اقتاۋدا ەرتە كوكتەمدە تەڭىز جاعاسىنا شايىلىپ شىققان شاياندار ونىڭ ەتىنە قۇمارلاردى قارق قىلىپ تاستار ما ەدى, ەگەر وعان ءتيىستى ورىندار مەن تابيعات جاناشىرلارى ارالاسپاعاندا؟! تەڭىزدە بولعان قاتتى جەل جۇزدەگەن شاياندى تولقىنمەن لاقتىرىپ جاعالاۋعا شىعارىپ تاستادى. قىسقى سۋىقتان سوڭ ءالى كۇش جيىپ ۇلگەرمەگەن شايانداردىڭ ءوز كۇشتەرىمەن تەڭىزگە جەتۋى قيىن. وسىلايشا «سولدات جاعاجايى» دەپ اتالاتىن تەگىس جاعالاۋدا قايراڭداپ قالعان شاياندارعا قامقورلىق تانىتىپ, قايتادان سۋعا سالۋدىڭ ورنىنا كەيبىرەۋلەر ارنايى ىدىستارمەن كەلىپ شايانداردى ۇيلەرىنە تاسي باستاعان.
شايانداردىڭ جاعالاۋعا توپتاپ شىعارىلۋىن ءتيىستى ورىندار – ماڭعىستاۋ وبلىسى بالىق شارۋاشىلىعى ينسپەكتسياسى مەن ماڭعىستاۋ وبلىسى بويىنشا ەكولوگيا دەپارتامەنتى الدەبىر زاڭ بۇزۋشىلاردىڭ قولىمەن جاسالعان قاساقانا ۇيىمداستىرىلعان ءىس ەمەس, تابيعات اسەرى, تەڭىزدەگى قاتتى جەلدىڭ اسەرىنەن بولىپ تۇراتىن جاعداي دەپ ءتۇسىندىردى. سونىمەن قاتار وقيعاعا بايلانىستى ەكولوگيالىق زاڭدىلىقتى بۇزۋ دەرەگى, ونى تەكسەرۋگە قاتىستى شاعىم تۇسپەگەندىكتەن, تەكسەرۋ-تەرگەۋ جۇمىستارى جۇرگىزىلمەيدى.
تابيعات جاناشىرلارىنىڭ ايتۋىنشا, ساۋىردەن باستاپ ۋىلدىرىق شاشاتىن تەڭىز شاياندارىن ءۇيدى-ۇيگە تاسۋ ابەستىك. سونداي-اق كەشە عانا قىستان شىققان, ونىڭ ۇستىنە ۋىلدىرىق شاشۋعا دايىندالىپ جۇرگەن شاياندار ەرتە كوكتەمدە جەۋ ءۇشىن اسا قولايلى ەمەس ەكەن. ال كۇزگى سالىم, اسىرەسە تامىز ايىنىڭ سوڭى مەن قازان ايىنىڭ سوڭىنا دەيىن ولاردىڭ ەتى مايلى ءارى ءدامدى بولماق.
جاعالاۋعا تولقىن ۇرىپ شىعارىپ تاستاعان شايانداردى قورعاۋعا تابيعاتتى قورعاۋ پوليتسەيلەرى ارالاسىپ, ىدىسپەن كەلگەن تۇرعىندارمەن سويلەسىپ, شايانداردى تەڭىزگە قايتا جەتكىزۋگە قاتىستى ءتۇسىندىرۋ جۇمىستارىن جۇرگىزۋدە.
گۇلايىم شىنتەمىرقىزى,
«Egemen Qazaqstan»
ماڭعىستاۋ وبلىسى
