بۇل باعدارلاما الماتى قالاسى اكىمدىگىندە باسپانا الۋ ءۇشىن كەزەكتە تۇرعان 1 276 الماتىلىق كوپبالالى وتباسىلاردى پاتەرمەن قامتاماسىز ەتۋ ماسەلەسىن شەشۋگە كومەكتەسەدى. بۇگىننەن باستاپ ولاردىڭ بارلىعى باعدارلاماعا قاتىسۋ ءۇشىن ءوز وتىنىشتەرىن ارنايى جاسالعان http://www.baqytty-otbasy.kz سايتى ارقىلى ونلاين رەجيمدە بەرۋلەرىنە بولادى, دەپ حابارلايدى «قازاقستاننىڭ تۇرعىن ءۇي قۇرىلىس جيناق بانكى» اق ءباسپاسوز قىزمەتى.
قۇجاتتار 2019 جىلدىڭ 15 ناۋرىزىنا دەيىن, 5 كۇن ىشىندە قابىلدانادى. سودان كەيىن تۇرعىن ءۇي باسقارماسى ءوتىنىشتى قاراستىرىپ, «باقىتتى وتباسى» باعدارلاماسىنا قاتىسۋشىلاردىڭ ءتىزىمىن بەكىتەدى.
بيۋدجەتتىك نەسيەلەندىرۋ باعدارلاماسىنا قاتىسۋشىلار تۇرعىن ءۇي ساتىپ الۋ ءۇشىن تۇرعىن ءۇي قۇرىلىس جيناق بانكىندە («بايتەرەك» حولدينگىنىڭ ەنشىلەس ۇيىمى) جىلدىق 2 پايىز مولشەرلەمەمەن الدىن الا زاەم الۋلارىنا بولادى. ال جەڭىلدەتىلگەن نەسيە الۋ ءۇشىن زاەم سوماسىنىڭ 10 پايىزىن قۇرايتىن مولشەردە العاشقى جارنا بولۋى قاجەت. بۇعان قوسا, بيۋدجەتتىك نەسيەلەندىرۋ باعدارلاماسىنا قاتىسۋشى كوپبالالى وتباسىلار الماتى قالاسى اكىمدىگىنەن قۇنى 1 ملن تەڭگەلىك تۇرعىن ءۇي سەرتيفيكاتتارىن الادى. بۇل قاراجات زاەم الار كەزدە العاشقى جارنانى وتەۋگە ارنالعان.
نەسيە تەك جاڭا تۇرعىن ءۇيدى ساتىپ الۋ ءۇشىن بەرىلەدى. زاەمنىڭ ەڭ جوعارعى سوماسى 15 ملن تەڭگەگە تەڭ.
– مەملەكەت باسشىسى «نۇر وتان» پارتياسىنىڭ XVIII سەزىندە كوپ بالالى وتباسىلاردى قولداپ, ولار ءۇشىن قولجەتىمدى تۇرعىن ءۇي سانىن ارتتىرىپ, تۇرعىن ءۇي قۇرىلىس جيناق جۇيەسى ارقىلى جەڭىلدەتىلگەن نەسيە بەرۋ تەتىكتەرىن دايىنداۋدى تاپسىرعان. قازىرگى ساتتە قازاقستاننىڭ بارلىق وڭىرلەرىنىڭ تۇرعىندارىن قامتيتىن «نۇرلى جەر» باعدارلاماسى بويىنشا جاڭا ءبىر باعىت ازىرلەنۋدە. الماتى قالاسىنىڭ اكىمدىگى جاڭا ەرەجەنىڭ بەكىتىلۋىن كۇتپەستەن, الدىن الا قالالىق بيۋدجەتتەن قاراجات ءبولىپ, كوپ بالالى وتباسىلار ءۇشىن «باقىتتى وتباسى» بيۋدجەتتىك نەسيەلەندىرۋ باعدارلاماسىن ىسكە قوستى. جاقىن ارادا بۇل وتباسىلار جالعا العان پاتەرلەرىنەن وزدەرىنىڭ جەكە پاتەرلەرىنە قونىس اۋداراتىن بولادى, – دەيدى تۇرعىن ءۇي قۇرىلىس جيناق بانكىنىڭ باسقارما ءتورايىمى ءلاززات يبراگيموۆا.
الماتىلىق تۇرعىندار «باقىتتى وتباسى» باعدارلاماسى بويىنشا پاتەردى وزدەرى ىزدەپ تابۋى ءتيىس. ول ءۇشىن ولارعا ءبىر اي كولەمىندە ۋاقىت بەرىلەدى. پاتەرلەردى ىزدەپ تابۋعا تۇرعىن ءۇي قۇرىلىس جيناق بانكىنىڭ قىزمەتكەرلەرى كومەكتەسەتىن بولادى. قازىر ارنايى وسى ءۇشىن بانكتىڭ قالالىق فيليالىندا بارلىق پولشەمدەرگە سايكەس ساتىلىمعا قويىلعان تۇرعىن ۇيلەردىڭ ءتىزىمى جاساقتالۋدا.
ەڭ جوعارعى سوماسى 15 ميلليون تەڭگەنى قۇرايتىن زاەم بويىنشا نەسيەنى وتەۋ ءۇشىن ايىنا 79 000 تەڭگە تولەۋ قاجەت بولادى. تۇرعىن ءۇي قۇرىلىس جيناق بانكىندەگى تولەمقابىلەتتىلىگىن باعالاۋ ۇدەرىسى جەڭىلدەتىلگەن تارتىپتە وتكىزىلەتىن بولادى. باعدارلاماعا قاتىسۋشىلار نەسيەنى وتەۋگە قاجەتتى اي سايىنعى تولەم سوماسى مەن ەرەسەك كىسىگە شاققاندا 5 اەك (12 625 تەڭگە) مولشەرىندەگى ءومىر سۇرۋگە ارنالعان ەڭ تومەنگى سومانى تولەۋ ءۇشىن جەكە تابىسىنىڭ جەتكىلىكتى ەكەندىگىن راستاۋى كەرەك. تولەمقابىلەتتىلىكتى باعالاۋ كەزىندە بالالارعا جۇمسالاتىن شىعىن تۇرلەرى ەسەپتەلىنبەيدى.
ايناش ەسالي,
«Egemen Qazaqstan»
الماتى
