شاراينا
سەيسەنبى, 24 قاڭتار 2012 7:30
لاڭكەستىككە جاۋاپتىلار تۇتقىندالدى
نيگەريانىڭ كانو قالاسىندا 200 مىڭ ادامنىڭ ءومىرىن جالماعان اسا ءىرى بىرنەشە لاڭكەستىككە كۇدىكتىلەر قاماۋعا الىندى. ەل پرەزيدەنتى گۋدلاك دجوناتاننىڭ ايتۋىنشا, قازىرگى كەزدە نيگەريانىڭ كۇش قۇرىلىمدارى جارىلىستاردى ۇيىمداستىرۋعا باسقا دا قاتىسى بارلاردى ىزدەستىرۋمەن شۇعىلدانىپ جاتىر.
لاڭكەستىكتەردى يسلاميستىك «بوكو حارام» توبى ۇيىمداستىرۋى ىقتيمال دەگەن اقپارات تاراعان بولاتىن. ال كانو قالاسىندا مۇسىلماندار باسىم تۇرادى. نيگەريانىڭ ءسولتۇستىگىندە يسلام ءدىنىن ۇستاناتىندار حالىقتىڭ نەگىزىن قۇراسا, وڭتۇستىگىندە حريستياندار كوپ. لاڭكەستىك ارەكەتتەردىڭ نە ءۇشىن جاسالعانى تەرگەۋ بارىسىندا انىقتالاتىن بولادى.
سەيسەنبى, 24 قاڭتار 2012 7:30
لاڭكەستىككە جاۋاپتىلار تۇتقىندالدى
نيگەريانىڭ كانو قالاسىندا 200 مىڭ ادامنىڭ ءومىرىن جالماعان اسا ءىرى بىرنەشە لاڭكەستىككە كۇدىكتىلەر قاماۋعا الىندى. ەل پرەزيدەنتى گۋدلاك دجوناتاننىڭ ايتۋىنشا, قازىرگى كەزدە نيگەريانىڭ كۇش قۇرىلىمدارى جارىلىستاردى ۇيىمداستىرۋعا باسقا دا قاتىسى بارلاردى ىزدەستىرۋمەن شۇعىلدانىپ جاتىر.
لاڭكەستىكتەردى يسلاميستىك «بوكو حارام» توبى ۇيىمداستىرۋى ىقتيمال دەگەن اقپارات تاراعان بولاتىن. ال كانو قالاسىندا مۇسىلماندار باسىم تۇرادى. نيگەريانىڭ ءسولتۇستىگىندە يسلام ءدىنىن ۇستاناتىندار حالىقتىڭ نەگىزىن قۇراسا, وڭتۇستىگىندە حريستياندار كوپ. لاڭكەستىك ارەكەتتەردىڭ نە ءۇشىن جاسالعانى تەرگەۋ بارىسىندا انىقتالاتىن بولادى.
بيلىكتى بەرۋ جوسپارىنان باس تارتتى
سيريا باسشىلىعى كەشە اراب مەملەكەتتەرىنىڭ ليگاسى (امل) ۇسىنعان بيلىكتى بەرۋ جوسپارىن قابىلداماي تاستادى. بۇل جونىندە ەلدىڭ مەملەكەتتىك تەلەۆيزياسىنا سىلتەمە جاساي وتىرىپ, «France-Presse» اگەنتتىگى حابارلادى.
امل جوسپارىنا سايكەس سيريا پرەزيدەنتى باشار اساد بيلىكتەن كەتىپ, ەلدى باسقارۋ تىزگىنىن ءوزىنىڭ ورىنباسارى – ءبىرىنشى ۆيتسە-پرەمەر فارۋك ءال-شارااعا تاپسىرۋى ءتيىس بولاتىن. سونىمەن قوسا, ب.اسادقا جاڭا ۇلتتىق بىرلىك ۇكىمەتىن جاساقتاۋ ۇسىنىلعان ەدى. وسىدان كەيىن جارتى جىل ىشىندە ەلدە دەموكراتيالىق سايلاۋ وتكىزىلەدى دەپ بولجانعان بولاتىن. ۇسىنىلعان شارا ەلدىڭ ۇلتتىق ەگەمەندىگىنە قول سۇعۋ دەگەن ءۋاج كولدەنەڭ تارتىلىپ, بيلىكتى بەرۋ جوسپارى قابىلدانباي تاستالدى.
اپاتتىڭ 13-ءشى قۇرباندىعى تابىلدى
ۇستىمىزدەگى جىلدىڭ 14 قاڭتارىنا قاراعان ءتۇنى جەرورتا تەڭىزىنىڭ يتالياعا باعىنىستى دجيلو ارالىندا كرۋيزدىك «كوستا كونكورديا» لاينەرى اپاتقا ۇشىراعانى بەلگىلى. بۇگىندە كىنالى دەپ تابىلعان كەمە كاپيتانىنىڭ مالىمدەۋىنشە, لاينەر كارتادا كورسەتىلمەگەن جارقاباققا سوقتىعىسقان ەدى.
كەمە بورتىندا 4200 ادام بولسا, ولاردىڭ نەگىزى قۇتقارىلعان-تىن. سوڭعى دەرەكتەرگە سۇيەنسەك, اپات سالدارىنان 13 ادام كوز جۇمسا, 20 ادام جوعالعاندار ساناتىندا. جەكسەنبى كۇنى قۇتقارۋشىلار 13-ءشى ادامنىڭ ءمايىتىن تاپقان بولاتىن. جوعالعان ادامداردىڭ ءبارى تابىلعانشا ونىڭ باگىنداعى 2,5 مىڭ توننا سۇيىق وتىنىن سورىپ الۋ ۇدەرىسى كەيىنگە شەگەرىلىپ وتىر. جاقىن ارادا كەمە 70 مەتر تۇڭعيىققا باتىپ كەتۋى دە ىقتيمال. ەگەر باكتاعى وتىن سورىپ الىنىپ ۇلگەرىلمەسە, ەكولوگيالىق اپات ورىن الاتىنى دا ءسوزسىز.
مۇناي ءۇشىن قىرقىس قىزا ءتۇستى
وڭتۇستىك سۋدان سولتۇستىكتەگى كورشىلەرىن مۇناي ۇرلاعاندارى ءۇشىن حالىقارالىق سوتقا بەردى. ءسويتىپ, مۇنايدى سولتۇستىك سۋدان اۋماعى ارقىلى ەكسپورتتاۋدان باس تارتۋعا ءماجبۇر بولىپ وتىر. ەندى وڭتۇستىك سۋدان مۇناي قۇبىرىن كەنيا اۋماعىندا سالىپ, ەكسپورتتى شىعىس افريكا ارقىلى جۇزەگە اسىرماقشى.
وڭتۇستىك سۋدان ۇكىمەتىنىڭ مۇشەسى دەنگ الوردىڭ ايتۋىنشا, قۇبىر قۇرىلىسىنا شامامەن ءبىر جىلداي ۋاقىت كەتەدى ەكەن. سونداي-اق ول حارتۋمنىڭ كۇن سايىن شامامەن 120 مىڭ باررەل مۇناي ۇرلاپ وتىرعانىن اتاپ كورسەتتى. ءسولتۇستىكتەگىلەر مۇنى ءوز اۋماعى ارقىلى وتەتىن مۇناي ءترانزيتىنىڭ وتەمى دەيدى. وسىدان جارتى جىلداي عانا بۇرىن تۇتاس ەل بولىپ كەلگەن سۋدان مۇنايعا باي وڭتۇستىكتەگىلەردىڭ قوياردا-قويماعان «باستاماشىلىعىمەن» ەكىگە بولىنگەنى بەلگىلى. ال بۇگىندە ەكى دەربەس ەل ءوزارا تاريفكە ۋاعدالاسا الار ەمەس.
سايلاۋالدى ناۋقانىن باستاپ كەتتى
فرانتسيا سوتسياليستىك پارتياسىنىڭ بۇرىنعى ءبىرىنشى حاتشىسى فرانسۋا وللاند سايلاۋالدى ناۋقانىن باستاعانىن رەسمي تۇردە جاريا ەتتى. العاشقى سايلاۋالدى بايانداماسىن ول 22 قاڭتار كۇنى جاسادى. ءوزىنىڭ ءسوزىندە پرەزيدەنتتىكتەن ۇمىتكەر قازىرگى كەزدە فرانتسيانىڭ ناعىز باسشىسى نيكوليا ساركوزي ەمەس, «قارجى دۇنيەسى» بولىپ وتىرعانىن مالىمدەدى.
فرانسۋا وللاند ءوز مىندەتىن بىلايشا ايقىندايتىنىن ايتتى. ءبىزدىڭ ماقسات, دەدى ول, سولشىل كۇشتەردى جەڭىسكە جەتكىزىپ, وزگەرىستەردىڭ كوش باسىندا تۇرۋ. ونىڭ ءسوزىن تىڭداۋعا 25 مىڭداي ادام جينالعان. كانديداتتىڭ سايلاۋالدى ناۋقانىنىڭ باستى ۇرانى – «بۇگىنگى كۇن – وزگەرىستەر كەزەڭى». اتاپ ايتقاندا, فرانسۋا وللاند ءبىلىم بەرۋ, دەنساۋلىق ساقتاۋ جانە سالىق سالۋ سالالارىنا رەفورمالار جۇرگىزۋگە ۋادە بەرىپ وتىر. سوڭعى سۇراۋ سالۋلار ونىڭ رەيتينگى قازىرگى كەزدە نيكوليا ساركوزيدىڭ رەيتينگىنەن 5-6 پايىزعا جوعارى ەكەنىن كورسەتكەن.
حۋسەين بەيىتىنە ەسىك تارس جابىلدى
يراك ۇكىمەتى 22 قاڭتاردان باستاپ ەلدىڭ بۇرىنعى باسشىسى ساددام حۋسەيننىڭ سالاح-ەد-دين پروۆينتسياسىنداعى بەيىتىنە ەسىكتى تارس جاپتى. وسى اقپاراتتى تاراتقان «سينحۋا» اگەنتتىگىنىڭ حابارلاۋىنشا, جەرگىلىكتى بيلىك پوليتسياعا بەيىتكە ەشكىمدى جىبەرمەۋدى تاپسىرعان.
جالپى, يراك باسشىلىعى 2009 جىلى-اق حۋسەيننىڭ قابىرىنە كەز كەلگەن ەكسكۋرسيانى, ءتىپتى مەكتەپ وقۋشىلارىنىڭ ەكسكۋرسياسىن دا جاساتۋعا تىيىم سالعان بولاتىن. ەلدىڭ جاڭا بيلىگى بۇرىنعى باسشىنىڭ قابىرىنە بارۋعا تىيىم سالماسا, حۋسەين جەتەكشىلىك ەتكەن «بااس» پارتياسىنىڭ جاقتاستارى سانى ءوسىپ كەتەدى دەپ قاۋىپتەنگەن ەدى. تىيىم سالۋدىڭ باسقا دا سەبەپ-سالدارى بولۋى ابدەن ىقتيمال.
300 ميلليون رۋبل ايىپ سالدى
تاتارستاننىڭ ۆەرحنەۋسلون اۋدانىنىڭ بۇرىنعى باسشىسى الەكساندر تيموفەەۆكە پارا العانى ءۇشىن 300 ميلليون رۋبل كولەمىندە ايىپ سالۋ تۋرالى ۇكىم شىعارىلدى. تەرگەۋ نۇسقاسى بويىنشا, ول جەر تەلىمدەرىن زاڭسىز بولگەنى ءۇشىن 5 ميلليون رۋبل پارا العان.
رەسپۋبليكانىڭ جوعارعى سوتىندا ا.تيموفەەۆ كىناسىن موينىنا الىپ, تەك باس بوستاندىعىنان ايىرماۋدى سۇراعان. پروكۋرور بولسا, ونى 9 جىلعا سوتتاپ, جارتى ميلليارد رۋبل ايىپ سالۋدى تالاپ ەتكەن. جەمقوردىڭ ادۆوكاتى ونىڭ ءىسىن ەڭ جامان دەگەندە الاياقتىق قانا, جەمقورلىققا ەشقانداي قاتىسى جوق دەپ, اقىر اياعىندا اقتاپ شىعارۋدى وتىنگەن. سوت ۇكىم شىعاراردا ا.تيموفەەۆتىڭ قاراۋىندا كىشكەنتاي بالالارى مەن قارت اتا-اناسى بارىن ەسكەرگەن سەكىلدى.
ينتەرنەت ماتەريالدارى نەگىزىندە ازىرلەندى.
