستان قۇراماسى التىن تۇعىرعا كوتەرىلدى. گاليب جافاروۆ (57 كيلو), گەننادي گولوۆكين (75 كيلو) جانە بەيبىت شۇمەنوۆ (81 كيلو) الدىنا جان سالماسا, پاۆەل ستوروجۋك (91 كيلو) اقتىق سىندا ونەر كورسەتتى. ال الماس اسانوۆ (54 كيلو), قانات وراقباەۆ (60 كيلو) جانە مۇحتارحان دىلدابەكوۆ (+91 كيلو) قولا مەدالدى ەنشىلەدى. وزبەكستان, فيليپپين جانە وڭتۇستىك كورەيادان قوس چەمپيوننان شىقسا, قىتاي مەن سيريا بوكسشىلارىنىڭ دا ءبىر التىننان الۋعا كۇش-جىگەرلەرى جەتتى.
2006 جىلى سارى قۇرلىقتىڭ سايىپقىراندارى ۆەتنامنىڭ حوشيمين قالاسىندا جينالدى. بۇل جولى ءۇش التىندى ەنشىلەگەن پاكىستان قۇراماسىنىڭ وزگەلەردەن كوشى ىلگەرى بولدى. قازاقستاندىقتار اراسىنان باقىت سارسەكباەۆ (69 كيلو) پەن ەلدوس جاڭابەرگەنوۆتىڭ (81 كيلو) شوقتىعى بيىك بولدى. جەڭىس نۇرعوجين (64 كيلو) فينالدا ۇتىلسا, ءمىرجان راقىمجانوۆ (54 كيلو) جارتىلاي فينالعا دەيىن جەتتى. وسى جەتىستىگىمىزدىڭ ارقاسىندا جالپى ەسەپتە ەكىنشى ورىندى يەلەندىك. فيليپپين بوكسشىلارى قوس التىندى قانجىعاعا بايلاپ, ءۇشىنشى ساتىعا تۇراقتاسا, ودان كەيىنگى ورىنداردى وڭتۇستىك كورەيا, يران, تايلاند جانە تاجىكستان يەمدەندى. ولاردىڭ ارقايسىسى ءبىر التىننان يەمدەندى.
2007 جىلى موڭعوليانىڭ استاناسى – ۇلان-باتىر قالاسىندا ۇيىمداستىرىلعان دودادا وزبەكستان, موڭعوليا جانە قازاقستان قۇرامالارى كومبەگە بىردەي جەتتى. ارقايسىسى ءۇش التىننان ولجالادى. قازاق ەلىنىڭ ورەندەرى اراسىنان ميرات سارسەمباەۆ (51 كيلو), سەرىك ساپيەۆ (64 كيلو), باقىت سارسەكباەۆ (69 كيلو) تەڭدەسسىز دەپ تانىلدى. وسى ءۇش كوماندا اراسىنان جالپى ەسەپتە وزبەكتەردىڭ جولى بولدى. ولار كۇمىس پەن قولانى قوس-قوستان يەلەنسە, موڭعولداردىڭ تاعى ەكى بىلعارى قولعاپ شەبەرى اقتىق ايقاسقا دەيىن القىنباي جەتتى. قازاقتار قاتارىنان ەلدوس سايدالين (57 كيلو) فينالدا ۇتىلسا, قانات ءابۋتالىپوۆ (54 كيلو) پەن حامزات گەليسحانوۆ (81 كيلو) جارتىلاي فينالدا ءسۇرىندى.
2009 جىلعى قۇرلىق بىرىنشىلىگىنىڭ جالاۋى قىتايدىڭ جۋحاي قالاسىندا جەلبىرەدى. اتالمىش جارىستا شارشى الاڭ يەلەرى شاشالارىنا شاڭ جۇقتىرمادى. قىتاي ەلىنىڭ ءاپايتوستەرى 3 التىن, 3 كۇمىس جانە 2 قولانى يەمدەندى. ەكىنشى ورىنداعى وزبەكستاندا 2 التىن پەن 3 كۇمىس مەدال. قازاقستان قوس التىن مەن ءۇش قولانى قورجىنعا سالىپ, ءۇشىنشى ساتىعا جايعاستى. ايتۋلى دودادا سەرىك ساپيەۆ (69 كيلو) پەن ۆاسيلي لەۆيت (91 كيلو) باس جۇلدەنى ولجالاسا, ولجاس ساتتىباەۆ (54 كيلو), عاني جايلاۋوۆ (60 كيلو) جانە داۋرەن ەلەۋسىنوۆ (81 كيلو) قولاعا قول سوزدى.
2011 جىلى وڭتۇستىك كورەيانىڭ ينچحون قالاسىندا وتكەن ازيا چەمپيوناتىندا قازاقستان قۇراماسى تابىستى ونەر كورسەتتى. جەرلەستەرىمىز 2 التىن, 2 كۇمىس جانە 1 قولا مەدالدى ولجالاپ, كوماندالىق ەسەپتە ەكىنشى تۇعىرعا تابان تىرەدى. كوش باستاعان قىتاي بوكسشىلارى 2 التىن, 3 كۇمىس جانە 1 قولانى ەنشىلەدى. ايدار امىرزاقوۆ (60 كيلو) پەن دوسجان وسپانوۆ (+91 كيلو) – ءبىرىنشى, رۋستام سىباەۆ (69 كيلو) – ەكىنشى جانە ارمان رىسبەك (81 كيلو) ءۇشىنشى ورىندى يەلەندى. قوس التىن جانە ءبىر-بىردەن كۇمىس پەن قولانى قورجىنعا سالعان جارىس قوجايىندارى ءۇشىنشى ساتىعا جايعاستى. ودان كەيىنگى ساتىلارعا موڭعوليا, وزبەكستان, تاجىكستان جانە سيريا قۇرامالارى تۇراقتادى. بۇل كوماندالاردىڭ بارلىعىنا دا جالقى التىننان بۇيىردى.
2013 جانە 2015 جىلعى جارىستار جەرلەستەرىمىزدىڭ ايقىن باسىمدىعىمەن اياقتالدى. وسىدان التى جىل بۇرىن يوردانيادا 7 التىن مەن 1 كۇمىستى قورجىنعا سالدىق. تەمىرتاس ءجۇسىپوۆ (49 كيلو), بەرىك ءابدىراحمانوۆ (60 كيلو), مەرەي اقشالوۆ (64 كيلو), دانيار ەلەۋسىنوۆ (69 كيلو), جانىبەك ءالىمحان ۇلى (75 كيلو), انتون پينچۋك (91 كيلو) جانە يۆان دىچكو (+91 كيلو) دارا شىقسا, ادىلبەك نيازىمبەتوۆ (81 كيلو) فينالدا ءسۇرىندى. ەكىنشى جانە ءۇشىنشى ورىنداردى ءۇندىستان مەن وزبەكستان ءوزارا ءبولىستى. قوس كوماندا 1 التىن, 2 كۇمىس جانە 1 قولادان ەنشىلەدى.
وسىدان ءتورت جىل بۇرىن تايلاندتا وتانداستارىمىز 5 التىن, 1 كۇمىس جانە 1 قولانى قانجىعاعا بايلادى. ەكىنشى ورىندا – وزبەكستان (2 التىن+5 كۇمىس+1 قولا). ءۇشىنشى جانە ءتورتىنشى ورىنداردا – تايلاند (2+0+0) پەن موڭعوليا (1+0+2). ءبىزدىڭ ساڭلاقتار اراسىنان ولجاس ساتتىباەۆ (52 كيلو), دانيار ەلەۋسىنوۆ (69 كيلو), ادىلبەك نيازىمبەتوۆ (81 كيلو), ۆاسيلي لەۆيت (91 كيلو) جانە يۆان دىچكو (+91 كيلو) التىن تۇعىرعا كوتەرىلسە, زاكىر سافيۋللين (60 كيلو) مەن قايرات ەراليەۆ (57 كيلو) جۇلدەگەرلەر ساناتىنان كورىندى.
سوڭعى ازيا چەمپيوناتى 2017 جىلى وزبەكستاننىڭ باس شاھارىندا ۇيىمداستىرىلدى. ول جارىستىڭ قالاي وتكەنىن جانكۇيەرلەر جاقسى بىلەدى. 10 سالماق دارەجەسى بويىنشا ساراپقا سالىنعان باس جۇلدەلەردىڭ توعىزى سول ەلدە قالدى. قازاقستاننىڭ بوكسشىلار اراسىنان تەك ۆاسيلي لەۆيت (91 كيلو) قانا جەڭىمپاز اتاندى. ابىلايحان ءجۇسىپوۆ (69 كيلو), ەرىك ءالجانوۆ (81 كيلو) جانە قامشىبەك قوڭقاباەۆ (+91 كيلو) كۇمىس السا, ازامات يساقۇلوۆ (52 كيلو), قايرات ەراليەۆ (56 كيلو), بەكداۋلەت يبراگيموۆ (64 كيلو) جانە ءابىلحان امانقۇل (75 كيلو) قولانى قاناعات تۇتتى.
سوڭعى جىلدارى نەگىزگى باسەكەلەستىك قازاقستان مەن وزبەكستان قۇرامالارى اراسىندا وربۋدە. ازيانىڭ قوس الپاۋىتى وسىلار ەكەنىن وزگەلەر الدەقاشان مويىنداعان. دەسەك تە باسقا كوماندالاردىڭ دا دامەلەرى زور. سوندىقتان دا ساناۋلى كۇندەردەن كەيىن بانگكوكتا جالاۋى جەلبىرەيتىن جارىستا تالاي «جان الىسىپ, جان بەرىسكەن» ايقاستاردىڭ كۋاسى بولاتىنىمىز انىق. ال ءبىزدىڭ العا قويعان ماقساتىمىز بىرەۋ عانا – ازيانىڭ الدى بولۋ. وسىدان بىرەر اي بۇرىن عانا ۇلتتىق كوماندامىزدىڭ باس باپكەرى بولىپ تاعايىندالعان عالىمبەك كەنجەباەۆ ءۇشىن بۇل العاشقى ۇلكەن سىناق.
