باق ءۇشىن ۇيىمداستىرىلعان ءىس-شاراعا «قازمۇنايگاز» ۇك اق باسقارما توراعاسىنىڭ ءوندىرىس جونىندەگى ورىنباسارى جاقىپ ماراباەۆ, «ماڭعىستاۋمۇنايگاز» اق باس ديرەكتورىنىڭ ءبىرىنشى ورىنباسارى باقىت يمانباەۆ, «قازمۇنايگاز» ءوندىرۋ جانە بۇرعىلاۋ تەحنولوگيالارى عىلىمي-زەرتتۋ ينستيتۋتى» جشس باس ديرەكتورى باقىتجان حاسانوۆ, «مۇناي-گاز عجزي» اق باس ديرەكتورى ولەگ گەرشتانسكي قاتىستى.
جاقىپ ماراباەۆ جينالعانداردى وسى جىلدىڭ 13 ناۋرىزىندا «ماڭعىستاۋمۇنايگاز» اق-عا قاراستى قالامقاس كەن ورنىنىڭ كۇردەلى ۋچاسكەسىندە ۇڭعىمانىڭ قۇرىلىسى بارىسىندا تەحنوگەندىك سيپاتتاعى گاز-سۋ ارالاس تابيعي بۇرقاق شىققانى تۋرالى حاباردار ەتتى. ناۋرىزدىڭ 13-24 كۇندەرى ماماندار ۇڭعىمانى كۇردەلەندىرىلگەن بۇرعىلاۋ ەرىتىندىسىمەن جۋ, سونداي-اق گريفونداردى جويۋ ءۇشىن جوندەۋ-وقشاۋلاۋ جۇمىستارىن جۇرگىزدى. قولدانعان شارالارعا قاراماستان, 25 ناۋرىز كۇنى جەر بەتىنە شىققان گاز-سۋ قوسپاسىنىڭ وشاعى جانا باستادى. ماڭعىستاۋ وبلىسى بويىنشا توتەنشە جاعداي دەپارتامەنتىنىڭ باستىعى ق.ب. بازارباەۆتىڭ باسشىلىعىمەن تج, ەكولوگيا, پوليتسيا, ورتالىق مەملەكەتتىك ورگاندار, قمگ, «ماڭعىستاۋمۇنايگاز» اق, «سيبۋ» جشس جانە ماڭعىستاۋ وبلىسى اكىمدىگى وكىلدەرىنەن قۇرىلعان جەدەل شتاب ءورت وشاعىن اۋىزدىقتاۋ بويىنشا قاجەتتى شارالاردى قابىلدادى. توتەنشە جاعدايدى جويۋ ءۇشىن 80-نەن استام مامان جانە 25 ءتۇرلى تەحنيكا جۇمىلدىرىلدى. ءسوندىرۋ بارىسىندا جانۋ وشاعىن تاسىمالداناتىن لافەتتىك وقپاندارمەن اۋىزدىقتاۋ ءۇشىن جۇمىستار جۇرگىزىلدى. 28.03.2019 ج. ساعات 01.05-تە №8237 ۇڭعىماسى ماڭايىنداعى گريفوندا شىققان ءورت اۋىزدىقتالدى. قازىرگى تاڭدا گاز-سۋ ارالاس تابيعي بۇرقاقتىڭ جەر بەتىنە شىعۋى توقتاتىلدى جانە پايدا بولعان گريفوندار جابىلدى. زارداپ شەككەندەر مەن قازا بولعاندار جوق. الدىن الا مالىمەتتەر بويىنشا, ماتەريالدىق شىعىننىڭ كولەمى شامالى.
«قازمۇنايگاز» ۇك اق باسقارما توراعاسىنىڭ ءوندىرىس جونىندەگى ورىنباسارى جاقىپ ماراباەۆ ءوز سوزىندە پايدا بولعان ءورت – بۇل قالامقاس كەن ورنىن يگەرۋ جاعدايىنا ءتان قۇبىلىس ەكەنىن اتاپ ءوتتى.
-ارينە, ءبىز قاشاندا وسىنداي وقيعالارعا دايىن بولۋىمىز كەرەك – بۇل ءۇشىن وسى سياقتى قاۋىپ-قاتەرلەر تۋىنداعان كەزدە ۋاقتىلى جانە ساپالى ارەكەت ەتۋ بويىنشا ارنايى رەگلامەنتتەر ازىرلەنگەن. مۇنداي جۇمىستارعا بىلىكتىلىگى اسا جوعارى, ءوندىرىستى جەتە بىلەتىن جانە مول تاجىريبەسى بار مۇنايشى-ماماندار قاجەت ەكەنىن باسا ايتقىم كەلەدى. 8237 ۇڭعىماداعى ءورتتى اۋىزدىقتاۋ ءۇشىن ەڭبەك ەتكەن بارلىق ارىپتەستەرىمە العىس بىلدىرەمىن. ولاردىڭ وتباسى مۇشەلەرىنە ايتارىم – ەندى قاۋىپ جوق, ۋايىمداماڭىزدار, دەدى ول.
قازىرگى كەزدە نىساندا قايتا قالپىنا كەلتىرۋ بويىنشا كەشەندى جۇمىستار جۇرگىزىلۋدە. ماماندار الداعى ۋاقىتتا وسىنداي توتەنشە جاعدايلاردىڭ الدىن الۋ ءۇشىن جان-جاقتى تەحنيكالىق ساراپتامالار جۇرگىزىلەتىن بولادى. ساراپتامالاردىڭ ناتيجەسى بويىنشا, قالامقاس كەن ورنىنىڭ ورتالىق بولىگىندەگى ۇڭعىمالاردى جوبالاۋ كەزىندە بۇرعىلاۋ ۇڭعىمالارىندا جۇرگىزىلەتىن جۇمىستاردىڭ قاۋىپسىزدىگىن جانە ساپاسىن قامتاماسىز ەتۋ ءۇشىن ارنايى تۇزەتۋ شارالارى قابىلداناتىن بولادى.
ماڭعىستاۋ وبلىسى
