قازاقستان • 01 ناۋرىز، 2019

ورال قالاسىندا تەراكت جاساماق بولعاندار سوتتالدى

374 رەتكورسەتىلدى

ورال قالاسىندا «قۇقىق قورعاۋ ورگاندارى مەن اسكەريلەرگە قارسى «قارۋلى جيھاد»، ياعني تەرروريزم اكتىلەرىن جاساۋ ءۇشىن ۇيىمداستى» دەپ ايىپتالعان توپ مۇشەلەرىنە سوت ۇكىمى شىقتى.

باتىس قازاقستان وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى قۇرامىندا ج.ەسكەنديروۆ، ا.يسمۋرزين، ت.كارچەگەنوۆ، ە.بالتاباەۆ، ن.ايتبولاتوۆ، س.تلەكباەۆ، ر.جاستالاپوۆ جانە كامەلەتكە تولماعان ق.برگاليەۆ بولعان قىلمىستىق توپقا قاتىستى ۇكىمدى جاريالاندى.

سوت ماتەريالدارىنا قاراعاندا، 2018 جىلدىڭ قاڭتار-ءساۋىر ايلارىندا ج.ەسكەنديروۆ ورال قالاسىندا «سالافي جيھاد» باعىتىن ۇستاناتىن، ءدىني راديكالدىق كوزقاراستاعى ا.يسمۋرزين، ت.كارچەگەنوۆپەن تانىسىپ، سيرياعا بارماي-اق ورال قالاسىندا قۇقىق قورعاۋ ورگاندارى مەن اسكەريلەرگە قارسى «قارۋلى جيھاد»، ياعني تەرروريزم اكتىلەرىن جاساۋ ءۇشىن ۇيىمداسقان تەرروريستىك توپقا (جاماعات) بىرىگۋ جايلى تالقىلاپ، تەرروريستىك توپ قۇرعان.

2018 جىلى مامىر ايىندا تەرروريستىك توپتى قۇرۋشى ج.ەسكەنديروۆ، ا.يسمۋرزين، ت.كارچەگەنوۆ قاتارىنا وزگە دە ادامداردى تارتىپ، ءدىني ۋاعىز جۇرگىزىپ، دiني الاۋىزدىقتى قوزدىرىپ، تەرروريزمدى ناسيحاتتاپ، تەرروريزم اكتىلەرىن جاساۋعا جاريا تۇردە شاقىرعان. ولاردىڭ جوسپارىندا ورال قالاسىنداعى اباي پوليتسيا بولىمشەسىن جارىپ جىبەرۋ، پوليتسيا قىزمەتكەرلەرىن ءولتىرۋ، اسكەري بولىمگە شابۋىل جاساۋ، تاعى باسقا زاڭسىز ارەكەتتەر بولعان دەلىنەدى. توپ باسشىسى، ياعني ء«امىر» رەتىندە ج.ەسكەنديروۆتى سايلاپ، قالعاندارى وعان انت بەرگەن.

بۇل ماقساتتار ءۇشىن «زك» مودەلدى 16-كاليبرلى جانە «يج-18ە» مودەلدى 12-كاليبرلى تەگىس ۇڭعىلى اڭشى «شولاق» مىلتىقتارىن وق-دارىسىمەن تاۋىپ، اتۋ ءتاسىلىن ءبىر-بىرىنە ۇيرەتىپ، دايىندالعان.

قىلمىستىق توپ 2018 جىلى ماۋسىم ايىنىڭ سوڭىندا ورال قالاسىندا ورنالاسقان پوليتسيا بولىمىنە، №5517 ىشكى اسكەري بولىمىنە جانە ۇلتتىق قاۋىپسىزدىك كوميتەتىنىڭ عيماراتىنا كۇتپەگەن جەردەن شابۋىل جاساۋدى جوسپارلاعان ەكەن. الايدا، 25 ماۋسىمدا ۇلتتىق قاۋىپسىزدىك كوميتەتى بقو بويىنشا دەپارتامەنتى قىزمەتكەرلەرى تەرروريستىك توپتى تۇتقىنداعان.

باتىس قازاقستان وبلىستىق قىلمىستىق ىستەر جونىندەگى مامانداندىرىلعان اۋدانارالىق سوت ۇكىمى بويىنشا 25 جاسار ج.ەسكەنديروۆ پەن 35 جاسار ا.يسمۋرزين قىلمىستىق كودەكستىڭ 174-بابى 3-بولىگىمەن (قىلمىستىق توپپەن جاسالعان ءدىني الاۋىزدىقتى قوزدىرۋ)، 256-بابى 2-بولىگىمەن (تەرروريزمدى ناسيحاتتاۋ)، 259-بابى 2-بولىگىمەن (تەروريستىك ارەكەتتى ۇيىمداستىرۋ ماقساتىندا كامەلەتكە تولماعان ادامدى ازعىرىپ كوندىرۋ)، 287-بابى 5-بولىگىمەن (قىلمىستىق توپ قۇرامىندا قارۋدى زاڭسىز يەمدەنۋ، تاسىمالداۋ، ساقتاۋ)، 257-بابى 1-بولىگىمەن (تەرروريستىك توپتى قۇرۋ، وعان باسشىلىق ەتۋ)، 24-بابى 1-بولىگى 255-بابى 4-بولىگىمەن (تەرروريستىك اكتىلەر جاساۋعا دايىندالۋ) ايىپتى دەپ تانىلىپ، ارقايسىسىنا تۇپكىلىكتى 13 (ون ءۇش) جىل باس بوستاندىعىنان ايىرۋ جازاسى تاعايىندالدى.

52 جاسار ت.كارچەگەنوۆ قىلمىستىق كودەكستىڭ 174-بابى 3-بولىگىمەن، 256-بابى 2-بولىگىمەن، 259-بابى 2-بولىگىمەن، 257-بابى 1-بولىگىمەن، 24-بابى 1-بولىگىمەن، 255-بابى 4-بولىگىمەن ايىپتى دەپ تانىلىپ، وعان تۇپكىلىكتى 12 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى.

19 جاسار ە.بالتاباەۆ پەن 20 جاسار ن.ايتبولاتوۆ قىلمىستىق كودەكستىڭ 174-بابى 2-بولىگىمەن (ادامدار توبىمەن الدىن الا ءسوز بايلاسىپ، قاساقانا ءدىني الاۋىزدىق قوزدىرۋ)، 256-بابى 2-بولىگىمەن، قك-ءنىڭ 257-بابى 2-بولىگىمەن، 24-بابى 1-بولىگىمەن 255-بابى 4-بولىگىمەن ايىپتى دەپ تانىلىپ، قك-ءنىڭ 55-بابى 4-بولىگىن قولدانىپ، (بەلگىلى ءبىر قۇقىق بۇزۋشىلىق ءۇشىن كوزدەلگەن جازادان گورى نەعۇرلىم جەڭىل جازا تاعايىنداۋ) ارقىلى تۇپكىلىكتى 5 جىل باس بوستاندىعىنان ايىرۋ جازاسى تاعايىندالدى.

21 جاستاعى س.تلەكباەۆ تا قىلمىستىق كودەكستىڭ 257-بابى 2-بولىگىمەن، 24-بابى 1-بولىگىمەن 255-بابى 4-بولىگىمەن ايىپتى دەپ تانىلىپ، قك-ءنىڭ 55-بابى 4-بولىگىن قولدانىپ، (بەلگىلى ءبىر قۇقىق بۇزۋشىلىق ءۇشىن كوزدەلگەن جازادان گورى نەعۇرلىم جەڭىل جازا تاعايىنداۋ) تۇپكىلىكتى 3 جىل باس بوستاندىعىنان ايىرۋ جازاسى تاعايىندالدى.

18 جاسار ر.جاستالاپوۆقا قىلمىستىق كودەكستىڭ 257-بابى 2-بولىگىمەن، 24-بابى 1-بولىگىمەن، 255-بابى 4-بولىگىمەن، قك-ءنىڭ 55-بابى 4-بولىگىن قولدانىپ، تۇپكىلىكتى 5 جىل باس بوستاندىعىنان شەكتەۋ جازاسى تاعايىندالدى.

توپ مۇشەلەرىنىڭ ىشىندەگى ەڭ جاسى، كامەلەتكە تولماعان ق.برگاليەۆ (16 جاستا) قىلمىستىق كودەكستىڭ 257-بابى 2-بولىگىمەن، 287-بابى 5-بولىگىمەن، 24-بابى 1-بولىگىمەن 255-بابى 4-بولىگىمەن قك-ءنىڭ 55-بابى 4-بولىگىن قولدانىپ، تۇپكىلىكتى 2 جىلعا باس بوستاندىعىنان شەكتەۋ جازاسى تاعايىندالدى.

سوت بارلىق سوتتالۋشىلاردى اۋىر جانە اسا اۋىر قىلمىستار جاساعان دەپ شەشتى.

«تەرروريستىك توپتىڭ ەڭ جاس ەكى قاتىسۋشىسى: ر.جاستالاپوۆ پەن كامەلەتكە تولماعان ق.برگاليەۆكە توقتالاتىن بولساق، سوت ر.جاستالاپوۆتىڭ دەنساۋلىق جاعدايىن، وتباسىنىڭ جالعىز ۇلى ەكەنىن، توپ باسشىسىمەن اكەلىنگەن قارۋ تۋرالى بىلمەگەنىن، تەرروريستىك توپپەن وتكىزىلگەن باس قوسۋ جيىندارىنا ەكى رەت قاتىسىپ، ودان كەيىنگى جيىندارعا بارماعانىن، جاستىعىن; ال ق.برگاليەۆتىڭ كامەلەت جاسقا تولماعانىن، تەرروريستىك توپ مۇشەسى تۋعان اعاسى ا.ءيسمۋرزيننىڭ شاقىرۋىمەن جالداعان پاتەردە بىرگە تۇرۋى سالدارىنان ولاردىڭ ازعىرۋىنان توپقا كىرگەنىن ەسكەرىپ، ولاردى باس بوستاندىعىنان ايىرماي-اق تاربيەلەپ، تۇزەتۋگە مۇمكىندىك بار دەگەن قورىتىندىعا كەلدى» دەلىنگەن جۋرناليستەرگە تاراتىلعان ءباسپاسوز پاراقشاسىندا.

ايتا كەتەيىك، «زاڭدا كوزدەلگەن تارتىپپەن سوت ۇكىمىنە شاعىم جاسالعان جاعدايدا سوت شەشىمىنىڭ زاڭدىلىعى جوعارى تۇرعان سوتتارمەن تەكسەرىلۋى مۇمكىن» دەپ ەسكەرتەدى باتىس قازاقستان وبلىستىق سوتىنىڭ ءباسپاسوز قىزمەتى.

قازبەك قۇتتىمۇرات ۇلى،

«Egemen Qazaqstan»

باتىس قازاقستان

سوڭعى جاڭالىقتار

ىستىق تاماق تاراتتى

قازاقستان • بۇگىن، 17:59

جاقسى اكىم جالعىز جۇرەدى

تانىم • بۇگىن، 17:02

بەتپەردە كيگەن كوكتەم

تانىم • بۇگىن، 16:55

ۇقساس جاڭالىقتار