ال, وبلىس بويىنشا مەديتسينالىق كومەك كورسەتەتىن مەملەكەتتىك ەمحانالار, جەكە مەنشىك كلينيكالارمەن بەكىتىلگەن كەلىسىمشارتتىڭ قۇنى 37,6 ملرد تەڭگەنى قۇرادى.
بيىلعى جىلدىڭ باسىندا وبلىستا 90 مەديتسينا ۇيىمى تىركەلگەن بولسا, ونىڭ 39 مەملەكەتتىك, 51 جەكە مەنشىك كلينيكالار.
وتكەن جىلمەن سالىستىرعاندا, مەملەكەتتىك تاپسىرىستى ورىنداۋعا ءوتىنىش بىلدىرگەن جەكە مەنشىك كلينيكالار سانى 10-عا ارتىپ وتىر.
جالپى, حالىققا تەگىن مەديتسينالىق كومەك ۇكىمەت قاۋلىسىمەن بەكىتىلگەن «كەپىلدى تەگىن مەديتسينالىق كومەك كولەمى» تىزىمىنە سايكەس كورسەتىلەدى.
بۇل قىزمەتتى ەلىمىزدىڭ تۇرعىندارى, ورالماندار, ەلىمىزدە تۇراتىن شەتەلدىكتەر جانە ازاماتتىعى جوق ادامدار الا الادى. ۋاقىتشا كەلگەن شەتەلدىكتەرگە شۇعىل مەديتسينالىق كومەك تەگىن كورسەتىلەدى.
وڭىردە تەگىن كومەك كورسەتەتىن مەديتسينالىق ۇيىمداردى تاڭداۋ ارنايى ايماقتىق كوميسسيانىڭ وتىرىسىندا قارالدى.
كوميسسيا قۇرامىندا «الەۋمەتتىك مەديتسينالىق ساقتاندىرۋ قورى» قىزمەتكەرلەرى, دەنساۋلىق ساقتاۋ باسقارماسىنىڭ وكىلدەرى, دەنساۋلىق ساقتاۋ قىزمەتكەرلەرىنىڭ كاسىپوداعى جانە «ەمدەلۋشىلەردىڭ قۇقىقتارىن قورعاۋ بويىنشا» قوعامدىق بىرلەستىك باسشىلارى بار.
سونداي-اق, كوميسسيا جۇمىسىنا «اتامەكەن» ايماقتىق كاسىپكەرلەر پالاتاسى قىزمەتكەرى دە قوسىلدى.
تەگىن مەديتسينالىق كومەك ارقىلى مەديتسينالىق قىزمەتتەردى كورسەتۋ ءۇشىن بيىل وبلىستىق بيۋدجەتتەن 37,5 ميلليون تەڭگە بولىنەدى.
ال فيليال تۇراقتى نەگىزدە كورسەتىلەتىن مەديتسينالىق قىزمەتتەردىڭ كولەمىنە, ساپاسىنا مونيتورينگ جۇرگىزەدى.
ەگەر دە مەديتسينالىق كومەكتىڭ كەيبىر تۇرلەرىنە تۇتىنۋ ارتسا, وزگە قاراجات كوزدەرىنەن الىنىپ, قايتا بولىسكە سالىنادى.
قورعا بيىل مەديتسينالىق قىزمەتتەردى ساتىپ الۋعا وتكەن جىلمەن سالىستىرعاندا بيۋدجەتتەن 5 پايىزعا ارتىق قارجى ءبولىنىپ, امبۋلاتورلىق-ەمحانالىق كومەكتى دامىتۋعا باعىتتالدى.
جانە دە جالپى تاجىريبە دارىگەرلەرىنىڭ جۇكتەمەسىن تومەندەتىپ, ەمحانالىق جانە جەدەل جاردەم قىزمەتىنە دە, بولىمشە دارىگەرلەرىنە دە ىنتالاندىرۋ اقىسىن تولەۋ, جالاقىسى تومەن قىزمەتكەرلەردىڭ ايلىعىن ءوسىرىپ, ونكولوگيالىق اۋرۋلاردى ەمدەۋگە كەشەندىك جوسپار قۇرۋ كوزدەلىپ وتىر.
فاريدا بىقاي,
«ەگەمەن قازاقستان»
پاۆلودار
