كورشى ەلدىڭ قۇرمەتى
جۇما, 15 ماۋسىم 2012 7:30
قازاق عالىمى دۇكەن ءماسىمحان ۇلى شىۇ-نىڭ حالىقارالىق سىيلىعىنا يە بولدى
تاياۋدا قىتاي حالىق رەسپۋبليكاسىنىڭ استاناسى پەكين قالاسىندا شانحاي ىنتىماقتاستىق ۇيىمىنا مۇشە ەلدەر مەملەكەت باسشىلارى كەڭەسىنىڭ كەڭەيتىلگەن وتىرىسى بولىپ وتكەنى بەلگىلى.
جۇما, 15 ماۋسىم 2012 7:30
قازاق عالىمى دۇكەن ءماسىمحان ۇلى شىۇ-نىڭ حالىقارالىق سىيلىعىنا يە بولدى
تاياۋدا قىتاي حالىق رەسپۋبليكاسىنىڭ استاناسى پەكين قالاسىندا شانحاي ىنتىماقتاستىق ۇيىمىنا مۇشە ەلدەر مەملەكەت باسشىلارى كەڭەسىنىڭ كەڭەيتىلگەن وتىرىسى بولىپ وتكەنى بەلگىلى.
وسى ۇلكەن جيىن اياسىندا, شىۇ-نىڭ «جىبەك جولى: گۋمانيتارلىق ىنتىماقتاستىق» دەپ اتالاتىن حالىقارالىق سىيلىعىنا يە بولعاندار پەكيندەگى «حالىق قۇرىلتايى سارايىندا» سالتاناتتى جاعدايدا ماراپاتتالدى.
ماراپات يەلەرىنە سىيلىقتى قىتاي ۇكىمەتى مەن شىۇ اتىنان قحر مەملەكەتتىك كەڭەسىنىڭ ءمۇشەسى داي بيڭگو جانە ءتاجىكستان رەسپۋبليكاسىنىڭ پرەزيدەنتى ەمومالي راحمون تابىس ەتتى.
«جىبەك جولى: گۋمانيتارلىق ىنتىماقتاستىق» سىيلىعى – تاريحي ۇلى «جىبەك جولىنىڭ» ءداستۇرلى «بەيبىتشىلىك, تاتۋ كورشىلىك, ىنتىماقتاستىق» رۋحىن ءساۋلەلەندىرىپ, «جىبەك جولى» بويىنداعى ەلدەردىڭ دوستىعىن, ىنتىماقتاستىعىن نىعايتۋعا, شىۇ-عا مۇشە ەلدەر اراسىنداعى رۋحاني بايلانىستاردى تەرەڭدەتۋ مەن دوستىقتى نىعايتۋعا ەلەۋلى ۇلەس قوسىپ جۇرگەن قىتايلىق جانە شەتەلدىك تۇلعالارعا بەرىلەتىن حالىقارالىق سىيلىق. بۇل جولى وعان شىۇ-عا مۇشە مەملەكەتتەردىڭ ساياسات, ادەبيەت, ونەر سالالارىندا جەمىستى ەڭبەك ەتىپ جۇرگەن كورنەكتى وكىلدەرى يە بولدى. قازاقستاننان اقىن, اۋدارماشى, ل.ن. گۋميلەۆ اتىنداعى ەۇۋ قىتاي ءتىلى كافەدراسىنىڭ مەڭگەرۋشىسى, فيلولوگيا عىلىمدارىنىڭ دوكتورى, پروفەسسور, حالىقارالىق «الاش» ادەبي سىيلىعىنىڭ يەگەرى دۇكەن ءماسىمحان ۇلى ماراپاتتالعان بولسا, رەسەيدەن كورنەكتى ونەر قايراتكەرى, كسرو حالىق ءارتيسى, «رەسەي-قىتاي قارىم-قاتىناسىنىڭ 60 جىلدىعىنا ەڭبەگى سىڭگەن قايراتكەر» ميرا كولتسوۆا, ال اسپاناستى ەلىنىڭ ءوزىنەن كورنەكتى تۇركولوگ-عالىم, پروفەسسور حۋ چجەنحۋا, تاجىكستاننان وسى ەلدىڭ قحر-داعى توتەنشە جانە وكىلەتتى ەلشىسى راشيد اليموۆ, ءوزبەكستاننان مادەنيەت قايراتكەرى گۇلنار كارىموۆا, قىرعىزستاننان مەملەكەت جانە قوعام قايراتكەرى سۇلتان راەۆ يە بولدى.
ماراپاتتاۋ راسىمىندەگى قۇتتىقتاۋ ءسوزىندە قحر «بەيبىتشىلىك ساپارى» مادەني بايلانىستار ورتالىعىنىڭ پرەزيدەنتى, شىۇ بۇرىنعى باس حاتشىسى چجاڭ دەگۋان مىرزا: «قازاقستاندىق عالىم دۇكەن ءماسىمحانۇلىنا بۇل سىيلىق ونىڭ قازاق ەلىندەگى قىتاي ادەبيەتىن اۋدارۋ مەن زەرتتەۋ سالاسىنداعى ەلەۋلى ەڭبەگى ءۇشىن, سونداي-اق قازاقستان ءۇشىن كوپتەگەن قىتايتانۋشى ماماندار ءتاربيەلەپ, ەكى ەل حالقىنىڭ دوستىعى مەن تۇسىنىستىگىن نىعايتۋعا قوسقان قوماقتى ۇلەسى ءۇشىن بەرىلىپ وتىر», – دەدى.
ماراپاتتاۋ شاراسىنىڭ سوڭى شىۇ ەلدەرىنەن كەلگەن قىلقالام شەبەرلەرىنىڭ «تاتۋ كورشى» اتتى كوركەمسۋرەت كورمەسىنە ۇلاستى.
«ەگەمەن-اقپارات».
