اعايىن بىردە تاتۋ, بىردە قاتۋ
جۇما, 28 قىركۇيەك 2012 6:56
رەسەي پرەزيدەنتى ۆلاديمير ءپۋتيننىڭ قىرعىز رەسپۋبليكاسىنا ساپارى ەكى جاققا دا ءساتتى بولعانداي. ءبىراز كەلىسىمگە قول قويىلدى. سوعان وراي قىرعىز اعايىنداردىڭ قالتاسىنا ءبىراز قارجى ءتۇسىپ, ورىستار ءوز اسكەرىنە جاي تاۋىپ, كوڭىلدەرى جايلاندى. ەكى جاق تا ريزا.
جۇما, 28 قىركۇيەك 2012 6:56
رەسەي پرەزيدەنتى ۆلاديمير ءپۋتيننىڭ قىرعىز رەسپۋبليكاسىنا ساپارى ەكى جاققا دا ءساتتى بولعانداي. ءبىراز كەلىسىمگە قول قويىلدى. سوعان وراي قىرعىز اعايىنداردىڭ قالتاسىنا ءبىراز قارجى ءتۇسىپ, ورىستار ءوز اسكەرىنە جاي تاۋىپ, كوڭىلدەرى جايلاندى. ەكى جاق تا ريزا.
ءتىل تابىسقان جاقسى. اسىرەسە, كورشىڭدە تىنىشتىق بولعانعا نە جەتسىن. بۇعان دەيىن ماسكەۋ مەن بىشكەكتىڭ اراسى بىردە تاتۋ, بىردە قاتۋ بولىپ كەلگەنى دە بەلگىلى. كەشەگى باكيەۆتىڭ كەزىندە سول قارىم-قاتىناس ايتارلىقتاي ساۋداعا ءتۇسىپ, ءبىراز قارجىعا ۋادە جاسالىپ, اياعى قۇردىمعا كەتكەندەي بولعان. سونان سوڭ ەكى ەلدىڭ اراسىندا ارازدىق دا ءجۇردى. ءتىپتى قىرعىزدىڭ جاڭا پرەزيدەنتى المازبەك اتامباەۆتىڭ ماسكەۋگە ساپارىن دا ونشا ءساتتى دەۋگە كەلە قويماس ەدى. ەندى رەسەي باسشىسىنىڭ قىرعىز ەلىنە ساپارىنىڭ ناتيجەسى سالماقتى كورىنەدى.
ءسىرا, ەكى جاق تا وتكەننەن شىنداپ قورىتىندى جاساسا كەرەك. ءبىرى ەڭكەيگەندە, ەكىنشىسىنىڭ شالقايۋىنان پايدا جوقتىعىن مىقتاپ ۇققانداي. بۇگىنگى كەلىسىمدەردە ەكى جاقتىڭ مۇددەسى ايقىن. بۇرىن بىشكەك جاعى كوبىنە اسكەرىڭدى وسىندا قالدىرعىڭ كەلسە, الدىمەن مول قارجى تولە دەپ, ماسكەۋگە بىرجاقتى شارت قويعانداي بولۋشى ەدى. ەندى سول اسكەردىڭ قىرعىزستانداعى تۇراقتىلىق ءۇشىن كەرەك ەكەنى ەسكەرىلىپ وتىر. باس كوتەرە باستاعان ەكسترەميزم, لاڭكەستىك تە وسىنداعى ورىس ءاسكەرلەرىنىڭ قولى ۇزىندىعىن ويلاماي تۇرا المايدى.
ءسويتىپ, ورىستاردىڭ بىرىككەن اسكەري بازاسى بۇل ەلدە 15 جىلعا دەيىن ساقتالماق, قاجەت بولسا, ودان ءارى تاعى دا بەس جىل قوسىلادى. ورىستار بىردەن 49 جىلعا كەلىسەيىك دەگەن ەكەن, قىرعىزدار ارعى جاعىن ءومىر كورسەتەدى دەپتى. ەكى ەل اراسىنداعى كەلىسىمدەرگە بايلانىستى وتكەن ءباسپاسوز كونفەرەنتسياسىندا ۆ.پۋتين كەزىندە قىرعىزستاندا وزدەرىنىڭ اسكەري فورپوستىن جاساۋ جونىندە قىرعىزداردىڭ ءوتىنىشى بولعانىن مالىمدەدى. ءسويتىپ, بۇل بازا ەكى جاققا دا كەرەك ەكەن.
سونىمەن بىرگە, رەسەي جاعى وزدەرىنىڭ ستراتەگيالىق مۇددەسىنە قىزمەت ەتەتىن بۇل بازاسى ءۇشىن قىرعىز رەسپۋبليكاسىنا قارجىلاي وتەم تولەيدى. تولەگەندە, بۇل ەلدىڭ موينىنا سالماق بولىپ تۇرعان 489 ميلليون دوللار قارىزدى كەشىرمەك. الدىمەن 189 ميلليونىن بىردەن كەشىرىپ, سونان سوڭ بىرتىندەپ جىلما-جىل كەشىرە بەرمەك. تاعى دا بۇرىن اقش-تىڭ اسكەري بازاسى بولعان «ماناس» اۋەجايىن ازاماتتىق اۋەجايعا اينالدىرۋعا بەلسەنە قاتىسپاققا ۋادە بەردى. بۇدان ماسكەۋ ەكى ەسە ۇتپاق. اقش-تى ىعىستىرعانى نە تۇرادى!
ايرىقشا اڭگىمە تۋدىرعان جاي – رەسەيدىڭ قامبار اتا-1 گەس-ءىن جانە جوعارعى نارىن گەس-تەر كاسكادىن سالۋ ءجونىندەگى جوباعا باستاماشىلىق كورسەتىپ, ونى جۇزەگە اسىرۋعا قازاقستان مەن وزبەكستاندى شاقىرۋى بولدى. پۋتين بىرگە سالايىق, بىرگە پايدالانايىق, دەدى. ول بۇل جوبا كەشەگى كەڭەس زامانىندا جاسالعانىن جانە ونىڭ تەك پايداسى بولماسا, ەشكىمگە زيانى جوقتىعىن ەسكە سالدى.
وسى جەردە پۋتين مەن اتامباەۆتىڭ ۋاجىنە توقتالا كەتكەن ءجون بولار. ولار جاڭا سالىناتىن گەس-تەر سۋدى ءتيىمدى پايدالانۋعا مۇمكىندىك بەرەدى دەيدى. ويتكەنى, قامبار اتا-1 گەس-ءى قىستا تولىق قۋاتىندا جۇمىس ىستەپ, ەلەكتر قۋاتىن مول ءوندىرۋمەن قاتار, كوپ مولشەردە سۋ جىبەرىپ, ونى توقتاعۇل قويماسىنا جيناقتاپ, جازدا تومەندەگى ەلدەرگە بوساتا الادى. انىق سولاي جۇزەگە اسار بولسا, بۇل ارمان يدەيا عوي. كوڭىلگە مىقتاپ-اق قونادى. ەندى بۇل يدەيا سول قازاقستان مەن وزبەكستان باسشىلارىمەن باس قوسىلعان كەزدە نەگە ايتىلمايدى؟ ماسەلەنى بىرلەسىپ شەشەيىك دەپ ولار تالاي رەت ۇسىنىس تا جاسادى ەمەس پە؟ ءتىپتى يسلام كاريموۆ كىجىنىپ تە سويلەدى.
ءسىرا, ەل باسشىلارىنا اعىنان جارىلىپ ۇعىنىسۋى, ءبىر-ءبىرىن تىڭداي ءبىلۋى جەتىسپەي جاتادى-اۋ. سودان دا اعايىن بىردە قاتۋ, بىردە تاتۋ. ال اركەز تاتۋ بولعانعا نە جەتسىن.
ماماديار جاقىپ, «ەگەمەن قازاقستان».
