نەگىزگى وتىرىس باستالار الدىندا ەلباسى «نۇر وتان» پارتياسىنىڭ قازىرگى جۇمىسىنا, پارتيانى جاڭعىرتۋعا جانە ونىڭ تاريحىنا ارنالعان ارنايى كورمەنى ارالادى. نۇرسۇلتان نازارباەۆقا قازاقستان حالقىنا ارنالعان جولداۋ مەن «بەس الەۋمەتتىك باستامانىڭ» ىسكە اسىرىلۋ بارىسىنا مونيتورينگ جۇرگىزۋدىڭ جاڭا جۇيەسى, سونداي-اق پارتيا جوبالارىن جۇزەگە اسىرۋدىڭ ناتيجەلەرى تۋرالى جان-جاقتى مالىمەت بەرىلدى. سونىمەن قاتار, قازاقستان پرەزيدەنتىنە جاڭا «تسيفرلىق پارتيا» جۇيەسىنىڭ مۇمكىندىكتەرى تانىستىرىلدى.
مەملەكەت باسشىسى سويلەگەن سوزىندە قازاقستاننىڭ وتكەن 20 جىل ىشىندە قول جەتكىزگەن جەتىستىكتەرىنە توقتالىپ, ەلىمىزدەگى بارلىق وڭ وزگەرىستەرگە ىقپال ەتكەن «نۇر وتان» پارتياسىنىڭ ءرولىن ەرەكشە اتاپ ءوتتى.
– ءبىزدىڭ باستى باسىمدىعىمىز – ازاماتتارىمىزدىڭ تۇرمىس ساپاسىن ارتتىرۋ جانە قازاقستاندى الەۋمەتتىك باعىتتاعى مەملەكەت رەتىندە دامىتۋ. ءبىز قيىن كەزەڭدەردىڭ وزىندە الەۋمەتتىك مىندەتتەمەلەرىمىزدى ورىندادىق. ەلىمىزدە ءاردايىم الەۋمەتتىك سالاعا مول قارجى ءبولىنىپ كەلدى, بۇل كورسەتكىش الداعى ۋاقىتتا بىرتە-بىرتە ارتا بەرەتىن بولادى, – دەدى ەلباسى.
نۇرسۇلتان نازارباەۆ ەلىمىزدەگى ازاماتتاردىڭ تۇرمىس ساپاسى مەن ءال-اۋقاتىن ارتتىرۋ ءۇشىن ۇلتتىق قوردان قاراجات بولىنەتىندىگى تۋرالى ايتتى.
مەملەكەت باسشىسى الەۋمەتتىك ساياساتتى ودان ءارى جۇزەگە اسىرۋدىڭ نەگىزگى باعىتتارىنا توقتالىپ, ونى ىسكە اسىرۋعا پارتيانىڭ بەلسەندى اتسالىسۋى قاجەت ەكەنىن اتاپ ءوتتى.
– پارتيا جۇرتشىلىقتىڭ كۇندەلىكتى ماسەلەلەرىن شەشۋ ىسىنە بەلسەندى اتسالىسۋعا ءتيىس. «حالىققا كومەك» جوباسى وسى جۇمىستاردى جانداندىرۋعا باعىتتالعان. بۇگىنگى تاڭدا قوعامنىڭ وزەكتى سۇرانىستارىنا جەدەل جاۋاپ بەرۋ جانە سولارعا مەملەكەتتىك ورگانداردىڭ نازارىن اۋدارتۋ ماڭىزدى ماسەلە سانالادى, – دەدى نۇرسۇلتان نازارباەۆ.
سەزد بارىسىندا پارتيانىڭ «باقۋاتتى قوعام: ونجىلدىقتىڭ 10 ماقساتى» اتتى 2030 جىلعا دەيىنگى جاڭا باعدارلاماسى, پارتيانىڭ ساياسي كەڭەسى مەن ورتالىق باقىلاۋ-تەكسەرۋ كوميسسياسىنىڭ جاڭا قۇرامى بەكىتىلىپ, پارتيا جارعىسىنا وزگەرتۋلەر مەن تولىقتىرۋلار ەنگىزىلدى, سونداي-اق پارتيانىڭ ساياسي كەڭەسى مەن ورتالىق باقىلاۋ-تەكسەرۋ كوميسسياسى جۇمىستارىنىڭ قورىتىندىلارى جونىندەگى ەسەپتەرى قابىلداندى.
