مىقتىعا باعىنباۋعا بولمايدى
جۇما, 3 تامىز 2012 7:23
دۇبىرگە تولى دۇنيە
مىنە, جارتى ايدان بەرى كورەيا حالىق دەموكراتيالىق رەسپۋبليكاسىنىڭ باس شتابى باستىعى لي ەن حونىڭ ورنىنان الىنعانى جونىندەگى اڭگىمە باسەڭدەمەي كەلگەن. ەندى توقتايتىن بولار. جۇرت ەندى ونىڭ سەبەبىن ءبىلىپ وتىر. ۆيتسە-مارشال ەلدىڭ جاس كوسەمىمەن ءتىل تابىسپاعان ەكەن.
جۇما, 3 تامىز 2012 7:23
دۇبىرگە تولى دۇنيە
مىنە, جارتى ايدان بەرى كورەيا حالىق دەموكراتيالىق رەسپۋبليكاسىنىڭ باس شتابى باستىعى لي ەن حونىڭ ورنىنان الىنعانى جونىندەگى اڭگىمە باسەڭدەمەي كەلگەن. ەندى توقتايتىن بولار. جۇرت ەندى ونىڭ سەبەبىن ءبىلىپ وتىر. ۆيتسە-مارشال ەلدىڭ جاس كوسەمىمەن ءتىل تابىسپاعان ەكەن.
بۇل ەلدە ءبارى جۇمباق. ادەتتە وزگەرىستىڭ ءبىر سەبەبى ايتىلادى, كەيىن باسقا بولىپ شىعادى. لي ەن حونىڭ ورنىنان الىنۋى, الدىمەن ونىڭ دەنساۋلىعىنا بايلانىستى دەلىندى, بىراق جۇرت وعان سەنگەن جوق. سودان كەيىن ءتۇرلى-ءتۇرلى بولجام ايتىلدى. كحدر-دىڭ جاس كوسەمى مارشال (بۇل اتاقتى بيىلعى شىلدەدە العان) كيم چەن ىن ءوز اينالاسىن ەسكى كادرلاردان تازارتپاقشى ەكەن, اسكەريلەر اراسىنداعى ءوز بەدەلىن كوتەرمەكشى ەكەن دەلىندى. جالپى ەلدە بيلىك ءۇشىن كۇرەستىڭ جاڭا ءبىر تولقىنى پايدا بولعانى انىقتاي كورىنگەن.
ءبىر ەرەكشەلىك – بۇل ەلدە ءدۇنيەنىڭ تۇتقاسى اسكەريلەردىڭ قولىندا. ءتىپتى ەكونوميكاعا باسشىلىقتى دا اسكەريلەر جۇزەگە اسىرادى. ەل ەكونوميكاسىنىڭ كۇيزەلىستى جاعدايىنىڭ ءبىر سەبەبى سوندا ەكەنى بەلگىلى. ءبارى دە اسكەري مۇددەگە باعىندىرىلادى. سودان دا بەدەلى شارىقتاپ-اق تۇرعان لي ەن حونىڭ بيلىكتەن شەكتەتىلۋى مۇلدە كۇتپەگەن وقيعا ەدى.
جۇرت پىكىرى ءبىر جەردەن شىعىپ وتىرعانداي. راسىندا دا لي ەن حونىڭ كەتۋى ەل باسشىسى كيم چەن ىنمەن ءتىل تابىسپاۋىنان ەكەن. جاس كوسەم ەل جاعدايىن ەسكەرگەن بولار, ەكونوميكالىق رەفورما جاساۋعا بەت بۇرعاندا, باس شتاب باستىعىنىڭ قارسىلىعىنا ۇشىرايدى. وعان باستى سەبەپ, ەكونوميكاعا رەفورما جاساۋ ءۇشىن ونى اسكەريلەردەن اجىراتۋعا تۋرا كەلەدى. ال وعان لي ەن حو كونبەگەنگە ۇقسايدى. كۇشتى كوندىرۋگە ءتيىس, ايتپەسە كۇشتى بولمايدى. ءتىپتى بۇرىنعى باس شتاب باستىعىنىڭ ىقپالىنداعىلار قارۋلى قارسىلىق كورسەتپەك بولعان دەگەن دە ءسوز بار. اڭگىمەنىڭ ءتۇيىنى ونىڭ بيلىك توبىنان كەتكەنىندە عانا. ەندى بارلىق بيلىك, ەڭ الدىمەن اسكەري كۇشتەر كيم چەن ىننىڭ قولىندا. سونىڭ ايتقانى بولادى. بۇل جەردە جۇرتتى قىزىقتىراتىنى – ەكونوميكالىق رەفورما. ونسىز ەلدىڭ بۇدان ءارى ءومىر ءسۇرۋى ءدۇدامال. ساراپشىلاردىڭ ايتۋىنشا, مۇنداي رەفورما ءجۇرگىزۋدى كورەي كوسەمىنە قىتايلار ايتىپ وتىرعان كورىنەدى. ويتكەنى, ءابدەن شەكتەن شىققان كورەي حالقى كورشى ەلگە لاپ بەرۋى مۇمكىن. قانشا قۋاتتى دەگەنمەن, ونى قحر جاعدايى كوتەرمەيدى. شىن سولاي بولىپ, كحدر-دە ەكونوميكالىق رەفورما ءجۇزەگە اسار بولسا, ول ەلدەگى جاعدايعا ۇلكەن وزگەرىس اكەلەرى انىق.
لي ەن حونىڭ كەتۋىنەن كەيىن بيلىكتەگى كۇشتەردىڭ جاڭاشا ىرىكتەلەرى زاڭدى. كيم چەن ىننىڭ ماڭايى كۇشەيدى. ال سول كۇشەيگەن توپ ەلدىڭ مۇددەسىن ويلاپ, قاجەتتى رەفورمالاردى جۇزەگە اسىرار بولسا, ونىڭ يگىلىگىن حالىق كورەر ەدى, دەگەن ءۇمىت تە قىلاڭ بەرەدى.
كحدر – الەم نازارىنداعى ەل. قانشا جاسىرىن جاسالعانمەن, ونداعى وزگەرىس ءمالىم بولىپ جاتادى. وسى ەلدەگى جاعداي تۇزەلسە, كورشىلەرىنە دە تىنىش. جۇرت سونى تىلەيدى. ءتىپتى ەلدىڭ جاس كوسەمىنىڭ قاسىنان ءبىر سۇلۋدىڭ كورىنۋىن دە الەمدىك اقپارات قۇرالدارى جاپىرلاي جاريالاپ, اقىرىندا ونىڭ ەل باسشىسىنىڭ جارى ەكەنىن بىلگەن سوڭ, جاقسىلىققا جورىعان. جالپى جۇرت بۇل ەلدەن جاقسىلىق كۇتەدى.
ماماديار جاقىپ, «ەگەمەن قازاقستان».
