«نۇر-سۇلتان, الماتى جانە شىمكەنت قالالارىندا جىل سايىن جاس ماماندارعا ارنالعان مىڭعا جۋىق ارەندالىق تۇرعىن ءۇي تۇرعىزۋ جوسپاردا بار. ول باسپانالار كاسىپورىنداردا, اۋىل شارۋاشىلىعى مەن بيۋدجەتتىك مەكەمەلەردە, عىلىم سالاسىندا جۇمىس ىستەيتىن جاس ماماندارعا, ءىسىن ەندى باستاعان كاسىپكەرلەرگە ارنالىپ سالىنادى. بۇل رەتتە وتباسىنداعى بالا سانى, مۇمكىندىگى شەكتەۋلى, ارنايى كۇتىمدى قاجەت ەتەتىن بالا تاربيەلەپ وتىرعاندار, تولىق ەمەس وتباسىلار جانە تاعى باسقا فاكتورلار ەسكەرىلەدى» دەدى مينيستر.
بۇدان سوڭ, ول جاستاردى ەڭبەكپەن قامتۋ كەرەك ەكەنىن ايتتى.
«ەكىنشى باعىت بويىنشا «جاس كاسىپكەر» باعدارلاماسىن جۇزەگە اسىرۋ قاراستىرىلعان. ءۇش جىلدىڭ ىشىندە 60 مىڭ جاس ازامات كاسىپكەرلىك نەگىزدەرى بويىنشا وقىتىلادى. اۋىلداعى جاستارىمىزعا ارنايى 15 مىڭ ميكروكرەديت بەرۋ جوسپارلانعان. ال جاڭا بيزنەس-يدەيالاردى جۇزەگە اسىرۋ ءۇشىن 30 مىڭنان اسا مەملەكەتتىك گرانتتار بولىنبەكشى» دەدى اقپارات جانە قوعامدىق دامۋ ءمينيسترى.
سونداي-اق ول ءبىلىم بەرۋ مەن ۆولونتەرلار ۇيىمدارىن دامىتۋ جوسپارى بار ەكەنىن اتاپ ءوتتى.
«قازىر «جاس مامان» دەپ اتالاتىن باعدارلاما ازىرلەنىپ جاتىر. وسى باعدارلاما ارقىلى سۇرانىسقا يە 100 يندۋستريالدى جانە سەرۆيستىك كاسىپتەر بويىنشا ماماندار دايىندالادى. بۇل باعىتتاعى جۇمىستار ەلىمىزدەگى 20 الدىڭعى قاتارلى جوعارى وقۋ ورىندارى مەن 180 كوللەدجدىڭ بازاسىندا جۇزەگە اسادى. ءۇش جىلدىڭ ىشىندە ەلىمىزدىڭ بارلىق ايماقتارىندا 200 مىڭ جاس ازاماتتى وقىتىپ شىعارۋدى كوزدەپ وتىرمىز» دەدى ول.
مينيسترلىكتىڭ اقپاراتىنا سۇيەنسەك, «اشىق ۋنيۆەرسيتەت» جوباسىنا بارلىق جوعارى وقۋ ورىندار مەن كوللەدجدەردى قوسۋ جوسپارلانعان.
«ىرگەلى ءارى قولدانبالى زەرتتەۋلەرگە قاتىستى گرانتتىق قارجىلاندىرۋدى جىلىنا 3 ميلليارد تەڭگەگە ۇلعايتۋ. ۆولونتەرلىق شارالارعا بەلسەندى قاتىسىپ جۇرگەن ستۋدەنتتەردىڭ ستەپەندياسىن 30%-كە كوبەيتۋ» دەدى د.اباەۆ.
