بۇگىنگى بەيبىت زاماندا اسكەري ۇشاقتى ۇرشىقشا يىرگەن اردانا بوتاي دا قازاقتىڭ قايسار قىزى. لەيتەنانت, بالقاش قالاسىنداعى №53898 اسكەري ءبولىمنىڭ اعا ۇشقىشى. 45 ساعاتتان استام ۋاقىتىن اۋەدە وتكەرگەن.
تىم تەرەڭدى قازبالاماي, وتكەن عاسىردان عانا سىر تارتتىق. ەكىنشى دۇنيەجۇزىلىك سوعىستىڭ وزىنە قازاقتىڭ 73 قىزى اتتانعان. دارىگەرى, مۇعالىمى بار. قاتارىندا ءوز ەرىكتەرىمەن مايدان دالاسىنا تابان تيگىزگەنى قانشاما! ولار جەڭىسكە جەتۋ ءۇشىن ۇشقىش تا, تانكيست تە, مەحانيك تە, راديست تە, بارلاۋشى دا, پارتيزان دا بولدى. جاستايىمىزدان ءان-جىرعا قوسقان, ەرلىگى ەلگە ۇران ءاليا, مانشۇك, حيۋاز سياقتى قازاقتىڭ باتىر قىزدارى قانشاما. دامەلى جاكەەۆانىڭ ءوزى – ءبىر توبە. كىشى سەرجانت د.جاكەەۆا 1942 جىلدىڭ تامىزى مەن 1944 جىلدىڭ قاڭتارى ارالىعىندا ستالينگراد, وڭتۇستىك جانە سولتۇستىك كاۆكاز مايداندارىندا سوعىسقا قاتىسقان. 1944 جىلدىڭ تامىزىنان باستاپ ەكىنشى بالتىق جاعالاۋى, لەنينگراد جانە ءبىرىنشى بەلورۋسسيا مايداندارىندا ەرلىك كورسەتكەن. 360 رەت اسكەري ۇشاقتى, ونىڭ ىشىندە, «يل-2» ۇشاعىن – 275,
«پە-2» ۇشاعىن 85 رەت كوككە اۋەلەتكەن. سوعىس جىلدارىندا قازاق تىلىندە شىعارىلعان گازەتتەردىڭ وزىندە (مىسالى, «جاۋعا قارسى اتتان», «قىزىل اسكەر اقيقاتى» گازەتتەرىندە) حالقىمىزدىڭ قايسار قىزدارىنىڭ ەرلىك شەجىرەلەرى تاپتىشتەپ جازىلعان ەكەن.
كەڭەس وداعىنىڭ قىز-كەلىنشەكتەرىنەن قۇرالعان اسكەري قۇرىلىمدار, اسىرەسە تۇنگى ۋاقىتتا شابۋىلدى ۇدەتە تۇسكەن بولسا كەرەك. تىپتەن, جاۋ ساربازدارى تۇنگى مەزگىلدە تەمەكى شەگۋگە جۇرەكسىنگەن. قىزارعان شوعىمەن كوزگە ءتۇسىپ قالماۋ ءۇشىن.
«مەن توقتار اۋباكىروۆتى ۇلگى تۇتامىن. مىنەزدى, بىلىمگە قۇشتار اعانى!». اسپان الەمىنە كوز تىككەن اردانانىڭ ءسوزى بۇل. – بىرىنشىدەن, – دەيدى اردانا, – مەنىڭ ارعى تەگىم – توقتار اعامىز تۋعان قارقارالى توپىراعىنان. ەكىنشىدەن, توقتار اۋباكىروۆ – قازاقتىڭ تۇڭعىش عارىشكەرى, ورتاق ماقتانىشىمىز!
ارعى تەگىم دەپ وتىرعانى, اردانانىڭ ءوزىنىڭ كىندىگى وساكاروۆ اۋدانى, مولودەجنىي كەنتىندە كەسىلگەن ەكەن. مەكتەپ جاسىندا-اق مەملەكەتتىك اۆياتسيالىق ورتالىقتا ءتالىم الىپ,
40 ساعات اۋەدە قالىقتاعان. كەيىن ازاماتتىق اۆياتسيا اكادەمياسىندا بىلىكتىلىگىن ارتتىرىپ, ۇلتتىق گۆارديا قاتارىنا شاقىرىلعان. مۇندا «ان-26» ۇشاعىن تىزگىندەگەن.
اردانا وسىدان ەكى جىل بۇرىن بالقاش وقۋ-اۆياتسيالىق ورتالىعىنان اسكەري ۇشاقپەن العاش رەت جالعىز ءوزى اۋەدە 20 مينۋت قالىقتاپ, سىناقتى ءساتتى ورىندادى. «ل-39» ۇرىس ۇشاعىمەن, نەبارى 23 جاسىندا.
ساعاتىنا 760 شاقىرىمعا دەيىن جىلدامدىقپەن ۇشاتىن «يسترەبيتەلدى» يكەمگە كەلتىرۋ – ەكىنىڭ ءبىرىنىڭ قولىنان كەلمەسى انىق. اردانا اسكەري ۇشاقتى تىزگىندەۋگە نيەت تانىتقاندا ماڭايىنداعىلاردىڭ كوپشىلىگى كۇمانمەن قاراعان بولسا كەرەك. جوق, قايسار قىز سەنىمدى اقتادى, كوپتى تاڭداندىردى, كوپكە وي سالدى.
– كەز كەلگەن ادام جۇرەك قالاۋىمەن ماماندىعىن تاڭداسا, قولعا العان ىسىنە جاۋاپكەرشىلىكپەن قاراسا, جەمىسىن كورەدى. ماسەلەن, مەن ءۇشىن اسپان – ەكىنشى ءۇيىم. مەن ءۇشىن وتانعا قىزمەت ەتۋ – ۇلكەن ابىروي! – دەيدى اردانا بوتاي.
قايسار قىزدىڭ ايتۋىنشا, ءوزىنىڭ باستى تىرەگى, جان-جاقتى قولداۋشىسى, ارينە اتا-اناسى, اعا-باۋىرلارى.
قاراپايىم, بىرتوعا كەيىپكەرىمىزدىڭ جوسپارى دا اۋقىمدى. ازىرگە ۋاقىتتىڭ ەنشىسىنە قالدىرعاندى ءجون كوردى.
ساتتىلىك تىلەيىك!
قالىقتا, قايسار قىز!
قۋانىش امانقۇلوۆ
قاراعاندى وبلىسى,
بالقاش قالاسى
