مەملەكەت باسشىسىنىڭ V دۇنيەجۇزى قازاقتارىنىڭ قۇرىلتايىندا بەرگەن تاپسىرماسى اياسىندا قۇرىلعان «وتانداستار» قورى شەتەلدە تۇراتىن جانە اتامەكەنگە ورالعان اعايىندارىمىزدى قولداۋ باعىتىندا جۇيەلى جۇمىستار اتقارىپ كەلەدى.
«ۇكىمەت شەتەلدەگى ەتنيكالىق قازاقتارعا جان-جاقتى قامقورلىق كورسەتۋگە ارنالعان 2018-2022 جىلدارعا ارنالعان ءىس-قيمىل جوسپارىن بەكىتتى. ول بويىنشا دياسپورالىق ساياسات پروبلەمالارىنىڭ حالىقارالىق تاجىريبەلەرىن زەردەلەۋ, تالداۋ جۇمىستارى جۇرگىزىلۋدە. ونىڭ نەگىزگى باعىتتارىنىڭ ءبىرى وتانداستارىمىزدىڭ قاتارىنداعى جاستاردى قازاقستانداعى ءىس-شارالارعا بەلسەندى تارتۋ ارقىلى قازاقستاندىق الەۋمەتتىك جانە مادەني كەڭىستىككە بىرىكتىرۋ بولىپ تابىلادى. وڭىردەگى جازعى لاگەرلەرگە شاقىرۋ, ءتىل ۇيرەتۋ, مادەني قۇندىلىقتارمەن تانىستىرۋ, كيەلى تاريحي ورىندارعا ساياحات جاساۋ, ەكسپەديتسيالار ۇيىمداستىرۋ باعىتىندا جۇيەلى ىستەر اتقارىلادى», دەدى ءا. ابەلدينوۆا.
م. قوجاحمەت ءوز كەزەگىندە قور ۇسىنعان جوبالاردى جۇزەگە اسىرۋعا دايىن ەكەندىكتەرىن ءبىلدىردى.
قور ءبىلىم, مادەنيەت, بيزنەس, تاعى باسقا سالالار بويىنشا سەگىز جوبانى جۇزەگە اسىرىپ كەلەدى. ولاردىڭ اراسىندا دۇنيەجۇزى قازاقتار قاۋىمداستىعىمەن بىرلەسىپ «قاسيەتتى قازاق ەلى» ونەر فەستيۆالى, تۇركىستان وبلىسىندا «كيەلى قازاقستان ساياحاتى»,رەسەيدە كىشى قۇرىلتايلار وتكىزىلىپتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
