پرەزيدەنتتىڭ وكىلەتتىگىن توقتاتۋ تۋرالى شەشىمى قازاقستان حالقىنا ۇلكەن وي سالىپ, وسى وتىز جىلدا ءجۇرىپ وتكەن جولىمىزعا ءبىر بۇرىلىپ قاراعانداي كۇي كەشكەنىمىز انىق. قازاقستان دارا مەملەكەت رەتىندە تاۋەلسىزدىگىن جاريالاپ, جەكە شاڭىراق بولۋدى ۇيعارعان ساتىندە بولاشاق باعدارىمىزدى انىقتاپ, ەلىمىزدى الەمدىك كەڭىستىك الدىندا ەڭسەسى بيىك ەل رەتىندە باستاپ ءجۇرۋ وڭايعا سوقپاعانى بەلگىلى. پرەزيدەنت نۇرسۇلتان نازارباەۆتىڭ وسىناۋ داعدارىستى جىلدارداعى ىرگەلى ىستەردى ەلىم, حالقىممەن بىرگە اتقاردىم دەۋىنىڭ وزىندە ۇلكەن كورەگەندىلىك جاتقانى بەلگىلى. وسى وتىز جىل ىشىندە ەل ىرگەسىن شايقالتپاي, شەكارامىزدى شەگەندەپ, تورتكۇل دۇنيەمەن تەرەزەسىن تەڭ ۇستاۋعا تىرىسقان بىلىكتى قايراتكەرلىك ساياساتى بۇگىنگى كۇننىڭ جەمىسى. تاۋەلسىز قازاقستان حالقى سىندارلى جولداردان سۇرىنبەي ءوتىپ, بيىك-بيىك بەلەستەردى باعىندىردى. الەم بيىگىنەن كورىندى. ۇلتتىق تاريحىمىزدى تانۋداعى, مادەنيەتىمىزدى جاڭعىرتۋدا, مەملەكەتتىك ءتىلدى قالىپتاستىرىپ, دامىتۋعا سىڭىرگەن ەڭبەگىنىڭ ايرىقشا ەكەندىگىن اتاپ وتۋگە ءتيىسپىز. بۇگىندە تاريحي تامىرى تەرەڭگە باستايتىن قازاق ەلى مەرەيى ۇستەم, دارقان ەل رەتىندە دامۋدىڭ داڭعىل جولىنا ءتۇستى.
مەن نۇرسۇلتان ءابىش ۇلىن پرەزيدەنت بولعان العاشقى كۇننەن باستاپ بىلەمىن. وسى جىلداردا حالقىنا بارىنشا قاجىر-قايراتىمەن, ۇلتىنا دەگەن زور قۇرمەت, سۇيىسپەنشىلىگىمەن قىزمەت ەتتى. بۇگىندە ەلىمىزدىڭ جەتكەن جەتىستىكتەرى از ەمەس. ساليقالى شەشىم قابىلداپ, قازاقستاننىڭ كەلەشەگىن بۇگىنگى جاس ۇرپاققا سەنىپ تاپسىرعان ەلباسى ءالى دە ەلىمىزدىڭ الداعى اسار اسۋلارىندا ەلىمەن بىرگە بولاتىنىنا سەنەمىز.
ومىرزاق ايتباي ۇلى,
«قازاق ءتىلى» حالىقارالىق قوعامىنىڭ پرەزيدەنتى, اكادەميك
