كەڭەستە ەگىس ناۋقانىن ۋاقىتىلى قامتاماسىز ەتۋ جانە القاپتاردى جوسپارلانعان قامتۋ بويىنشا جۇرگىزىلىپ جاتقان جۇمىستار تۋرالى اۋىل شارۋاشىلىعى ءمينيسترى س. وماروۆ باياندادى. 2019 جىلى اۋىل شارۋاشىلىعى داقىلدارى ەگىلگەن القاپ كولەمى 22,3 ملن گا قۇرادى, بۇل وتكەن جىلعى دەڭگەيدەن 1,3%-عا ارتىق. قولدا 147 مىڭ تراكتور, 79,4 مىڭ سوقا, 249 مىڭ توپىراق وڭدەيتىن قۇرال بار.
ءوز كەزەگىندە ەنەرگەتيكا ۆيتسە-ءمينيسترى ب. اقشولاقوۆ اگرارشىلاردى قاجەتتى جانار-جاعارمايمەن قامتاماسىز ەتۋ تۋرالى باياندادى. ماسەلەن, مۇناي وڭدەۋ زاۋىتتارىنىڭ باعاسى 160 تەڭگە/ليتر (193 مىڭ تەڭگە/توننا) بولسا, وپەراتورلاردىڭ جەتكىزۋىن ەسكەرۋمەن وڭىرلەردە باعاسى 174 تەڭگە/ليتر-ءدى قۇرايدى, بۇل نارىقتاعى باعادان 15-20 تەڭگەگە ارزان.
سەلەكتورلىق رەجيمدە سونىمەن قاتار نەگىزگى استىق ەگەتىن وڭىرلەردىڭ — اقمولا, قوستاناي جانە سولتۇستىك قازاقستان وبلاستارىنىڭ, سونداي-اق 10 وبلىستىڭ اكىمدەرى تىڭدالدى.
بۇدان وزگە, كەڭەس بارىسىندا اۋىل شارۋاشىلىعى قۇرىلىمدارىنىڭ وكىلدەرى ءسوز سويلەدى. «رودينا» اگروفيرماسى» جشس ديرەكتورى ي. ساۋەر, «ۆيشنەۆسكوە» جشس ديرەكتورى پ. رافالسكي شارۋاشىلىقتار تۇرعىسىنان اتقارىلىپ جاتقان جۇمىستار تۋرالى اقپارات بەردى. كەڭەس قاتىسۋشىلارى قوزعاعان ەگىس الاڭدارىن سۋارۋ ماسەلەلەرىنە ۆيتسە-مينيستر ە. نىسانباەۆ تۇسىنىكتەمە بەرىپ ءوتتى.
تالقىلاۋ قورىتىندىسى بويىنشا قر پرەمەر-ءمينيسترى اسقار مامين كوكتەمگى ەگىس ناۋقانىنا ازىرلىك جۇرگىزىلىپ جاتقانىن, ال وڭتۇستىك وڭىرلەردە ەگىس ناۋقانى باستالىپ كەتكەنىن اتاپ ءوتتى. وسىعان بايلانىستى وبلىستاردىڭ اكىمدىكتەرىنە اۋىل شارۋاشىلىعى داقىلدارىن ەگۋدى وڭتايلى اگروتەحنيكالىق مەرزىمدى ساقتاي وتىرىپ قامتاماسىز ەتۋ تاپسىرىلدى. اقمولا, اقتوبە, قوستاناي جانە سولتۇستىك قازاقستان وبلىستارىنىڭ اكىمدەرىنە پروبلەمالىق اگروحولدينگتەردىڭ ەگىستىكتەرىنە ەگىن ەگىلۋىن قامتاماسىز ەتۋگە ەرەكشە نازار ءبولۋ قاجەت.
«سۇرانىسقا يە اۋىل شارۋاشىلىعى داقىلدارىنىڭ ەگىس الاڭدارىن ءارتاراپتاندىرۋدى جالعاستىرۋ كەرەك, — دەپ اسقار مامين, مۇنىڭ «ىشكى نارىقتى قولجەتىمدى وسىمدىك شارۋاشىلىعىنىڭ ونىمدەرىمەن قامتاماسىز ەتۋمەن, وڭدەۋ كاسىپورىندارىن جۇكتەمەلەۋمەن جانە مال شارۋاشىلىعىنىڭ جەم بازاسىن نىعايتاۋمەن تىكەلەي بايلانىستى» ەكەنىن اتاپ ءوتتى.
پرەمەر-مينيستر اۋىل شارۋاشىلىعى مينيسترلىگىنە ەنەرگەتيكا مينيسترلىگىمەن بىرلەسە وتىرىپ, وڭىرلەرگە ءموز-دەردەن ديزەلدى وتىندى تيەپ جەتكىزۋ ماسەلەسىن تۇراقتى باقىلاۋدا ۇستاۋدى تاپسىرىپ, ەشقانداي ىركىلىستەر بولماۋى ءتيىس ەكەنىن ەسكەرتتى.
