شاراينا
بەيسەنبى, 26 ءساۋىر 2012 7:03
يادرولىق قاتەر بارلىعىن مويىندادى
رەسەي فەدەراتسياسىنىڭ باس شتابى يران مەن كحدر تاراپىنان يادرولىق قاتەر بار ەكەنىن مويىنداپ وتىر. بۇل تۋرالى باس شتاب باستىعى نيكولاي ماكاروۆتىڭ ءمالىمدەمەسىنە سىلتەمە جاساي وتىرىپ, رەسەيدىڭ «جاڭالىقتار» اقپارات اگەنتتىگى حابارلادى.
بەيسەنبى, 26 ءساۋىر 2012 7:03
يادرولىق قاتەر بارلىعىن مويىندادى
رەسەي فەدەراتسياسىنىڭ باس شتابى يران مەن كحدر تاراپىنان يادرولىق قاتەر بار ەكەنىن مويىنداپ وتىر. بۇل تۋرالى باس شتاب باستىعى نيكولاي ماكاروۆتىڭ ءمالىمدەمەسىنە سىلتەمە جاساي وتىرىپ, رەسەيدىڭ «جاڭالىقتار» اقپارات اگەنتتىگى حابارلادى.
قاتەر ارقاشاندا بار, سوندىقتان ءبىز كوپتەگەن ەلدەردىڭ يادرولىق الەۋەتىن دامىتۋىن مۇقيات نازاردا ۇستاپ كەلەمىز, دەگەن كورىنەدى وسى ورايدا ن.ماكاروۆ. ونىڭ ايتۋىنشا, رەسەي اتالعان باعىتتاعى قاتەرلەرگە قارسى تۇرۋ ماسەلەلەرىندە باسقا مەملەكەتتەرمەن ىنتىماقتاستىققا ارقاشان دايىن. ويتكەنى, وزدەرىندە يادرولىق قارۋى جوق دەپ انت-سۋ ءىشىپ وتىرعان كوپتەگەن ەلدەردە ونداي قارۋ بار.
سۋدانداعى جانجالعا قىتاي ارالاستى
قحر توراعاسى حۋ تسزينتاو سۋدان مەن وڭتۇستىك سۋداندى ەكى جاقتى جانجالدى شەشۋدە توزىمدىلىك تانىتىپ, كۇش قولدانۋدان باس تارتۋعا شاقىردى. وسىلايشا قىتاي باسشىسى وڭتۇستىك سۋدان پرەزيدەنتى سالۆا كيردىڭ سولتۇستىكتەگى كورشىلەرىمىز بىزگە سوعىس جاريالادى دەگەن سوزىنە سالقىنقاندىلىق تانىتقان ۇتىمدى دەگەن ۇستانىمىن ءبىلدىردى.
قىتاي توراعاسى مەن وڭتۇستىك سۋدان پرەزيدەنتى بەيجىڭ قالاسىندا كەزدەسكەن بولاتىن. س.كير مۇندا التى كۇندىك ساپارمەن كەلگەن ەدى. حۋ تسزينتاو سونداي-اق تالاس تۋدىرىپ وتىرعان ماسەلەلەردى كەلىسسوزدەر جانە ءوزارا جول بەرۋلەر نەگىزىندە شەشۋ قاجەت ەكەنىن اتاپ كورسەتتى. قازىرگى تاڭداعى باستى مىندەت – قارۋلى قاقتىعىستى توقتاتۋ, دەپ مالىمدەدى قىتاي توراعاسى.
پرەزيدەنتتىككە تۇسۋگە تىيىم سالدى
ەگيپەتتىڭ ورتالىق سايلاۋ كوميسسياسى بۇرىنعى ۇكىمەت باسشىسى احمەد شافيكتىڭ پرەزيدەنتتىك سايلاۋعا قاتىسۋىنا تىيىم سالدى. بۇل تىيىم ەگيپەتتىڭ جوعارى اسكەري كەڭەسى ءبىر كۇن بۇرىن حوسني مۇباراكتىڭ رەجىمىندەگى جوعارى شەندى بارلىق قايراتكەرلەرگە قاتىستى زاڭناماعا تۇزەتۋدى بەكىتكەننەن كەيىن جۇزەگە استى.
ا.شافيك ح.مۇباراك ەل باسقارعان ۋاقىتتا ارميادا بىرقاتار جوعارى لاۋازىمدار يەلەنگەن بولاتىن. سونداي-اق ازاماتتىق اۆياتسيا مينيسترلىگىن باسقارىپ, پرەمەر-مينيستر ورىنتاعىنا دا وتىرىپ ۇلگەرگەن ەدى. مىسىر پرەزيدەنتتىگىنە كانديداتتاردىڭ ناقتى ءتىزىمىن وسك ءساۋىر ايىنىڭ اياعىندا جاريا ەتۋى ءتيىس. ال پرەزيدەنتتىك سايلاۋدىڭ العاشقى تۋرى 23-24 مامىرعا بەلگىلەنگەن. ەگەر ەكىنشى تۋر قاجەت بولسا, ول 16-17 ماۋسىمدا وتەتىن بولادى.
ۇلتشىلدارمەن ىنتىماقتاسپايدى
فرانتسيا پرەزيدەنتى نيكوليا ساركوزي مارين لە پەن پارتياسىنداعى ۇلتشىلدارمەن ىنتىماقتاستىقتان باس تارتاتىنىن مالىمدەدى. ن.ساركوزيدىڭ ايتۋىنشا, پرەزيدەنتتىككە قايتا سايلانعان جاعدايدا, لە پەنمەن ەشقانداي كەلىسىمگە بارمايدى جانە «ۇلتتىق مايدان» مۇشەلەرىن ۇكىمەتكە شاقىرمايدى.
بىراق قازىرگى پرەزيدەنت لە پەندى پرەزيدەنتتىك سايلاۋدىڭ ءبىرىنشى تۋرىندا قولداعاندارمەن كەزدەسەتىنىن, ولاردىڭ وي-پىكىرلەرىنە قۇلاق تۇرەتىنىن مالىمدەدى. ويتكەنى, وزىنە ەكىنشى تۋردا پرەزيدەنت ورىنتاعىنا قايتا وتىرۋ ءۇشىن سايلاۋشىلاردىڭ داۋىسى كەرەك. ساركوزي سونداي-اق ءوزىنىڭ باستى قارسىلاسى وللاندتىڭ لە پەندى قولداعاندار قاتەلەستى دەگەن پىكىرىمەن كەلىسپەيتىنىن اتاپ كورسەتتى.
كورول وتباسىنا سەنۋدەن قالدى
شۆەدتەردىڭ كورول وتباسىنا سەنىمى رەكوردتىق تومەنگى دەڭگەيگە قۇلدىراپ كەتكەن. بۇل تۋرالى الەۋمەتتىك زەرتتەۋ ورتالىعىنىڭ مالىمەتتەرىنە سىلتەمە جاساي وتىرىپ, جەرگىلىكتى تت اقپارات اگەنتتىگى جاريا ەتتى. سۇراۋ سالۋلار 2011 جىلدىڭ كۇزىندە جۇرگىزىلسە كەرەك. ال ونىڭ قورىتىندىسى ەندى عانا شىعارىلىپ وتىر.
سوڭعى الەۋمەتتىك دەرەكتەرگە سايكەس, شۆەدتەردىڭ 30 پايىزى كورول وتباسىنا سەنبەيتىنىن مالىمدەسە, سۇراۋ سالىنعانداردىڭ تەك 34 پايىزى عانا قولدايتىندارىن بىلدىرگەن. بۇعان قوسا, رەسپوندەنتتەردىڭ 20 پايىزى ەلدى مونارحيادان رەسپۋبليكاعا قۇرىلىمداۋ جۇرگىزىلسە, سول باعىتتى قولدايتىندىقتارىن ايتقان. جاڭا كونستيتۋتسياعا سايكەس, 1976 جىلى كورول ساياسي بيلىكتەن ايىرىلعان تۇستا, رەسپۋبليكالىق قۇرىلىستى شۆەدتەردىڭ تەك 9 پايىزى عانا قولداعان ەكەن.
قىمبات… جوق, قاراپايىم ساعات تاعادى
ازەربايجان پرەزيدەنتى يلحام اليەۆ قولىنا قۇنى 800 مىڭ دوللار تۇراتىن Blancpain 1735 ۇلگىسىندەگى ساعات تاعىپ ءجۇر دەگەن اقپارات تاراتقان «ازادلىگ» («ازاتتىق») گازەتىنە پرەزيدەنتتىڭ ءباسپاسوز قىزمەتى سوتقا بەرەمىز دەپ قوقان-لوقى جاساعان. مۇنداي مازمۇنداعى ماتەريال 24 ساۋىردە جارىققا شىقسا كەرەك.
پرەزيدەنتتىڭ ءباسپاسوز قىزمەتىندەگىلەردىڭ ايتۋىنشا, بۇل اقپاراتتىڭ شىندىققا ءۇش قايناسا سورپاسى قوسىلمايدى, پرەزيدەنت يلحام اليەۆ قىمبات ەمەس قاراپايىم مەتالل ساعات تاعادى. ازەربايجان باسشىسى قاراپايىمدىلىعىمەن ەرەكشەلەنەدى دەگەندى دە قوسىپ قويعان ءباسپاسوز قىزمەتىندەگىلەر. ەندى گازەتتەن پرەزيدەنتتەن كەشىرىم سۇراپ, ءۇش كۇن ىشىندە العاشقى جاريالانىمدى جوققا شىعاراتىن اقپار بەرۋ تالاپ ەتىلىپ وتىر. باسىلىم بولسا, اقپاراتتىڭ ناقتى ەكەنىن كولدەنەڭ تارتادى.
قىسقا قايىرىپ ايتقاندا:
اۋعانستان باسشىلىعى امەريكالىق كونگرەسسمەن دان روراباحەردى ءوز ەلىنە كىرگىزبەي تاستادى. كونگرەسسمەنگە قاتىستى قارسى رەاكتسياعا ونىڭ اۋعانستانداعى ىشكى ساياسي ۇدەرىستەرگە جوعارى قىزىعۋشىلىق تانىتۋى سەبەپ بولعان سەكىلدى.
ۋكراينا مادەنيەت مينيسترلىگى ەل اۋماعىندا رەسەيدىڭ «اق گۆارديا» تەلەسەريالىن كورسەتۋگە تىيىم سالۋدى ۇسىندى. مينيسترلىكتىڭ پىكىرىنشە, فيلم ۇلت ارازدىعىن تۋعىزىپ, م.بۋلگاكوۆ رومانىنىڭ مازمۇنىن بۇرمالايدى, ۋكراينداردى نادان, قاتال جانە شوۆينيست رەتىندە كورسەتەدى.
اۋعانستاندا تاعى ءبىر اسكەري قىزمەتشى قازا تاپتى. ول گرۋزيا كونتينگەنتىنىڭ جاۋىنگەرى بولىپ تابىلادى. سەرجانت ۆالەريان حۋدجادزە گەلمەند پروۆينتسياسىندا ميناعا تۇسكەن. ءسويتىپ, گرۋزيندەر اۋعانستاندا ءوزىنىڭ 16-شى ساربازىن جوعالتىپ وتىر.
ينتەرنەت ماتەريالدارى نەگىزىندە ازىرلەندى.
