ورىن العان قايعىلى وقيعاعا وراي, بۇگىن مەملەكەت باسشىسىنىڭ تاپسىرماسى بويىنشا قازاقستان رەسپۋبليكاسى پرەمەر-ءمينيسترىنىڭ ورىنباسارى جەڭىس قاسىمبەكتىڭ توراعالىعىمەن ۇكىمەت كوميسسياسى قۇرىلدى. بۇگىن كوميسسيا توراعاسى جەڭىس قاسىمبەك جانە كوميسسيا مۇشەلەرى, سونىمەن قاتار, استانا قالاسىندا ءىسساپاردا جۇرگەن جامبىل وبلىسىنىڭ اكىمى اسقار مىرزاحمەتوۆ تاراز قالاسىنا شۇعىل ۇشىپ كەلىپ, وقيعا ورنىنا باردى. ورىن العان وقيعانىڭ انىق-قانىعىمەن تانىسىپ, جارىلىستان جاپا شەككەن ازاماتتاردىڭ جاعدايىن سۇراپ, قازا تاپقانداردىڭ جاقىندارىنا كوڭىل ايتتى.
بۇگىن تاراز قالاسىندا ۇكىمەت باسشىسىنىڭ ورىنباسارى جەڭىس قاسىمبەكتىڭ توراعالىعىمەن كوميسسيا وتىرىسى ءوتتى. وقيعانىڭ ناقتى سەبەپتەرى ءسوز بولعان جيىندا كوميسسيا توراعاسى ورىن العان جاعدايدى جان-جاقتى زەردەلەۋ كەرەكتىگىن, سونىمەن قاتار, قاجەت بولسا ارنايى مامانداردى باسقا قالالاردان الدىرۋ كەرەكتىگىن ايتتى. جيىن بارىسىندا جەڭىس قاسىمبەك بارلىق زارداپ شەككەن تۇرعىندارعا جەكە-جەكە حابارلاسىپ, پسيحولوگيالىق جانە مەديتسينالىق كومەك كورسەتىپ, ۋاقىتشا ورنالاساتىن پاتەرلەرمەن دە قامتاماسىز ەتۋدى تاپسىردى.
جارىلىستان قازا بولعان تۇرعىنداردىڭ وتباسىنا تاراز قالاسى اكىمدىگىنىڭ تاراپىنان 1 ميلليون تەڭگەدەن قارجىلاي كومەك بەرىلەتىن بولدى. كوميسسيا وتىرىسىنان كەيىن جەڭىس قاسىمبەك پەن اسقار مىرزاحمەتوۆ اۋرۋحاناعا بارىپ, زارداپ شەككەن تۇرعىنداردىڭ جاعدايىن ءبىلدى.
وقيعاعا بايلانىستى جامبىل وبلىسى اكىمىنىڭ تاپسىرماسىمەن وبلىستىق توتەنشە جاعدايلار دەپارتامەنتى قاجەتتى ماماندار مەن تەحنيكا جۇمىلدىردى. اپات ورىن العان ءۇيدىڭ بارلىق تۇرعىندارى قاۋىپسىز ورىنعا كوشىرىلدى. وقيعا بارىسىندا 8 ادام زارداپ شەكسە, ونىڭ ىشىندە وكىنىشكە قاراي 3 ادام قايتىس بولعان.
قازىرگى كەزدە جامبىل وبلىسىنىڭ اكىمدىگى زارداپ شەگۋشىلەرگە بارلىق قاجەتتى كومەكتەردى كورسەتۋدە. اپات بولعان ءۇيدىڭ 100-دەن استام تۇرعىندارىنا №47 مەكتەپتە ىستىق تاماق بەرىلىپ, پسيحولوگيالىق-مەديتسينالىق كومەكتەر كورسەتىلىپ جاتىر. سونىمەن قاتار, زارداپ شەگۋشىلەر تاراز قالاسىنداعى «بايتەرەك» ىقشام اۋدانىنداعى كوپقاباتتى بوس ۇيلەرگە دە ۋاقىتشا ورنالاستىرىلدى. ال, بۇگىن ورىن العان توتەنشە جاعدايعا بايلانىستى جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆتىڭ توراعالىعىمەن ارنايى جەدەل شتاب قۇرىلدى. تاراز قالاسىنىڭ اكىمى عالىمجان ءابدىرايىموۆتىڭ وكىمىمەن نىساندىق توتەنشە جاعداي جاريالاندى. جالپى, الدىن-الا ساقتىق شارالارىنا قالا بيۋدجەتىنەن 91,5 ميلليون تەڭگە قاراستىرىلعان. ال, بۇگىنگى وقيعاعا بايلانىستى ناقتى شىعىندارعا تالداۋ جۇرگىزىلەدى.
حاميت ەسامان,
«Egemen Qazagstan»
جامبىل وبلىسى
