قازىرگى كۇنى قازاقستان الەمدىك پروگرەسس كوشىنە ىلەسكەن, جاھاندىق ساياساتتا ءوز ورنى بار تۇركى مەملەكەتى بولىپ قالىپتاسىپ ءبىتتى دەۋگە بولادى. قازاق ەلىنىڭ باي تاريحي تاجىريبەسى مەن نۇراعانىڭ ناعىز كوشباسشىعا ءتان سيپاتتارى سايكەس كەلگەندىكتەن وسىناۋ يگىلىككە قول جەتىپ وتىر. مۇنداي باقىت كەز كەلگەن ەلدىڭ ماڭدايىنا جازىلا بەرمەيدى.
نۇراعا - ەلدە ءتارتىپ پەن تۇراقتىلىقتى بەكەم قىلىپ, ەڭ دۇرىس باعىتتى تاڭداعان تۇلعا. شىنايى دەموكراتيا دەگەنىمىز انارحيا ەمەس, ەل زاڭدارىنىڭ قالتقىسىز ورىندالىپ, ەرەجەلەر مەن ءتارتىپتىڭ ساقتالۋى, بيلىكتى مويىنداۋ ەكەندىگىن وز ىسكەرلىگىمەن كورسەتتى. ول جەڭىل جولدى تاڭداپ, پوپۋليزمگە ۇرىنعان جوق, ىشكى-سىرتقى سىن-قاتەرلەرگە قاراماستان ەلدىڭ الەۋمەتتىك دامۋىنىڭ داڭعىل جولىن تاڭدادى. ءسويتىپ, كوشباسشىنىڭ شىدامدىلىعى, ەرىك-جىگەرىنىڭ بەكەمدىگى, پرينتسيپيالدىلىعى وز ناتيجەسىن بەردى. مىنەكەي, قوعامدىق-ەكونوميكالىق دامۋدىڭ ۇلى اعىسىنا ىلەسكەن قازاقستان رەسپۋبليكاسىنىڭ قۇتتى بايراعىن كەيىنگى بۋىننان وسىپ شىققان جەتەكشىلەردىڭ ءبىرىنىڭ قولىنا جارقىن جۇزبەن تاپسىرىپ وتىر.
دەگەمەن, ورتالىق ازيادا قازاق پەن قىرعىزدىڭ باۋرلاستىعىنداي, دوستىعىنداي قاسيەتتى, جاقىن قارىم-قاتىناس جوق. قوس حالىق وزدەرى قۇرعان قازاقستان مەن قىرعىزستاننىڭ اراسىنداعى كوپسالالى مامىلە, ىسكەرلىك بايلانىستاردى بەكەم قىلىپ, وزگەلەرگە باۋىرلاستىقتىڭ ۇلگىسىن كورسەتە السا عانا تاريح جۇكتەگەن مىندەتتى ابىرويمەن ارقالاعان بولىپ شىعادى. قىرعىز بەن قازاقتىڭ باۋىرلاستىعى - وزگەشە فەنومەن. بۇل تابيعي بىرلىك-باۋىرلاستىقتى تۇسىنۋدە, ساقتاۋدا جانە تەرەڭدەتە تۇسۋدە, البەتتە, ليدەرلەردىڭ ءرولى زور بولادى. نۇراعا - الىستى بولجاي بىلەتىن كورەگەندىگىمەن قازاق-قىرعىز باۋىرلاستىعىنىڭ جاڭا پاراقتارىن اشىپ, ونى سونى بيىكتەرگە كوتەرگەن كوشباسشى. ونىڭ تاۋەلسىزدىكتىڭ العاشقى جىلدارىندا بىشكەكتەگى قىرعىز فيلارمونياسى زالىندا قالىڭ جۇرتتىڭ الدىندا تۇرىپ ايتقان: “مەن قىرعىز حالقىن قاتتى جاقسى كورەمىن. قازاقستاننىڭ بيلىگىنە مەنەن كەيىن قانداي ازامات كەلەدى, وسىناۋ باۋىرلاستىق-دوستىق قاتىناستارعا قالاي قارايدى, ول جايىندا قازىر ەشتەڭە دەي المايمىن. قازاق پەن قىرعىزدىڭ باۋىرلاستىعىن تۇبەگەيلى بەكەمدەپ الۋعا قاجەت ىستەرىمىز بولسا, قازىر ىستەۋىمىز كەرەك”, - دەگەن مازمۇنداعى سوزدەرى بۇگىندە ءبىراز جاننىڭ ەسىندە بولسا كەرەك. بۇل قاتارداعى ساياساتكەردىڭ جاي عانا ايتا سالعان ءسوزى ەمەس ەدى. بۇل شىنايى تۋىستىڭ, ناعىز كوشباسشىنىڭ جۇرەگىنىڭ تۇپكىرىنەن شىققان سوز بولاتىن. شىنايى قازاقتىڭ سوزى ەدى! سوندىقتان ادامداردىڭ كوڭىلىندە ءالى كۇنگە ساقتالىپ, ۇمىتىلماي كەلەدى.
نۇراعانىڭ ءار قادامى, ايتقان ءسوزى ۇنەمى تەرەڭنەن تولعاۋىمەن, نەگىزدىلىگىمەن ەرەكشەلەنىپ تۇرادى. نۇراعا وسى جولى دا ءوزىنىڭ كوسەمدىگىن كورسەتتى دەر ەدىم. نۇراعا شىنىمەن دە كوسەمدىگىن تانىتتى! ونىڭ بۇل شەشىمى, بۇيىرسا, كوپتەگەن ەلدىڭ جەتەكشىلەرىنە ۇلگى بولىپ, جول كورسەتەدى دەپ ويلايمىن. نۇرسۇلتان نازارباەۆ وسىناۋ قادامى ارقىلى وزىنىڭ ورتالىق ازيادا عانا ەمەس, الەمدەگى كوشباسشىلىق, ادامي ابىرويىن اسقاقتاتتى. سونىمەن قاتار, ەلىنىڭ دە, حالقىنىڭ دا مارتەبەسىن اسىردى. ەڭ جوعارعى بيلىكتى وز ىقتيارىمەن جاڭا بۋىنعا تاپسىرىپ بەرۋدىڭ ۇلگىسى بولدى. وسى ارەكەتىمەن-اق قازاق حالقىنىڭ رۋحىن كوتەرىپ, حالىقارالىق دەڭگەيدەگى بەدەلىن بيىكتەتتى.
نۇراعانىڭ باي تاجىريبەسى, جەتەكشىلىك حاريزماسى, ۇلتتىق جانە حالىقارالىق دەڭگەيدەگى ءابىرويى الى دە كوپ ۋاقىت بويى ىقپالىن جويمايدى, كەرىسىنشە, ونىڭ كوشباسشىلىق ەرەكشەلىكتەرى, كوسەمدىك سيپاتتارى, الەم ساياساتىنا قوسقان ۇلەسى تۋراسىنداعى شىنايى پىكىرلەر ەندى اشىق ايتىلا باستايدى. نۇراعانىڭ كوسەمدىگىن, ليدەرلىك فەنومەنىن جاھانعا تانىتۋ ورتالىق ازيا وقىمىستىلارىنىڭ مىندەتتەرى بولۋى ءتيىس دەپ بىلەمىن. سونىمەن بىرگە, قازاق-قىرعىز الەۋمەتتانۋشىلارى, ساياساتتانۋشىلارى ەل ىشىنەن وسىپ شىققان كوشباسشىنىڭ ومىر جولىن, ليدەرلىك قاسيەتتەرى مەن تاجىريبەلەرىن, اتقارعان قىزمەتى مەن سىڭىرگەن ەڭبەگىن ادامزاتتىق دەڭگەيگە كوتەرىپ, تانىتۋدا بەلسەندىلىك كورسەتۋى كەرەك دەگەن پىكىردەمىن. نۇراعا – ادامزاتتىڭ العىسىنا, قۇرمەتى مەن ماراپاتىنا لايىق تۇلعا. مۇنى ارقايسىمىز ءبىلىپ, مويىنداۋىمىز كەرەك, ماقتانۋىمىز قاجەت.
نۇراعامىزعا زور دەنساۋلىق, قاجىماس قايرات, ۇزاق عۇمىر تىلەيمىن. بار بولسىن! ەڭ جوعارعى بيلىكتى بەيبىت جولمەن تاپسىرعانىڭىز, ەڭ تۋرا جولدى كورسەتكەنىڭىز ءۇشىن, اعا, سىزگە مىڭ تاعزىم!
سۋلaيمaن كaيىپوۆ,
قىرعىز رەسپۋبليكاسى ءبىلىم جانە تەحنيكا سالاسى بويىنشا مەملەكەتتىك سىيلىق يەگەرى,
تاريح عىلىمدارىنىڭ دوكتورى, پروفەسسور
