شاراينا
سەيسەنبى, 2 قازان 2012 6:42
سايلاۋدا داۋىس بەرۋدەن باس تارتتى
كەشە گرۋزيادا پارلامەنتتىك سايلاۋ بولىپ ءوتتى. وندا «گرۋزين ارمانى» وپپوزيتسيالىق بىرلەستىگىنىڭ كوسەمى, ميلليونەر بيدزينا يۆانيشۆيلي داۋىس بەرۋدەن باس تارتتى. ول ءوزىنىڭ شەشىمىن بيلىكتىڭ رەسپۋبليكا كونستيتۋتسياسىن مازاق قىلعانىمەن ءتۇسىندىردى.
سەيسەنبى, 2 قازان 2012 6:42
سايلاۋدا داۋىس بەرۋدەن باس تارتتى
كەشە گرۋزيادا پارلامەنتتىك سايلاۋ بولىپ ءوتتى. وندا «گرۋزين ارمانى» وپپوزيتسيالىق بىرلەستىگىنىڭ كوسەمى, ميلليونەر بيدزينا يۆانيشۆيلي داۋىس بەرۋدەن باس تارتتى. ول ءوزىنىڭ شەشىمىن بيلىكتىڭ رەسپۋبليكا كونستيتۋتسياسىن مازاق قىلعانىمەن ءتۇسىندىردى.
ءبىزدىڭ بيلىكتەگىلەر گرۋزيا كونستيتۋتسياسىن مىڭ رەت وزگەرتتى, ياعني ونى وزدەرىنە ىڭعايلى ەتۋگە ۇمتىلدى. مەن بەرىلگەن ءمۇمكىندىكتى پايدالانعان جوقپىن. ونىڭ ۇستىنە ساياساتقا ادىلەتسىزدىك ءۇشىن ەمەس, ونى قالپىنا كەلتىرۋ ءۇشىن كەلدىم, دەدى ب.يۆانيشۆيلي. وسىلايشا 1 قازان گرۋزيادا دەمالىس كۇنى بولىپ جاريالاندى. ەلدە تاڭەرتەڭگى ساعات 8-دەن 3,5 مىڭنان استام سايلاۋ ۋچاسكەلەرى جۇمىس ىستەدى. سايلاۋعا بارلىعى 14 ساياسي پارتيا مەن ەكى بلوك قاتىستى.
جاعدايدى ءتۇسىندىرۋدى تالاپ ەتتى
«يراننىڭ يادرولىق باعدارلاماسىنا قارسى ءبىرلەستىك» دەپ اتالاتىن امەريكالىق ۇيىم مولدوۆو بيلىگىنەن يران تانكەرلەرىن رەسپۋبليكا تۋى استىندا تىركەۋمەن بايلانىستى جاعدايدى ءتۇسىندىرۋدى تالاپ ەتتى. مولدوۆو پرەزيدەنتى نيكولاە تيموفتيگە اتالعان ۇيىمنىڭ اتقارۋشى ديرەكتورى مارك ۋوللەس ءتيىستى حاتپەن شىقتى.
حاتتا وتكەن قىركۇيەك ايىندا مولدوۆونىڭ تۋىمەن 11 يران تانكەرى تىركەلگەنى جازىلىپتى. يران كومپانيالارىمەن ىنتىماقتاسقان مولدوۆو, دەيدى حات يەسى, يراننىڭ يادرولىق باعدارلاماسىنا قارسى حالىقارالىق كۇش-جىگەردى بوس اۋرەشىلىككە اينالدىرادى. قازىرگى كەزدە باسقا دا بىرقاتار ەلدەردىڭ تۋىن پايدالانعان يران تانكەرلەرى بار ەكەنى انىقتالعان سىڭايلى.
جاپونيادا جارتى ۇكىمەت جاڭاردى
جاپونيا پرەمەر-ءمينيسترى ەسيحيكو نودا كەزەكتەن تىس پارلامەنتتىك سايلاۋ قارساڭىندا بيلىكتىڭ رەيتينگىن جاقسارتۋ ماقساتىندا ۇكىمەتتى جاڭارتتى. ءسويتىپ, مينيسترلەر كابينەتىنىڭ 18 مۇشەسىنىڭ 10-ى جاڭادان كەلگەندەر بولىپ وتىر.
قازىر ءبىلىم جانە عىلىم مينيسترلىگىنە 2002 جىلى سىرتقى ىستەر ءمينيسترى ورىنتاعىندا وتىرعان ماكيكو تاناكا حانىم كەلدى. ەندى ول اۋماقتىق تالاسقا بايلانىستى ناشارلاپ كەتكەن قىتايمەن اراداعى قارىم-قاتىناستى «جوندەۋى» ءتيىس. تاناكانىڭ قىتاي باسشىلىعىمەن تىعىز بايلانىسى بار كورىنەدى. سەبەبى, ونىڭ اكەسى كاكۋەيۋ تاناكا 1972 جىلى پرەمەر-مينيستر بولىپ تۇرعان كەزىندە پەكينمەن جاقىنداسۋعا قول جەتكىزىپتى.
چاۆەس وبامانى جاقتايدى
ۆەنەسۋەلا پرەزيدەنتى ۋگو چاۆەس ەگەر ءوزى اقش ازاماتى بولعان بولسا, وندا وسى ەلدەگى پرەزيدەنتتىك سايلاۋدا باراك وباماعا داۋىس بەرگەن بولار ەدىم دەپ مالىمدەدى. چاۆەس كەرى جاعدايدا وبامانىڭ دا وزىنە داۋىس بەرەتىنىنە ەش كۇماندانبايدى.
پرەزيدەنتتەر قايتا سايلانعان جاعدايدا ۆەنەسۋەلا مەن اقش قالىپتى قارىم-قاتىناستىڭ جاڭا كەزەڭىن باستار ەدى, دەيدى ودان ءارى چاۆەس. ۆەنەسۋەلا پرەزيدەنتىن سايلاۋ الداعى 7 قازانعا بەلگىلەنگەن. ال امەريكالىقتار ءوز مەملەكەتتەرىنىڭ باسشىسىن 6 قاراشادا سايلايتىنى بەلگىلى. چاۆەستىڭ وسىنداي جىلى ءسوز ساپتاسىنا قاراماستان, ەكى ەل اراسىنداعى قارىم-قاتىناس كۇردەلى كۇيىندە قالىپ كەلەدى. ءبىر ەلدە ەكىنشى ەلدىڭ ەلشىسى جۇمىس ىستەمەيدى.
قازا تاپقان سولداتتىڭ سانى قانشا؟
انتيتەررورلىق وپەراتسيالارعا وراي اۋعانستاندا ءالى دە 55 مىڭ امەريكالىق اسكەري قالىپ وتىر. ولار ەنگىزىلگەلى 11 جىل بولدى. وسى ارالىقتا قازا تاپقان امەريكالىق سولداتتار مەن وفيتسەرلەر سانى 2 مىڭ ادامعا جەتكەن. مۇنداي دەرەكتى «اسسوشايتەد پرەسس» اگەنتتىگى كولدەنەڭ تارتقان.
Brooking Institution تاۋەلسىز قورىنىڭ مالىمەتتەرى بويىنشا, قازا تاپقانداردىڭ 40 پايىزى لاڭكەستەردىڭ قولدان جاسالعان جارىلعىش قۇرىلعىلارىنا تۇسكەندەر بولىپ تابىلادى. سەبەپ-سالدار ءتىزىمىنىڭ ەكىنشى ورنىندا (شامامەن 30 پايىز) وزدەرىنە-وزدەرىنە وق جۇمساۋ تۇر. ال بريتاندىقتاردىڭ شىعىنى 433 ادام بولسا, قالعان 633 اسكەري باسقا ەلدەردىڭ ۇلەسىنە تيەدى.
«قىلجاقباس» ازامات بوساتىلدى
28 قىركۇيەك كۇنى 26 جاستاعى پاۆەل وندروۋش چەحيا پرەزيدەنتى ۆاتسلاۆ كلاۋسقا ويىنشىق تاپانشادان وق جۇمساپ, قاماۋعا الىنعان بولاتىن. ول بۇزاقىلىق جاسادى دەپ ايىپتالىپ, ەكى جىلعا دەيىن تۇرمەگە قامالۋى ءتيىس ەدى. بىراق يتار-تاسس ونىڭ قاماۋدان بوساتىلعانى تۋرالى اقپار تاراتتى.
پ.وندروۋش ءوزىنىڭ ارەكەتىن ۇكىمەت باسىنداعىلار حالىقتىڭ مۇڭىنا قۇلاق اسپايتىندىقتان, ەل تىلەگىن وسىنداي ارەكەتى ارقىلى جەتكىزبەك بولعانىمەن ءتۇسىندىرىپتى. ال وقيعا حراستاۆا قالاسىنداعى كوپىردىڭ سالتاناتتى اشىلۋى راسىمىندە ورىن العان ەدى. پرەزيدەنتتىڭ كۇزەتى بولسا, «بۇزاقىنىڭ» ءىس-قيمىلىنا بىردەن جاۋاپ قايتارۋعا دارمەنسىز بولىپ شىققان. پ.وندروۋش وقيعا ورنىنان 100 مەتر الىستاعان كەزدە عانا قولعا تۇسكەن. پرەزيدەنت كۇزەت قىزمەتىنىڭ باسشىسى يرجي سكلەنكا سول كۇنى-اق وتستاۆكا سۇراعان.
قىسقا قايىرىپ ايتقاندا:
گەرمانيا كانتسلەرى انگەلا مەركەل «مۇسىلمانداردىڭ پاكتىگى» فيلمىنە نارازىلىقتارعا بايلانىستى تۋنيسكە جوسپارلانعان ساپارىن كەيىنگە قالدىردى. جازدا تۋنيس پرەمەر-ءمينيسترى حامادي جەبەيلي رەسمي ساپارمەن گەرمانيادا بولعان ەدى. سول كەزدە مەركەل تۋنيسكە جاۋاپ ساپار جاساۋعا ۋادە بەرسە كەرەك.
كەشە ەستونيادا دارىگەرلەردىڭ ەرەۋىلى باستالدى. ازىرشە وعان تاللينن اۋرۋحانالارىنىڭ جانە تارتۋداعى ءبىر كلينيكانىڭ قىزمەتكەرلەرى قاتىسۋدا. الدا ەلدىڭ باسقا قالالارىنداعى مەديكتەر دە ولارعا قوسىلۋى ىقتيمال. ولاردىڭ تالابى دارىگەرلەردىڭ ەڭبەكاقىسىن – 20, مەدبيكەلەر مەن سانيتارلاردىڭ ەڭبەكاقىسىن 40 پايىزعا ۇلعايتۋ بولىپ تابىلادى.
رەسەي ليبەرال-دەموكراتيالىق پارتياسى «يابلوكانىڭ» سەركەسى سەرگەي ءميتروحيندى رلدپ فراكتسياسىنىڭ دەپۋتاتتارى بيزنەسپەن اينالىسادى دەپ جالعان اقپارات تاراتتى دەپ ايىپتادى. پارتيانىڭ سايتىندا ءميتروحيننىڭ سوتتا كۇتىلەتىنى جازىلىپتى. بۇل جەردە اڭگىمە ە.ماركين, يۋ.ناپسو, ۆ.سەمەنوۆ, ۆ.تاسكاەۆ جانە س.فۋرگال تۋرالى بولىپ وتىر
ينتەرنەت ماتەريالدارى نەگىزىندە ازىرلەندى.
